ላው ቢሊዮን ዶላር በጀት  ሚድቭሸው ቲክርክረ

አልም አቅቨ ልኰ ኳስዙ ፌዴሬሽን ገረደ (ፊፋ) 2001 አ.እ ኪርም 24 እምታንዝ ላጝጠ ጓነን ሲትፍሽጘው አልምቱ ወንጨ አስልሻጙ ዊንኩ። እን አምረይዝ ግነ አይርዝ 32 ክለቨን  ሰውጠ ጓነዝ አድልሽጝ ሲትፍሽጘው ክለቨንዙ አልምቱ ወንጨ የጝ።

እን ቲክርክረይዝም ቃውሰተዝመ ኽየው ቈደ አስልሽኩ። አልምቱ ኻግር አቅቨ  ልኰ ኳስዙ  ገረደ ፊፋ  ክለቫንዙ   አልምቱ ወንጨ ቲክርክረ ላው ቢሊዮን  ዶላር ቈደ አስለነውድ የጝ አርቒሰውድ።

ፊፋቱ ሰቭ ፋፅምዘተ ኮሚቴ ሊጘ እምትዝ በውግ ፃድቅዘው ቃወነይዝ ሲርየ አኽጉረኒዙ ልኰ ኳስ ደረጀ ጎንዝ አውሮፓስ 12 ክለቫን ሲትፍሽጛንስ ዊስንሻንድ ደቡብ አፍሪካስ ቈሽ ሰውጠ ክለቫን ሲትፍሸቁ አጘኲ።

ኤዥያ፣ አፍሪካ ፣ ሰሜን አሜሪካ ስመ ካሪቢያንቱ  ልኰ ኳስዙ ፌደሬሽን ቈሽ ጝታ ላው ላውድ ሲዘ ክለቫንዝ ደርግቭሽጛንድ  ኦሽኒያ ስመ  አስለተ ኻግርሸንስ ላው ላው ክለቭ ማሪስጘኲ።

አፍሪካ ግብጹቱ አል አህሊ፣ ደቡብ አፍሪካቱ ማማሎዲ ሰንዳውንስ፣ ሞሮኮቱ ወይዳድ ስመ ቱኒዚያቱ ኢኤስ ቱኒዝ ጥቅለዝ ሲዘ ክለቫንዝ ደርግቭሸች፡፡

ዋርደድ አሜሪካ 12 ስታድየመኒል 11 ኻትሚል ፃጝሽተው ብዘነ ቲክርክረ ሲን 07/2017 ዓ.ስዝ ኪርምሸው አቓንድ፤ ላው አርፈዝ እግርገ ኻምል 5/2017  ኒው ጀርሲ አሰነድ ችጘው አቐኲ፡፡

ቲክርክረይዝ ማልን ዲቈነው ዋርደድ ስረንተቁ ጓነን እንቅ ሲትፍሽንዙ ኪፍልሽን ችጘቁ አጛንድ፤ቲክርክረይል ፃይጘው ፋፅምፅመይዝመ ዊንተይዝ አጉረው ጊንዝቭ ችጘቊም አጘኲ።

ላው አርፈዝ ዚልቀው ቲክርክረይዝ ችጝሸው እንቅም ትርፍድ ሲትፍሸጥ ክለቫኒዝመ ፊፋ ልኰ ኳሲዝ ጅሉዘ ሰራሽተቁ እፍርትዙ ሰበኒዝ አድልሸው አቐጘዝመ ገረደድ ላውም ዶላር ጝ ካዝነይዝጎ ድዋው አቐነውድም ጋልፅኩ።

አልምቱ ወንጨይል ሲትፍሸቁ ጓነኒዙ ሚከረንጥድም፦ 2021ስ ኪርም ዲቈቊ ሲዘ እምተኒስ ኮንፌደሬሽኒዙ ኽየተ ክለቨን ቲክርክረ ኻቐቊዝመ ክለቫንዙ ደረጀዝ ቺዘቁ ጛይ።

ሲዘ እምት ጨቨቅ ፃጝሽተው ቲክርክረይዝ ፊፋ ኻቐተ ጓነይዝ 125 ሚሊዮን ዶላር ቈደ አስለነውድም ፊፋ ፊሰው ሚዝረድ ቓሊሰኩ።

ኪሮስ ወ/ተንሳይ

ሲን  15/2017