ሰረው ስውርጠዙ ዚረ ጅቭሸዊዝመ ጊቭርትድ ቂሸዊዝ ማፅንፅንሸው አየውም ይጛንድ ጊቭርዘጥ ዊግትጙ

ወይ ኽምረ ብሔረ እጭሰጭሰን አቨርገሌ ወረደ ሰረው ስውርጠዙ ዚረ ጅቭሸዊዝመ ጊቭርትድ ቂሸዊዝ ማፅንፅንሸው አየውም ይጛንድ ጊቭርዘጥ ጒዝጝ ጨጥ ዊግትጙ።

አት ሰብኔ ክሃሳይ አበርገሌ ወረደዝ 01 ቀቨሌዙ ፅበተዝመ ሚንወዙ ሰቭል ውላቐቊ ጒዝ ጨተ ጛይ። ላው ፅምርዝመ ግቨር አቐው ሚንወል ሰረው ስውርጠ ፊዝጝ ላው ላ ሽኽ አሽ ቁርሽ ፊስጝ 40 ኩ/ል ጊቭርዘነው ቸልጝኩጙ፤ አነጚ አርየድ ዘትለነዊስ ኪሎ 15-20 አሽ ቅይሽ አይነተ ቁርሽድም ዊሰነው ቸሊጘጘ ዊግትጝኩጙ።

“ጥላ፣ማርፅሽተው ዚረዝመ ኻውየተ ምጝግስትዝ አልታጙ አየውም” የቁድ አት ሰብኔ ጝጭር አርየዝ ጅቨነውድ ቈሽ አጉረው  ኪሰረል ሊቭጥጘ  ምላሰን አቐነውድ ጋልፅጝኩጙ።

ጥቅለዝ ሺምትጘዊዝመ ጭቅሽጘዊዙ ወየድ ማፅንፅንሻው አቐነውድ ጉየቁድ አት ሰብኔ፤ እን ችግሰድ ቓቪርጠጘድ ሚሪሸቁ ምጝግስትዝቁ አካላን ትኩርትዝ ሰራሽጝጠ ጡሸጘም ኻስቭዝጝኩጙ።

ላየ ቓለ ነየተ አት ሙሉ ፀጋየ ጝታ ጋቢዝ ዋልጠ ሄክታር ጒዝጝ  ቀሰው አቕንትዝ ፍርዝጝሽም፤አርየዙ እፅቁፅቈ ፋጥርጫቅ የነዊዝ ኪሰረዝ አጋልሽተነውድ ዊግትጝኩጙ።

ስውርጠ ጝ ባኽሪዝ ችጘው ኰሪስ ኪርም ጭቅተ አርየል ፍየውዜ ጨቅሸንትጘ ጉየቁድ ጒዝ ጨተድ፤ አርየ ደሚትጥዊል አሽ ዊንዘነ ስፍረ ዊንም ኻክመነ ኬሚካል ፅብሽም አርሽነይ ጽ/ጝንድ ሚሪሸቁ አካላኒጅቅ ዊግሽ እክሰ ነስጠጘድ ዋቕርጝኩጙ።

“ምጝግስት ማርፅሽተው ዚረ፣ቺዘው ጥላዝመ ኻውየተ አልሳቅ የነዊዝ ጨቅሸው ዚረዝመ ጥላ ኪብረው ወየዝ ጅቭናጙ ኪሰረዝ አጋልሽትንኩኑን”ይጛንድ ጒዝጨተ ሙሉ ጋልፅጝኩጙ።

ምጝግስት ኪስረቊዝ ማፅንፅንሸው ወየዝ በንሽተቁ ገባንድ አልሰነውዝ፤ አርየም ሚቸሚችዛን ጊቭርትድ ብክንቲስ ቓዝጡ ይጝ ኻስቭጘጘም ጒዝ ጨተድ ዊግትጝኩጙ።

ዊዝር መሰረት ወልደየስ አበርገሌ ወረደ አርሽነይ ጽ/ጝን ዲቈተ ጛይ። ወረደይል ስውርጠ ጊቭርዘጥ ኪፍየው ኪሰረዝ ፃቭሽትጝ ዊነነውድ አምንጝ፤እንዙ ምላሰንድ ቈሽ ተከተከው ጊዝዝ ተከተከው ጊቭርት ጊቭርዘነው እንዝጘም ድጎመዙ ኻውየተ ጥውሸውዝ አልታቅ የነዊዝ ጝጭር አርየዝ ጅቨነውድ አቐጘ ሚርይጝኩጙ።

አርየዙ እፅቁፅቈን ፋጥረናንስ ሚኩርሽ ዊንሽም ፃውተይዙ ችግሰድ ፀጋ አቐጘ ዳቕስጝ፤ ተረቲዝ ዲቈዊስ ክንድጝ ፊሰነውዝ ጒዝጨተድ ቺተቺተቊ አርየል ትኩርት ፃቨቁ አትክልትዝመ ፍረምረ ጊቭርዝጛንስ ቸልሰው ሰቭ ሰራሽታጙ አቐነውድም ዲቈተየን ዊግትጝኩጙ።

እኒጅቅም ፃየፃይስጝ ማርፅሽተቁ ዚረዝመ ጥላ ውሸብል አልስጛንስ ፃቭሽታጙ አቐነውድ ጉይጝ፤ ካፒታልዙ ውስንነይዝ እንቅም ጒዝጨተድ ጠራዘው አቕየጘም ጋልፅጝኩጙ።

ላየ ጋቢዝ ቈሽ ስውርጠ ዊንዘነ ስፍረዝ ማጥን አልተው ዋቕረይዝ ነንትል አሽ ኻስቭሸው ገቨ እጀው አቐነውድ ጉይጝ፤ ተረቲዝ እነየው ዲዝጝት ፃየቁ ችብረንጢጅቅ ዊግሸነውዝ ጒዝ ጨተድ አሩሸተ አቐው ጉግድቅ ቲክነቁ አቐነውድም ጋልፅጝኩጙ።

ኪሮስ  ወ/ተንሳይ

ሲን 30/2017