ምጝግስትዝቊ ቺተቺተቊ ሰቭዝቊ ዲቈጥዝ ምላሰን ኢትዮጵየትል ፅበው ወዬዙ ኪብርንድ 32 ላይስ 13 ላይዝጎ ጊመነውድ ደግምግመዝ ጋልፅሽተነውድ አስክዝሽተኵ፡፡ እኒስ ዲቈውዝም እን እግዘድ ሊጘ አሀዚስ ላው አሀዚዝጎ ጊምዘናንስ ፍራትዝ ሰራሽታጙ አቐነውድ ጋልፅሽታጙ የጝ፡፡ ኢትዮጵየ አቒል ፍራትዝ ችጝሸው ፅብንዙ ኪብርንድ ቀላንስ ምጝግስት ቃውሰተ ዲቊትነይ ፅይኩ፡፡ እኒን ጝዲቊትነይድ ፈናንስም ዚርፊዝ አውግረው ዲዝጝትዝመ ቸልት ፅየቊ ዜገን ፍልውልውዘነው ኻይሽተኵ፡፡
ፖሊሲስ ኪርም ቺተቺተቊ ኽግዝቊ እርውዘንጥ ፃቨነውዝ ፊሰተ መለንድ ቲክንጠ ጥውሸኩ፡፡ ጣቂዝም ጥወርዙ እርውዘነ ፃቭጠ ኻስቭ ኽዝቭዝቊ ደርግቭሸጥ ምኽር ጝንዝ አልት እርውዘነ ፃቭሽተው አቐነውድ ጋልፅሽትኩ፡፡ ጥወርዙ አኽቨነ ረቂቅ ቕየድ ምጝግስት ሰራሸተዙ ፅብንዙ ጥቕዘድ ቀልዘናንስ ምኻየ ቆሸነው ጭቑ እርቫነ እጀው አቐነውድ ልብተነውዝ ጥወርዙ ምፅነድ እርዉዘነዙ ሰቭ ሰራሽትጠ ተሚሰኵ የቊ እቅዙ ንቕፀድ ቈሻጙ ተርኩ፡፡ እማንም እኒን ፅብንዙ ችግሰድ እኪርጠ ቸለውድ ምጝግስት ሚርየ ይው እክሰነው ቸላንድ ጭቑ የጝ፡፡
ሚኒስትረንዙ ምኽር ጝን 2018 ዓ.ስ በጀትድ ፃድቅዝ ኽዝቭዝቊ ደርግቭሸጥ ም/ጝንዝ ዲቊስኩ፡፡ ጊንዝቭዙ ሚኒስትርዝ ምላሰን ምኽር ጝንዝቊ አቫላኒዝ አቭራኽርኽዘነ ይውሽትኩ፡፡ ፋጥርንዝመ እጅር ተስር ችግሰንዝ ምላሰጥን ቖይሸቊ ዜገንድ ከቭሰነው ጋቢዝ ሰራሽትጥጘ ጥውሸቊ ገበንድ አልትጝም ኻለይዝ ፃይሽጛንስ አቭላይተ ፃቭሽትኩ፡፡ እንዝም ሲርዬ ኻግርሸንቱ በጀትድ 1.93 ትርሊዮን ቊርሻን አቕ አልታንድ እን አቒስ 1.2 ትርሊዮን ጊንዝቭድ ገርየኑ ፈንዝ፣ 315 ቢሊዮን ቊርሽድ ክልልዝቊ ምጝግስተንዙ ከቨዝመ 14 ቢሊዮን ቊርሽ ቈሽ ዚልቀትነይ ፅየቊ እፍርትዝቊ ሰበንዝ ፋፅምዘነ ከቨል ግሬኩ ይሽትኩ፡፡
ኢትዮጵየ ፍጥሩ ፃጀንዝ ቀቫሽረይ ኻግር አቕር ጽብራጙ ድኽትዝ ጭጝሽረይ አቐነውድ ቃውኒስም አንወ ፋጥረው ገቭ አቐነውድ አስክዝሽተው የጝ፡፡ ጫረዝመ እየዝ እንቅ ጅውነይል ጊመቊ ዋርብድ፣ ስወዝመ ሚንወዝ እፍርደቊ ዝብድ፣ ንቕፀው መአድነን፣ አፍሪከዝ ማርፅሽተጥ አቐቊ ቱሪዝምዝቊ ዊትረንጥ፣ኢንዱስትሪዝ ግሬቊ ጥወረን ቀለውዝ ችጘነው ቸልነቊ ስፍል ፅይን፣ እንቂስቅ ዲቈውዝ አውግረው እጅርዙ ኻይል ፅይን ዚምነንዝ ጨውንዝ ፅበነው ኻዝንሰው ገቨ አቐነውድ ልብትን ሚንውትዝ ሰራሽነ ጥውሸኩ፡፡
ፅንኸል ሲርዬ ፃቨው ኢኮኖሚዙ ፖሊሲ አርውሸነውዝ እጅርዙ ኻይልድ ፍጥሩዝ ነይሽትነቊ ፃጀኒጅቅ ፃምርሰነው ቸልሸውዜ፣ ኹረዝ ይናቕመነት ቸለነው ቸልነውዜ ላጢዝም ቲርፈነው ቸልነቅ አቐነውድ ቓሊሰነው ቸልሸኩ፡፡ ኻግሬቱ ፃጀድ ሚንውትዝ ጭሰጭሰነው ቸልሸውዜ ድኽት ሲጘ አቓው ጒደነ እጀውም፡፡ ምጝግስትም በጀት ገርየነው ጭቑ አቒጝቀ ውርል ግርዩ ይን እግዝግዘነው ቸለውዜ እጅጝዝ፣ ማኽለኘዝመ ሊግዘው ጊዝ አቒዝ ነን ቓሊሽተው ችግሰይስ ፈነው ቸልሸው አቓንስቅ ጝሚርየድ እንል ፃቭጠ ጥውሸኩ፡፡
ወንድሙ ቸኮለ
ሲን 15/2017
