ፅፅቀ ኻትመሽን ፈራረዊዝጘድቅ  ኤሌክትሪክዙ  ሺከ ችጘተፃቭሽታጙ አቕየጘ ጋልፅሽቱ።

ወይ ኽምረ ብሔረ እቅ ጭሰጭሰን ዝቛለ ወረደዙ አይነተ ኻትመ ፅፅቀ 24 ሰትዙ ኤሌክትሪክ አሩሸተ አረት 18 እምት አቕኩ፤ አነጚ ኻትመሸን ጊዝ ጨቨቅ ፈራራጙ ፊትርሽም ጝዝ ልክ ኤሌክትሪክዙ ሺከድም ትኒታጙ አቒየጘ ኻትመይዙ ፅበጥድ ዊግትጝኩጙ።

ዳኘው ወ/ኪዳን ፅፅቀ ኻትመ ቀጠነ 25 (ማንጎ) ይሽተው ኪዊል ፅበተ ጋልጽጛንድ“ሲርይቊ እፍርታንዙ ችግሰ ፃይነቅ የጝ። ኽይጠጘዝም ኤሌክትሪክዙ ቲነዝመ አቑዙ ችግሰዝ ልቕርድናጙ የጝ። ኤሌክትሪክ አሩሸጥ አይነቅ አቐነዊዝም ጂሰናንስም አነ ቲነዝ አሩሽነውድ ቃነ የጝ። እኒን ይና ኢኮኖሚል ጥቕዘ ጭሰነዊስ ከስጘ ፍጥሩ ፃጀይልም ኪሰረ ቲክንዘው አቕንት የጝ“ይጝኩጙ።

ሺከ ጥዋንስ ቲክንክነዝ ዋቕረ አልስንሽም ጝላው ላው እጅር 3 ሽኽ ኪፍላንስ ግደጅ ነይሽትንኩኑን፤ እኒን ፃይነው ኰርድ ኽረ አቐነዊጅቅ ፃየፃይሽት እንቅም ኪፍልጥጘ ቸልየቁም። ዲግ ዊናን እጝቅም ስፍረይዝ ስፍረይዝጎ ፍልውልው ጥወር ችጘነዊዙ አገነድ ንየስ የው ዊኑ፤ አነጚ ችግሰንጥድ ዲርቭርቭሸነዊዝ ምጝግስትት ዋቕረነዊስ ከስጘ ዋቕርሽነውድ ኪፍልነ ቸላይንም።

እንዝም ሲርየ ጭሰጭሰን ምኽር ጝን፣ ቃወ አስልን(መሪ ማዘጋጃ)፣ኤሌክትሪክ አግልግለ ይወነ ጽ/ጝንጢል ፊርንሽም ኪፍሊርነውዜቅ ክታ ዋቕረይዝ ዊሰ ነያይንም ይሽትንኩኑን።

ላየ ቓለ ነየተድ ቈሽ ክንሰተ አዝመራው ደሳለኝ “ክንሰተ ኻር አንቭቭ ቀሰው አቕ አስልሽጠ ጡሸኩ፤ አነጚ ይን ጎግል ፃቨናንስም አነ መፃፈን አንቭቨናንስ ቸልሰው ቲነ እጅነቅ አቐነዊዝ ችግሰል የጝ ሊቭን ፅብነውድ ይጘት ግረ። እን ኪዊል ጭቑ 65 ንየ ክንሰጥም ፅብጘጘ ጋልፅጝኩጙ።

ፊስጥን ይሽትጘው ጊንዝቭድ ፃየው ፃየውድ ፊሰነው ቸለጘ ጉየቁድ አዝመራው ደሳለኝ አቅም እጀቁድ ዘገም ይጝ ኪፍልጘው አቕንት ፋጥርሻንስ ሚሪሸቁ አካላኒስ ዋቕረ አልሰነውድም ሚሪጝኩጙ።

“በንሽተው ጊንዝቭድ ኪፍልሸውዜ ላው አርፈ ጊዝ አቒስ ዘርጋቕን ጝንጨቨቅ እግዘተ ቲክለነውዝ ሺከዙ አሩሸተ ፃቨነው ቸልነኩን”ይጛንድ  ዝቛለ ወረደ ኤሌክትሪክ አግልግለ ይወነ ማኸል ሰቭ ፃጝዘተ አት ጌታየ መሰለ ጋልፅጝኩጙ።

ሰቭ ፃጝዘተድ ይጛንትጘድ ኰሩ  እክሰ ይወናንስ ፅፅቀ ቴክኒክ ዝመ ሙየ ሳልጥንዘነ ኮሌጂል ፅበው ትራንስፎርመሪስ ዊትረናንስ ፅንኸ ፃቭሽትሽም፤ አኰላ ሜትርዝ ንየ እክልደነዊዝ እሩድየው አቐነውድም ጋልፅጝኩጙ።

ስታንዳርዲዝ ቢዘ ሰራሸነው አርወይስ ቘጨድ ኽየው አቐነውድ ጉየቁድ ሰቭ ፃጝዘተድ፤ ዋቕርሽጘው ጊንዝቭድ ኪፍልጝ ጝታቕመቱ ትራንስፎርመር ቲክልሻን ዚልቀው አሩሸትነይድ ድሰኩም ይጝኩጙ።

“ቃውሸነድ የውድ 15% እቀ ኽቭሪዝ አኽቭሸው አቓንድ እዳቐው 85 ላይስ ንየድ ምንጝግስትዝ ሺፍንሸው የጝ፤ አነጚ ጛግስ ኻይሽተው ችጘርድ ፊንቀት ቀሰው ጭሰጭሰንዙ ዋቕረ አጠ ጡሻውም”የቁድ ቈሽ ዝቛለዙ ወረደ አይነተ ጭሰጭሰተ አት ታፈረ ሚሰነ ጛይ።

ላየ ጋቢዝ ቈሽ ቴክኒክ ዝመ ሙየ ኮሌጂሽ ኪዊዝጎ ፊሰነው ኽጊስ ቢዘ አቐነውድ ጉይጝ፤ ችግሰድ ቓቭዘናንስ “ይን ኽጉ አየው ጉግዝ ዊትረናንስ ሚኩርናን ለወትረ  ችብረድ ኽየኽየቁ ማሽነን ፃየው አቐነዊዝ ኻይል ፅጎኩ፤ ሊጘትረድ ቈሽ ኤሌክትሪክዙ አግልግለ ማኸልድ  ዋቕረው ጊንዝቭድ  ጝታቕመስ ይውሽተው ትራንስፎርመሪዝጘ አቐነዊዝ የጝ” ይጛንድ ጭሰጭሰተድ ጋልፅጝኩጙ።

ኻትመሸን ጊዝ ጨቨቅ ፈራራጙ አቐነዊዝመ ሲርይቁ እፍርተኒዙ ተምዝትድ ቈሻጙ ተረነውድ ጉየቁድ ጭሰጭሰተድ፤ማንጎ ሰፈርት ሚሪሸውዝ ግነ ምጝግስት ጝችጘ­­­­­­ሩድ ፋንስ አስልሸነውድም ቈሽጝኩጙ።

ኪሮስ ወ/ተንሳይ 

 ኻምል 15/2017