ሥነ ጥቨቭ ንቕፀው አይንት እጅር ኹርዙ ፃቭንድ ጥቅልዘው የጝ። ቓልሽትጛንስመ ድምሽትጛንስ ሙየዝ ቓልሽተቁ አቕንተን ጛይ። ሥነ ጥቨቭዙ አይንተንድም፦ኪነ ጥቨቭ፣ኪነት፣ሥነ ጽፈሽ ይሽትጝ ሻቘዝ አድልሽጘኩ።
ኢትዮጵየ ሻቘ ሽኽ እምታኒስ ንየ ከረው ስነ-ጥቨቭዙ ሲጘ ፃይረጘድ ፅንኸን ቓሊስጘኲ። እንዝ ቈሽ ኢትዮጵየቱ ኦርቶዶክስ ክርስትነዙ ምከን አጉረተ ችጘር ፃይረይ አቐነውድ ሚዝርደቁ ጝነ ምከንጣንዝመ ገዳመን ጨቨቅ ግድግደይል፣ ኻይማኖቱ ድርሳናቲል እንዝጘም ቃኒል ሲልሸቁ ስለን ችጝሽጘኲ። ዚምን ከርጝ ነንት ጊርቂል አሽ ናን ይዊንቀት ችጝሽጘኲም።
ስልዝ ይና ወይሰድ ጋልፀነው ቸልናንስቅ፤ ስል ቈጝቈ አቐነውድ ደድስነኩን። ነንትኰሪዝ ቱሪስተን ለውርድጘቊ ስፍልድ ይና አቅሊዙ ስነ-ጥበብዝመ ኪነ-ኽንጸዙ ቸልትድ አሩሽጝ እቑርጘው ደፈድ የጝ።
ስል የነት ቀለምዝ ሰሌደይል፣ እርሰስዝ ዊንም ላዘ ገቨዝ ተሲት እልዝ ቓለነውዝ ጭቑ ልብተናንስ ቸልሰው ጥቨቭ የጝ። እልዝመ ሚንፍስዝ ይው ጠራቕኒስ ከስጘ ላው እቀ ኽቭርዙ የውም ኪነ ጥበቡ እጅርዙ ቓለድ ሚርየኩ ይሽት አምንሸኩ። አቐነዊዝም ዚምኑ አልሚስ ቺተው ታኽንኽነ ይውሽተው እጅር ኹርዙ ጥቨቭዙ ቲግቭር የጝ።
እድወ ንጭቱ ይና ዲቭየይዙ ሚርየድም ወይ ኽምረ ብሔረ እቅ ጭሰጭሰን ሳቁጠ ኻትመ ችጝሸው ሲለተጅቅ ፃቭሽተው ዊንተድ አንቭቭስነ ቀኑን።
እኹርሸውድ ኮረም ኻትመይል አቕሽም፤ እፈርቲስ ኪርም አርቕቲል አሽ ሳቁጠ ኻትመ የጝ ሊግዘውድ ክንደውድም። ስልዙ ጥቨቭ መል ሲንቀስ ኪርም ይውሽተው አቓንድ፤ እኒንትም ዚምኑ ክንድጝዝ ዩኒቨርስቲ ጥው ዲቭርዘነው ቸልኩ። ነንቱ ሰቲዝ ጝ እቻቐው ጊዝድ ሰልዙ ሰቭል ግሪሰኩ፤ እፈርዝመ አርቐጥድም ስልጠነ ይወኩ። እን ውሸብለድ ሲለተ መዝገበ ልዑል ታከለ ይሽተኩ።
ይና ዋቕረድ ኪብርዝር አቭኑሸነዊዝ እቀጘ ሚዜንዘኩን።
ያንም ኪብርዝርን ይሰቭድ ላጢዝ ክንስጡ ይርን አቭኑስርናንስቅ ሚዜንዘኩን።
ስልዙ ጥቨቭ አውን ኪርምሩ?
ስል ክንድጝዝ ጭቑ አይንቀት ይውንዝም ተረው የጝ፤ ይቕመትም እንዝ የጝ ቓለርድ። መል ሲንቀ ገነ ሻቘትረ ክፍል ፅባጙ ሲለነውዙ ዲዝጝዝጘ ፃቫጙ ዊነነውድ አስክዘኩን። ይ አቅልድም መጝግስትዙ ሰቭተጥ አቐነዊዝ በነው ገቨድ ልብተነውዝ ከቨ ፃቭጛጙ ዊንጙ። አርቕሽተቁ ሲለጢዙ ሰበንድም ተክዝን ሰራሸናንስ ሚኩረነዊስ እግርገ ያቅም ።
ስልዙ ሰቪዝ ክተከድ አው የጝ??
ንቕፀቁ ኻይማኖትዊዝም አልሚዝዊስም ሲለጥ አርቐኩን። ሙየይል ኒቪ ጭሽጠ ማጥን፣ እንዝጘም ዲቭርዝጨጘድ ፃቨቁ እኩጙ የር ኻስቨቊስ ተክዘዝ ዚምኑ ስሊዝ አልምቱ ሎሬት ሜትር አርቲስት አፈወርቅ ተክሌ ቅዱሳን ስላኒስ ቈሽ አለቃ መንግስቱ ቸርነት ይግስ ኽየው ስፍረ ይወቊ ማኽሊስ ጛይ።
ስል ክግስ ወረጘ የጝ?
