‎ሲብዙ ካንሰርድ ጥይሳቍ እቂልም አጋልዝጠ ቸለኩ።

‎‎ሲብዙ ካንሰር አልምትል ዲዝጝሸው ካንሰር አቓንድ ካንሰር ምላሰንዝ ተረው ክርጘይዝ አይነተ ምላስን የጝ።

‎አ.እ. 2022ዝ  2.5 ሚሊዮን አጥጘ እቅ ጽዉዘይዝ ፃይሸቍ አጛንድ 1.8 ሚሊዮንዝ ኒየ አጥጘድ ክርጝኩጙ።

‎‎ውርም እኳን ትንባሆጅቅ ፃየፃይሽተቍ ሲብዝቍ ካንሰራንድ አልም አቅቨ ደረጀዝ ፃቭሽተው ምርመረይዝ ንቕፀው እግዘድ ፃይጝ ችጝሽጝሽም፣ ሲገረ ጥይሰነውዙ ዲዝጝትድ ቃፅቫጙ ተረው ነንቱ ሰቲዝ ላየ ሲብዙ ካንሰር እስለነውድ የጝ ኻኪማንድ ችጝንኩኑን ይጘውድ።

‎‎ነንቱ ሰቲዝ ንቕፀቍ አልምትቍ ኻግራኒል ሲገረ ጥይሰቍዙ እግዘድ ቃፅቫጙ አቓንድ፣ ሲገረ ጥይስጝ አርቓቍ እቂል እስለው ሲብዙ ካንሰርዙ ምፅነድ ቈሻጙ ተርኩ። 10 – 20 ላይስ አጥጘ ሲብዙ ካንሰር ምርመርጥድ ቓሊስጘጘድ ሲገረ ጥይሳቍ እቒል እስለቍ አቐነውድ የጝ።

‎‎”ውርም ጥይስጝ አርቓቍ እቂል አጋልዘው ሲብዙ ካንሰርድ ቺው ሞለኪውሉ ባኽሪ ፃየው አቕ እስለነውድ የጝ ድቍሽተውድ። እኔንም ኽክምነዙ ውሳኒዝመ ፈንዝ ዳቐነው ቸልሸው የጝ ” ይጛንድ ስዊዘርላንድ ዩኒቨርሲቲ ሆስፒታሊል ካንሰርዙ ኻኪም አቐቍድ አንድሪያስ ዊኪ ዊግትጘኩ።

‎‎ምርምረይዝ ችጝሸው ማኽልዘተ እድምድ ጥይሰነውዝ ሲብዙ ካንሰርዝ  ፃይሸቍ እቂጅቅ ተከተከው አቕሽም፣ ሲብዙ ካንሰርዝ ፃይሸቍ ውሸብልድ ጝታ ሩሔዝ ጥይስጝ አርቓቍ አቐነውድ ግነ ደድሽትኩ። “30 ዝመ 35 እምት እድም ችጘቍ ሲብዙ ካንሰር ፃይሸቍድ ቓልናንድ ኺጠጘድቅ ጥይሰቍ አየቍም ” ይጝኩጙ።

‎‎ 1950 ንዝመ 1960 ዕምታኒዝ እቀጘዝ ዲዝጝሸው ሲብዙ ካንሰርድ ፣ ካንሰር ስኩዌመስ ሴል ካርሲኖማ ይሽተውድ ዊኑ። እኔንት ተከው ካንሰርድ ሲብ አቒል ፅበቍ ሕዋሳቲስ የጝ ኪርመውድ ።

‎‎ጝ አስጛዊዝ ቈሽ ጥይሰቍ እቂል ፅበው ሲብዙ ካንሰርድ እቻቐውዝ እቻቐው ይሽጠ ቸለው አቕንትዝ  አድኖካርሲኖማ (adenocarcinoma) የጝ ።እኔንት ተከው ካንሰርድ አኽተ ፍልፍልዘቍ ኽዋሳታኒል የጝ ኪርመውድ። ነንቱ ሰቲዝ ጥይሰቍዝመ ጥይሳቍ እቂል እቀጘዝ ዲዝጝሸው ሲብዙ ካንሰር አቓጙ ተርኩ።

‎‎አድኖካርሲኖማ ይሽተው ካንሰርድ ላጥ ሲብዝቍ ካንሰራኒዝጘድቅ ኺጠ ጊዝዝቅ ቺተውድ አጉረው ደረጀዝ ፈራቐት እግርገ የጝ።

‎‎ቈሸዝም ፣ ሲጋረዝመ ሲብዙ ካንሰር ማኽሊል ፅበው ሲጙ አቐው አትረው ዲምቅሽንድ ጥይሳቍድም አርቒጝቀት ምልክታንድ ላጥ ምላሰንጥጅቅ እፅቁጽቁስጥጘ ፃብስጠ ቸለኩ ይጘኩ  ዊኪ።

‎‎ሚዝረድ ዓልምቱ ትኽነ ድርጅቲስ ችጝሸው የጝ።

ንጉሱ ማሩ

ሐምል 15/2017