አርሽነይ ኻግራንዙ ኢኮኖሚዙ ሲግዙ ጛጽ የጝ፡፡ አርሽነይ ኽጽምስ ኪርም እጅር ኹርጅቅ ጽበው አይነተ ሰቭ አቕ ቲግቭርሸው የጝ፡፡ እንቅ ዓልሚልቅ ቺተቺተው ገቨዝ አርሽነይ ቲግቭርሸኵ፡፡ ዓልምቱ ባንክዝመ ፋኦቱ ሚዝረይዝጘ ይና ዓልምየትል 65-70 ናንድ ጭሰጭሽተውድ አርሽነይዝ የጝ፡፡ አርሽነይ እልቱ ኹረይስ ዲቈውዝ ኢኮኖሚዙ ፍልፍለ አቕ ጝታጽብኒዝ ወዝ የጝ፡፡ ኢንዱስትሪ ፋጥርሻንስመ ትውጽውጸ ኵንሻንስ አይነተ ችጘርድ ዋርደኵ፡፡ አርሽነይ አርቕትዙ ፈንዝ ከቭሽየውዜ ዘላልምቱ ድኽት ሉተነዊስ ቓዘው እጀውም፡፡ አርሽነይ ክንድየቊዙ ሰቭ አየውም፡፡ እተይ ኻስቨው ጽብሽ ነንም ድኽትዝ ውር አቕ ጸበጘ ልብትየውድ የጝ፡፡ አስኮለ ክንድጝዝ ጊውርሸነው ቀሰው ዊምብርል ጊልብርብርሸነውዝ አርፉ ምኻየ ሊምደናንስ ጭቊ አየውም፡፡ አርፉ ምኻየ ናንጣንድ ሊልምዝ ጕዝውድ ባዶ ጻቭ ቃጽረጥዙ በረ ጻቨነዊስ ቢዘ ፈን እጀው አቐነውድ ነንቱ ኹርድ ልብጠ ጡሸኵ፡፡
ዓልምቱ ኹረዝመ አርሽነይ ድርጅቲዙ ሚዝረይዝጘ አርሽነይ እጅር ኹርዝ ዚምናንዝ ጽብንዙ ሲርየ አቕ ጻጛንድ ኻግራንዝመ ነቃቐቊ ኽዝቫን ቺተቺተቊ ገብዝ ጊቭርት ሊጊሰነ መልጥ ፊስጝ ተክዘ አቕጝኵጙ፡፡ አስጛውዝ ዲዝጝሸው ጻጝትዝ ሰቭተቊ ቈሽ እልቱ ኹረይስ ተግሪንቀ ዝቨድ ጻጸ ጻቭጝ ድኽትድ ቀሰው ሽጙዝጘ ቈድሽጝ ኤሎሄ ይጘኵ፡፡ እኔን ሲዝወርነይዙ ዊንም አርቕት ብንዙ ሰቭድ ድኽቲል ማለቊ ኽዝቫን ዓልምስ ፈተነ ፤ ጝታጽብንድም ላጢዙ ዓልምድ ከስጝ ቓለነውዝ ትአምር በነቊ አጛንስ ጻቭኵ፡፡ አርሽነይ ዚርፊዝ ቀሰው ተግረ ፊረቊ ዚምኑ አሩሽንዝ ከቭሰቊ ኻግራን ትውጽውጸል ችጝሽጘኵ፡፡ እንዛይ ኻግራኒል ጽበቊ ኻግራኒዙ ጽብንድ ምነንዘው፤ ጝታቃወጢዙ ዊግሽንድም ኪብርሸው የጝ፡፡ ኽግዝመ ስረት ኵንሸው ፤ ጝታዊስ ከስጘ ቃርባ ኻጽርዙ ዲቭየድ ቀቨነውዝ ትውጽውጸድ ችጝሽታው ጻቭጘኵ፡፡
