አምርስ እፈር ኲንሽጝነ

ኢትዮጵየቱ ፌዴራሉ ዲሞክራሱ ሪፐብሊክ ምጝግሥትዝ ክንድጝ ሚኒስትር ጋቢዝ  እንቅም መልቁ እፈር ክንደነ ክንሰነ ፃጝቲል በንሽተው አርቕት፣ቸልትዝመ ቓለ ዲቭርዝጝ ኻግርሸንቱ እንቅ ሊግዝትዝ ጝታ ችጘሩድ ፍጛንስ ቺተቺተቁ ሰበን ሰራሽትጝኩጙ።

ቓሊሰነዝም  ክንድጝዙ ዊርተድ ደድሰናንስ ላዊዝመ እርወነ ትኩርትዙ ሚርየ ፃቭ ቃውሰተ ጊዝዝ 1999 ዓ.ስዝ ጥቅለ ክንድጝዙ ዊርተ ደድሰነ ፓኬጅ ቃርፅሽት ቲግቭሪል ግርየነውድ የጝ ።

ቃውሰ ገርየኑ ክንድጝዙ ኢንስፔክሽን እርወነ አለመድ ችጝትነይ፣ እክሱነይ፣ጥውሽትነይዝመ ዊርተድ ደድሰነውዝ፤ ኻግር አቅቨ ተግዝ መልቊ እፈሪዙ አካልዙ፣አእምሮዙ፣ወይሰዝመ ገረደዙ ዲምቅሽን ሊጊሰነውዝ ገርየኑ ክንድጚዝ አስልሽጛንስ ፃቨነው የጝ።

ሲዘትረ ክንድጝዙ ዚርፍ እፍርትዙ አፅቨ  ቃውሰ ገርየነ ክንድጚል መልቁ ጡሸው ታኽንኽነ ችጘው፣አካሊዝመ አእምሮ ዲቭርዝጘው፣ተግ ጨቨቅ ጝታ ተምዝቲዝጘ ጝታ ቸልትድ ሊጊስጘው ክንድጝዙ ተግ የጝ።

ቈሸዝም መልቁ እፈር ተረቲዝ ሲትፍሽጘቁ ክንድጝዙ ተገኒል ሲርየ ማለውዝመ ክንድጝዙ ዊርተድ ቺዝሸናንስ፣ቀቨቊዝመ  ደግመቁድ ቃፅቨናንስ ቸልሰው የጝ። ችግሰድ ቓቭዘናንስም መልቁ እፈርድ ክንሰቁ ሙየ ጉይጥ  ፍርዘነውዙ ሰቭም ኮሌጀኒዝመ ዩኒቨርስቲየን ትኩርትዝ ሰራሽጛጙ ችጘሽጘኩ።

እንዝም ሲርየ ቃውሰ ገርየኑ ክንድጝ ላው አቐው ሰቭትንዝ እክሱነይድ፣ችጝትነይድ፣ጥውሽትነይዝመ ዊርተድ ኻይ አክኑሻንስ እንቅም ክልለንዝመ ክንድጝ ጝንጥ ቲግቭርጘው ኻግር አቅቨ  ቃውሰ ገርየኑ ክንድጝዙ ኢንስፔክሽን አስለነው ተሚሰትነይድ አምንሽኩ።

ንጭቱ ይና ዲቭየይዝም ወይ ኽምረ ብሔረ እቅ ጭሰጭሰን ዝቛለ ወረደ ዊከ ቃውሰተዝመ ማኽለኘ ክንድጝ ጝኒል ችጝሽን ቃውሰ ገርየኑ ክንሰተ ወልዴ ሚሰነቱ ክንደነ ክንሰነ ፃጝቲዙ ሚኩርንድ ሚሪሸውዝ ክንደጢዙ አቅሊጅቅ፣ ክንድጝዙ ሙየጉይጢዝመ ጝቕመቱ አንደቨቲዝ ዊግተውድ ንቨቭዝ አልስነ ቀኑን።

ዊዝር ሽምብራ ሽመልስመ ውበቱ መንግስቱ ላጥ ክንሰጢዝም አነ ጛቕመ ጝታቑርት ክንስጥጘ ፃቭጘው ልቕረይዝ ክንሰተ ወልዴቱ ክንደነ ክንሰነ ፃጝትድ ፈኑ ፃቨነውድ አንክርሰጘ ዊግትጘኩ።

ጝታቑርት ገርየኑ ክንደነ ክንሰነ ፃጝቲስ ቢዘም ኪዊል አፅንኽዘነውዝ ቃውሰ ገርየኑ ክንደጢስ ቢዘትቁድም ፈኑዝመ ደረጀዝ ፍጥጘጘድ ፃቨጘ የጝ ዊግትጘውድ።