ስል ይግስ ቓለውድ፣ ድምሰውድ ምርቅዘው ወይሰ የጝ። ስልዙ ጥቨቭ ኹሪስ ኹሪዝጎ ከረከረው፤ ኰሪዝ ዊነው ገረዱ፣ ኮኖሚው፣ ፖለቲኩ፣ ባኽሉ ዝመ እምንትድ ቓሊሰው ደፈም የጝ።
ክቃውሰተ ስዕልድ ወረጘ ዊኑ አስክዝረኩመ?
ንቕፀቁ ዚምናንዝ ስላጙ ቀዳጙ ዊናንስቅ ቃውሰተ ይሰቭድ አስክዘነው ቸላቅም። እን ፍጥርዝ ችጘው ይመክሊትድ ዚምኑ ክንድጝዝ ዲቭርዝጭዊል አሽ እኒንት የር አስክዘው ስዕልዙ አይንት እጀርም።
ስልዙ ክንድጝድ አውል ክንድሩ?
ፅዮኒዝም አርት ዊንም አይከኒክ አርት ዚምኑዝመ ኻይማኖቱ ስልዙ ክንድጝ መቐለይስመ አዲስ አቨቨ ዩኒቨርስቲየኒል ስልጠነ ፊስኩን።
ወይቱ ጅውነይል ስል ጅቨነውዙ ዲዝጝትድ ውር ተካን?
ስልዙ ሰበንድ እቀጘም አርቕት ይውሽትየው ወይቱ ጅውነይል አርቕት ችጝጠጘድ አጉረውዝ ልቕረም ፃቭኩን። ቃውሰዝ ዚምኑ ስልዙ አውደ ርዕይ ቃውሰተ ጥቅለተ ሚኒስትር ታምራት ላይኔ ችጝሽጘዊል ፃቨነው ቸልኩን።
ሊጘትረድ ቈሽ 2017 ዓ.ስ “ዝክረ ቅዱሳን” የው አውደ ርዕይ ወይ ኽምረቱ ኻግረ ስቭክት ሊቀ ጳጳስ ዝመ ሲኖዶስዙ አቫል አቡነ በርናባስ እንዝጘም ኻትመ ጭሰጭሰኒዙ አጉረተ ቃወጥ ችጝሽጘዊል ቅዱሳን ስለኒዙ አውደ ርዕይ ቓሊሰነውዙ አገነ ችጝኩን።
ስልዙ አውደ ርዕይ ፃቭረው አለመድ ወረጘድ ሲርየ ፃቨው የጝ?
ላውድ እቀ ኽቭርድ ስልዙ ጥቨቪል ፃየው ልብትንድ ሊግዛንስ ፃቨነው የጝ፤ ሊጘትረ እን ጥቨቭዙ ሰቭድ አርየል ግርየው አቐነውድ ቓሊሰናንስ የጝ። ሻቘትረድ ቈሽ ስልዙ ክንድጝ በነቁ እቀ ኽቭርዙ አድላኒስ ስልጠነ ይወር አቐነውድ አርቒሰናንስ የጝ።
ስለንድ ቓለቊድ አወየው ቓለ ይውጘኩ?
ይሰበንድ ንቕፀቊ ኽየ ኽየቊ እቅ ልወርድጝኩጙ፤ አይዝዃች አትርም ይጘኲ።አነጚ ቓልጝ አንክርሸነዊስ ከስጘ ጅቨነውዝመ በጀትዝ ከቨነው ጋቢዝ እዳቐው ገቨ እኩ።ሙየይዝ ይውሽተው ክቭርድም አቕሽ ሳስ የው የጝ። እኒን ቓቪራንስም የጝ አውደ ርእይ ፃቨውድ።
ጥወርድሰ ውርተካን?
ቃዚ ፊጣቅ የነውድ የጝ ጚ፤ ስልዙ ሰቭ ኪሰረ እጀውም፤ እቀ ኽቭርድ ነን ነን ዊትውዝም አቕሽ ልብታጙ የጝ። ፅቃ ሽኺስ ኪርም ምፅነይዝጘድቅ ስል ቅይሸኩ። ምከንዝ ይውጥጘ በነቁድ፤ ቈድንዝ ተከተከ ስል አዘነውዙ ዲዝጝት ክንሻጙ የጝ። ምከንጣንድም ኩንትራት ነየነውዙ ዲዝጝትድ ሊግዛጙ የጝ።
ስል ሲልሰነው ጭቑ አይንቀት ሲለተ አቐናንስም ክንድጝ ቲክንክነቁ 15 ክንደጥ ፃቅኩን። እን ክንደጢዝ አርቐጢስ አርፈዝ ዋልጠ ላ እፈሪዝ ሲዘ ላ ቁርሽ ኪፍልጘኲ። እኒንት ፃቨውድ እጅር አርቓንስመ ጥቨቭድ ልብታንስ የጝ ጚ ጊንዝቭድ እፍሰው አየውም።
አሰነይዝም ሚዝየነ አልስረቁ አካላን ፅብጝሽ አገነድ ነቅጨመ?
ወይ ኽምረ ኻግረ ሲቭክትዙ ሊቀ ጳጳስዝመ ሲኖዶስዙ አቫል አቡነ በርናባስ፣ሊቀ ሊቃውንት መዝገበ ቃል፣ክንሰተ ጳውሎስ ይጋቢል አቕጝ በርታዘቁ አቐነዊዝ እቀጘ ሚዝየንዘኩን።
ኪሮስ ወ/ተንሳይ
ሰኔ 30/2017
