ኢትዮጵየቱ ትውፅውፀዝ አርወቊ ንቕፀቊ ኻለየን ማኽሊስ ግልፅነይ፣ ዲቊትነይዝመ ዋቕርሽነይ ማኸል ፃቨው አትረቊ ምኽርኽረን ፃቨነው አይነተ ዳቕሽተተ የጝ፡፡ ምኽርኽረንጥድ ሲትፍዘጥዝመ ዲሞክራሱ አቕጛንስ ቆሽ ቺተቺተቊ ኻሰቨንዝ አርቕት ይወነው ጥውሸኵ፡፡ ምንግስትዙ ስልጣኒል ፅበቊ እቅድም አስጝደው ኻሰቭ ፅየቊ እቅድ አልስጘው ድመድ ወሸናንስ አስልሽት ፃቨነው ተሚሰኵ፡፡ ኽዝቭድም ቀለውዝ ቺዘው ምርፀድ ቓለናንስ ቸልሰው አገነ ችጘኩ፡፡ ቅመተ ፓርቲዝመ ቲክርክርሸጥ ፓርቲየን ማኽሊል ፅበው ቺተንድ ዚልቅትነይ ፅየው አርወዝ ቃጥ ጊምግመናንስ ሚቸው አቐኩ፡፡
ኢትዮጵየቱ ብሔሩ ዳኽንነይዝመ አርወድ አውንም አቕሽ ቲክርክረዝ አልተው አየውም፡፡ ኢትዮጵየቱ ዳኽንነይዝመ አርወድ ኻይሰነዊስ ኒየ ውርም ቃውሰው ገቨ እጀውምነ እንቅም ኢትዮጲዩድ ጝ ቺተንድ ኽጉዝመ ዲግ አቐው ዲምቅሽንዝ ተሚሰው እኩሰድ ፃቨነው ጥውሸኩ፡፡ እን ጋቢዝ ኻግሬቱ ፖለቲከዙ ምህዳር አቒዝ ሲትፍሸቊ እንቅም ፖለቲከዝቊ ኻይለንድ ዚምነንዝ ልቕርድጘው ትክቨ ትክቭሸነዊስ፣ ሽክትኒስ ፍጝ ትውፅውፀው ፖለቲከ ፃጚሰነው ተሚሰኩ፡፡
ጣቂዝ ጥቅለተ ሚኒስትር ዓብይ አህመድ (ዶ/ር) ቲክንክነዝ ቺተቺተቊ ሙዬ ፅየቊ ደርግቭሸጢጅቅ አቭላይተ ፃቨነውድ አስክዝሽተኩ፡፡ እንዛይ ምኽርኽረኒስ ዲግዙ ብሽትንዝመ፣ ፅብንዙ ኪብርን፣ ደሞዝዝመ አርወ አርውሽን፣ ታክስዙ ቓፅቭንዝመ ላጥ ንቕፀቊ ዋቕርጥ ጒሽጝኩጙ፡፡ ጥቅለተ ሚኒስትሪጅቅ ፃቭሽተው አቭላይተይስ ቈሸዝ ክልለንዝም አቑ ኻትመ ጭሰጭሰን ደረጀዝ ቺተቺተቊ እቀ-ኽቭርዝቊ ክፍለኒስ ዋቕረጥ ጒሸነውድ አስክዝሽተኩ፡፡ አይንተ ፍር ገቨድ ዋቕርጥድ ጒሸነውድ ጭቑ አቒንቀስ ጒሸቊ ዋቕርጢዝ አቐው ዊሰ ይውሽትኩመ የው ገቨድ ቓሊሽትጠ ጥውሸኩ፡፡
ዚምነንዝ ትኩለልድጛጙ ተረቊድም አቑ አይጥ ችግሰንጥድ እኪትጛንስ ልቕረ ፃቨነው ተሚሰኩ፡፡ ምንግስት አዊስም ንዬስ ዲቈው ዲቁትነይ ፅየው ችብረ አቐነዊዝጘድ ጝታ ቸልቲዝ አርቕሽተቊ ቃወጥ፣ ሙዬ ጒጥ፣ ጥውሸውዝ ተገተግሽተቊ ችብረጥዝመ ዚምኑ ቴክኖሎጂዝ ከቭሽተነውዝ ኻግር ጭሰጭሰነው ተሚሰው አቐነውድ ኽገ ምንግስቲዝ ይውሽተው ስልጣን የጝ፡፡ እንዝም ሲርዬ ሰራሽተው ሰቭድ ጊምግመነውዝ እዳቐውድ ሰራሽትጠ ፃቨነው፣ ቀሰው ገቨድ አትርዘነው ዲዝጝት ፃቭን ቲግቭረነው ተሚሰኵ፡፡
ወይ ኽምረ ብሔረ እቅ ጭሰጭሰንድ ንቕፀቊ እምተንዝ ቑጠ ዊሰ ችጝየቊ ዋቕርጥ ፅየው ጅውነ አቐነውድ አርቕሽተው የጝ፡፡ እንዝም ምላሰን ክልሊልዙ ቃወተም አቑ ፌደራልዙ ቃወተ ጅውነይዘጎ ፊራንም አቑ ሲትፍሸተ እፃሽ አገነድ ችጛንድ ዋቕርየው ኰር እጀውም፡፡ አይነተ ፍር ገቨድ ብሔረ እቅ ጭሰጭሰኒዙ አይነተ ዋቕርጥድ ዊስንመ እኩኑን? ይን ልብተነው ተሚሰው አቐነውድ እንቅም ችጘር ጒጥ አካልድ አስክዝጠ ጥውሸኩ፡፡ እቅዙ ቀሰውዝመ ጭቓ ዊሰ ይውኒስ ሊቅሽነ ቸልነውድ አትረው ችብረ ፋጥረነው ቸልሻንድ አቐነዊዝ ይና ችብርጥድ ውር ቑጠ እቀ ኽቭሪዙ ችግሰድ እክስጝኩጙ? ይን እማንትዝ ዋቕርን እርውዘነው ይና ኻለይ አጠ ጥውሸኩ፡፡ እን አጠ ቸለውድ ቆሽ ኪብረኪብርሽኒል ሲርዬ ፃቨው ምኽርኽረ ዊናንድ የጝ!፡፡
ወንድሙ ቸኮለ
ሲን 30/2017
