ጝጭሊዙ ቲነ

አበበ ቢቂላ ንኻሽ 30 ግርየ 1925 ዓ/ስ ሸዋ አውራጃ፣ ደነባ ቺተው ጭጝሸነ ጃቶ  ይሽትረይ ስፍረትል ጚር አት  ደምሴ ዓለሜ ስመ ጝኘዊዝር  ውድነሽ መንበሩ ቲስ እኹርሹ። ቢቂላ የው አይርዙ ሽጙ ጭጝሸነድ ችጘውድ ግነ ጝኘቱ ቃውሰው ግልወይስመ ሊግሰቁ አት ቢቂላስ የጝ።

ውሸብለ አበበ ጅውነይዙ ዲዝጝቲዝጘ አርቨኝነይዝመ ክንድጝል ውላቕ 12 እምቲስ ቅስነዙ ክንድጝድ አሱ። ሙሉ ሲንቀት ኪርም ገኘዙ ዋርደዝ አምኰረዝመ አርቕሽተው ዊነጘም ዊግሸኲ። 1944ዓ.ስዝ አዲስ አበባትጎ ፊረነውዝ ክብር ዘበኛ ዊተድርነይዝ ቃፅርሸነውዝ ገኘዙ ዋርደዝ ስፖርትድ ዲቭርዛጙ ዊኑ። እግርገም 1946 ዓ.ስዝ ጝቑርጅነ ዊዝር  ወይዘሪት የውብዳር ወልደጊዮርጊስት ድውጙ።

ኽደር  1948 ዓ/ስዝ 16 ትረ ሜልቡርንቱ  ኦሊምፒኪል ሲትፍሸው ኢትዮጵየቱ ጓነ ለምረናንስ ፃቭሽተው ጀረርተይል ጝታ ሲግስየይል ጝታ ኻግርቱ ሽጙድ ፃፍሸው ቺተው ፃርቀድ  ሲርጝ ጝታ ኻግርት ደርግቭጝ ቲክርክርሸቁ ውሸብልድ ቓለው ኰሪዝ ውርቑጠ ኲረጘዝመ ጘጝም ጛጘድ ደርግቭ ውጥየናንስ ዊስነጘድ ዊግትኲ።

እን ዚምኒዝ አበበ ብሔሩ ሰራዊቲዙ ጛስ ጛይቱ ቲክርክረይል ሲትፍሽ አኰ ሽኽዝመ 10 ሽኽ ሜትርዙ ውጠዝ ብሔሩ ክብረ ወሰን ፃየው ኰሪዙ ስፖርትዙ ጉለሸ ዋሚ ቢራቱ ስመ አበበ ማራቶንዙ ቲክርክረ ፃቭጛንድ ቓለተ ኽዝቭድ ዋሚ ቢራቱ ኻቐኲ የው ዊኑ ኻየውድ።

ዊቱ ኪሎሜትረንዝ እግርገ  አበበ ቢቂላ ይሽተው አርቕሽትየው ውሸብለ ውጠድ ቃውስ ቃዋጙ አቐጘ ኽዝቭድ ራድዮዝ ድምሱ። አበበ እን ውጠድ ቀለውዝ ኻቐነው ቸሉ።

ዋሚቱ አኰ ሽኽዝመ ፅቃ ሽኽዙ ሜትር ሪከርደንድ ኪለነውዝ አርቕሽታጙ ተሩ። እን አቕንቲዝ የጝ አበበ 1952 ዓ/ስዙ ሮማቱ ኦሊምፒክ ቲክርክርሸተነይዝ ማርፅሽተውድ። ጝ ኻግርቱ ቺተነ አልቨድ ሲር አልም አቅቨ ቲክርክረይል ሲትፍሸነው ኒቪድም ደድሱ።

ዊተድርነይዝ ፃቨው ስፖርትዙ ዲዝጝዝጘይስመ ቲክርክረይዝ ቲክንክንጛጙ ዊነቊ ስዊድንቱ ሳልጥንዘተ ኦኒ ኒስካነን አበበቱ ቸልትድ ልብትጝ ላጥ አትሌተኒጅቅ ዲዝጝዝጘ ፃቭጠ ፃቭጘውድ። ሮምቱ ኦሎምፒክድ ችጝጥዊል አሽ ሊጘ ሽኽ ሜትርዝ ንየ ሊግዝ ፃየቁ ቲረኒል ውጥያንስመ 1500 ሜትር ቲክንክነዝ ውጢጛንስ ፃቭጛጙ ዊንጙ።

ሮምቱ ቲክርክረይል ባዶ ልኩዝ ውጢ ሪከርድ ቺዝሸነውዝ ቃውሰተ ጝጭልዙ ኽየተ አትሌትም አቐነው ቸልኩ።እን ድሊስኒስም ጎው ጣልያንት ጋዜጠኝጥ “ኢትዮጵየት ዊረናንስ ጣልያን ንቕፀው ላ ሽኽዝ እጊተው ዊተድረ በቀኒስ ዊኑ፤ ኢትዮጵየ ግነ ላው ዊተድረ ጭቑ በርስር ዊርች” ይጛንድም ዚግቭጙ።

እኒንት ቲክንም ቢቂላ (Bikila) የው ባዶ ልኩ ተከው ፃቭ ተሲት አግልግለል ችጝሸኲ። ውጠይዝ ዋጥረጘም መፈንቅለ ምጝስት ፃቨቊጅቅ ሲትፍሽኩ የነውዝ ዊትቊ ኰረንም እፅውሽኩ።

ሊጘትረድም 1957 ዓ.ስቶክዮቱ ቲክርክረይዝ ኻቐነው ቸሉ። ጝዝ እግርገ ቲክንክነዝ ንቕፀቊ አልም አቅቨ ማራቶነንድ ለወትረዝ ኻቕኩ።

አበበ ጝውነ ዊዝር የውብ ዳር ወ/ጊዮርጊስጅቅ ከየ ሲሪ ሲዘ ኹል ፍርዘነው ቸለቁ አጛንድ፤ 1961 ዓ.ስዝ ቈድሸይ መኪነሸንትልስ ፍልውልዋጙ ኻደገዝ አጋልሽትኩ። ኻደገይዝም አኰ እምተንዝ ይውዝ ሳ ዲይንሽ  1966 ዓ.ስዝ እን አልሚዝ ክርጘዝ ቺትኲ።

ኪሮስ ወ/ተንሳይ

ሲን  30/2017