ክንሰተድ እንቅ ክንድጝዙ አይንተንድ ልብትጝጠ ፃቨነውዙ ቸልቲዝመ ክንደጢዝም ጭጝሽት እፍሽታው ቺት የው ባኽሪ ፃየው ክንሰተ አቐነውድም ጝታቑሪዙ ባኽሪድ እጅጝ ጊዝዝ ላውጠነውዙ ጥቨቭ ፃየጘም ሚዝርድጘኩ።

“ይክንድጚዝ ደረጀዙ ክንደተ ዊኑን፤ አነጚ 12ትረ ክፍልዙ ማትሪክዙ ፈንድ ሳስ የውዝመ ዩኒቨርስቲ ድወው ዊንየውም። እንዝም ሲርየ 2007 ዓ.ስ መልቁ ታኽንኽነነው ስልጠነ ሳቁጠ ክንድጝ ኮሌጅ 10+1(ሰርትፍኬት) ፊሰነውዝ 2008 ዓ.ስ የጝ ክንደነ ክንሰነ ፃጝትድ ኪርመውድ” የነውዝ ጋልፀኩ።

ቃውሰዝ መልቁ እፈሪል ሰራሽትጠ ጡሸውድ ፃምረዝጘ፣አይር ኩየንዝጘ አልትጛንስ ፃቨነው አቐጘ ጉየው ክንሰተድ፤እኒን አቐውድም ላብጠ ድልቅተነውዝ፣ጅመዝ፣ዚቭንዝ፣ሲነዝ እንዝጘም ጝታ ቸልትድ ፊስጝ ምርቅዝጛንስ በርታዘነው አቐጘ የጝ ዋርዘውድ።

ክንሰተድ ክራር፣መሰንቆ(ዋጠ)፣አቲነዝመ ፒያኖ ቸለው አቓንድ፤ ጝላው ላው  ክንደነ ክንሰነ ፃጝትድ ስልዝ ዊንም ሙዚቀዝ ቀለመንዝመ እግዘንድ ቺይሰነው የጝ። ላየ ጋቢዝ ቈሽ ፃፈነው ዲዝጝዝጘውድ ቈድሸነውዝ የጝ።

“ኪርመነይስ ኪርም ክንሰቁ ክንደጥድ ገርየኑ ክንድጚዝጎ ጥወቁድ ሊጘትረ ተግ ክንድጝ ጝኒል አሽ 85 ላይስ ንየድ ደረጀ ፃየቁ ጛይ እንዝም ይሙየድ ቀንጨጘዝመ እቀ ኽቭሪዝ ለምርሽትነይ ችጝጨጘድ  ፃቭኩ” የኲ።

ክንሰተ ወልዴ  ምጝግስትዝመ ከቨጥ ድርጅተንዝ ሚዝየነዙ ሚዝረዙ ወረቂተን ይውሽተጘ፤ እንዝም ክንደነ ክንሰነ ፃጝትድ አትርዘነ ስልጠንጥ መጝግስትቁ አየቁ ድርጅተኒስ ችጘጘዝመ ጝሰቪዝ ቀሰው ፈን ሚዝግቭስጠ ፃቨጘድም  የጝ ዊግተውድ።

መልቁ እፈር ቲክንክነ ፃቭሽቲጘውዜ ፃይጘውድ ቃዝየውዝ ሚረነውዙ አገነ ፃየቁ አጘጘ ዳቕሰቁ ክንሰተድ፤ ክንድጝ ጝኒስ ጝታ ጝኒዝጎ ዋጥርጛንድ ወረጘ ክንድጘጘ አቅልድ ዋቕርጛንስመ ከቭጛንስም አቅሊዝ ጊዝጨቨቅ ጕስጕሰው አቐነውድ የጝ ዋርዘውድ።

ክንድጝ ጝንድ 437 ቃውሰ ገርየኑ ክንደጥዝመ ላጝጠ ክንሰጥ ፅበነውድ ጉይጝ፤ እንቅም ክንደጥ የነው ተግዝ ቀሰው ፈን ሚዝግቭሰቁ አቐነውድ ጋልፀቁድ ቈሽ ዊከ ቃውሰተዝመ ማኽለኘ ክ/ጝንዙ ቲክነተ አውር ክንሰተ አቐቊ አዝመራው ደሳለኝ ጛይ።

“አንቭቨነውዝመ ፃፈነው ቸልጝ የጝ ገርየኑ

ኪሮስ ወ/ተንሳይ

ኻምል 30/2017