አሜሪካቱ ፕሬዝዳንትድ ዶናልድ ትራምፕ እስራኤል ኢራንቱ ጥቅለተ ቃወተድ አያቶላህ አሊ ኻሜኒንታት ቁወናንስ ፃይር ዊንደው ኻለይድ “ቀሰው ኻለይ ዊንየውም” የነውዝ ኻሰቭድ ለምርት ችጝየው አቐነውድ አሜሪካትቍ ብጭቕ ዲምቅሸንጥድ ዚግቭጝኩጙ።
እስራኤል ኢራንትል ፃቭረው ዊተድሩ ዝምረድ ጝር ፅብኒዝ ኻደገ አቐነዊዝ አቐጘድ ጋልፅረይሸን እስራኤል ኢራንቱ ኒኩሌር ቃወ ግቭርድ ድሰነዊስም ከስጘዝ ኢራንትል ስረትዙ ልውጠ ነሰናንስ ኻሊሸው አቐጘድም የጝ እስራኤልቱ ጥቅለተ ሚኒስትር ቤንያሚን ኔታንያሁ ዊግትጘውድ። እስራኤል እንዝ በውግም ኢራንቱ ኽዝቭ ቃወተድ ጝስልጣኒስ ጉጠጘድ ጭጝን አልሰነውድም ዘስክርሸው አየውም።
ኢራንቱ አጉረው ቃወተድ አው አቐጘዝመ ኻግርሸንትል አወየው ቃውንዙ ስረት የጝ ቲክነውድ? የውድ ሚሪሸውዝ እስራኤል ሚዝረድ ቲክነዊዝጘድ እቑረች።
አያቶላህ አሊ ኻሜኒ አ.እዝጘ 1979ዝ ፃቭሽተው ኢራንቱ አቭዮቲስ እግርገ ሊጘትረ ኻግርሸንቱ ቃወተ አጛንድ 1989 ዓ.ስቑቲስ ኪርም አጉረው ቃውንዙ ስፍረይል ችጝሽጘኩ። ውሸብል ኢራንቍድ ጝታጊስ ቢዘ ላየ ቃወተ አርቓቍ አቐነውድም የጝ ዊግትጘውድ።
ስልጣንዙ በን ፃየቍ ኻይላን ኢራንትል ፅበነውድ አርቕሽተው አቕሽም አያቶላህ አሊ ግነ ማኽሊል ጎየቍ ቃወተ ጛይ ይሽትጝኩጙ። አጉረው ስልጣን ጉሬዝመ ሚንፍሱ ቃወተድ ኽዝቭዙ ፖሊሲ ኻለያንድ ማለነው ዊንም ፃድቅዘነው እንዝጘም ኢመነውዝመ ጊምዘነውዙ ስልጣን ጝታ ናኒል ጭቑ ችጝሽረይ አቐነውድም የጝ ዊግትጘውድ። ኻሜኒ ኺረይ ኢራንቱ ቃወተዝመ እስለሙ አብዮቱ ዘቭ ኻይልድ ጥቅልዘቍ አቐነዊስም ከስጘዝ ኻግርሸንቱ አጭነይዝ አይነተ ቃወተ አጛንስቅ ፃይጘው ስልጣንድ ቀለው አየው አቐነውድ የጝ ጋልፅሽተውድ።
የመንትቍ ሁቲያንድ እስራኤል ጋዛትል ፃቭረው ጠቃዝንድ ቃውምሸነውዝ እስራኤልትል ጠቃዝን ፋፅምጛጙ አቐጘድ አርቕሽተው የጝ እንዳይ ኻምዘጥዙ ሲግረይል ኢራን ፅብረጘድም የጝ እስራኤል ኪስራጙ ፅብረውድ።
ኢራን ጝር ጋቢዝ እስራኤል ችጝዝራጙ ፅብረው ጠቃዝንድ ዚረ ድሰነዙ አቓንስቅ እስራኤልትል ምፅነ ፈራቐው አቐው ሚሳዔል ዝመ ድሮንዙ ጠቃዝን ችጝዘነውድ ኻዲረይም። ሊጘ ኻግራንድ ላውድ ላየድ ኪሰነውዝ ዊነው ቃላንዙ ጣይትንድ ፈራቓጙ ፊር ነንቱ ሰቲዝ አራሰውዝ ጣይትኒል ጥውሽተት ፅቃ ግርቅ እጊሰው አቓንድ፣ እስራኤል አጉረቍ አጭነዝቍ ቃወጥዝመ ሙየ ጒጥድ ቅውረይ አራንድ ነን ቈሽ ኻግርሸንቱ ቃወተድ ቅወናንስ ፃይረው ኻለይድ ግነ አሜሪካስ ለምርት ችጝየው አቐነውድ የጝ BBC ዚግቨውድ።
ንጉሱ ማሩ
ሲን 15/2017