እግረ እኔንትቅ ቓሊሰው ገቨይስ ሳልጠውዝ ፈናንስ ጽብነው ጊዝድ እክል አየውም ይን ኻስቨነው ተሚሰኵ፡፡ ንጭ ኻረኒቭ ተከውድ ግያ ሠራሺንቀ ዲቊነው ጊዝድ ኽያንስቅ ፣ እጽዋንስቅ፣ ሲዙሳንስቅ አቓነውድ ልብተነው ተሚሰኵ፡፡ ጊቭርትድ ሊጊሰቊ አርሽነይዝቊ ሰባንድ ሠራሸነው ዚምንድ ማጽነው አቐነውድ ልብተነው ተሚሰኵ፡፡ ልብተነው ጭቊ አቒንቀ ቲግቭሩ ፍልውልወ ጻቨነውዝ ብጭቒዙ ሩሔድ ላውጠነው ተሚሰኵ፡፡
ጊቭርትድ ሊጊሰቊ ሠራሽናንድ ወረጘ ጛይ? አርሽነይ ማካናይዝ፣ ኩታገጠም ጕዝን፣ ማሽንዝ አረ ጥቅነው የነቊል አውን ችጝንቅ አጢ የውድ ጨንቅዝጠ ጡሻውም፤ ቸልነዊስ የውም ቀለዊስ ኪርምነ እስኪ? እዊስቅም ንየ ይናጛይል ምኻውነው ከዝጝድ ይናቲቭሩ ግሪቪዝ ኪልን ፈናንስ ሚንወነው ጡሸኵ፡፡
ጊቨርትድ ሊጊሰንጥ ዊትርቅትቊ ሰባን ፡-
ቃውሰይዝ እየይዝ ቺዝጚዝ አቐው እፍርት ሊጊሰነ ገብድ ማርጸነው ጡሸኵ፡፡ ኮምፖስት አስለነው፤ ኵረ ፊሰቊ ቻጽጝድ ቀድሻይጘጘ እርከን ሠራሸነው፤ ደግምግመዝ ሊጭጣይስቅ ጕዘነው፤ ማርጽሽተው ዚረ አሩሸነው፤ ስወ ተራንድ ኰርድ ሊምድን ዚረ ፊዘነው፤ ደግምግመዝ አርመነው፤ ዚነዙ አይንቲዝጘ ታኽንኽነነው፤ ጫረድ ፍጠይዝ አቚዙ ጻየድ ሊጊሰናንስ ቊጥን አቅቨቊ ሰባን ሠራሸነው፤ችጛንድ ጊቭርት በክናየጛ ቸልሰው አቕንትዝ አይረነው፤አይርሸውድ ጨቅሻየጘ ኰርድ ሊምድን ዊርነ ጥወነው፤ ዊርነ ጥውሽታንድም ኽይጠዝ 30 ናን በክንዘቊ ሠራሽናንድ ቃጽቨነው ተሚሰኵ፡፡
እንዛይ ጊቭርትድ ሊጊሰቊ ገብድ አርቕሽተቊ አቕጝሽም ኽይጠዝ አርቐነው በነውዝ ፋጥርሸው ችግሰ አቒንቀስ ቲግቭረናንስ ፋጥርሸው ቢተ የጝ፡፡ አቓንስቅም ኽይጠድ እጅር ግርቭዝ ሠራሽተው አቓንስቅ ላውጥሸነውዙ እምንት ጽበውዜ ቺግርዛ አቐነውድ ልብተነው ጡሸኵ፡፡ አርሽነይ ላውጠው ሰቭ የጝ ይን ኻስቨነውዝ ዚምንድ ማጽነው ሰራሽን አርውሸነው ተሚሰኵ፡፡ ንጭ ሚንውት ዓምርም እክል አየውም፤ ዚምንድ ኽይረውዜ ዚምንድ አውትም ማለው አቐነውድ ልብትን ሠራሸነው ጡሸኵ፡፡
ግርማ ተጫነ ግንቭት 30/2017
