አርሸዝመ ስነቃል

ንቕፀውዝ ገጠሪዙ ኽዝቭድ ላውንትዝም አነ ጝሉዝ ላው አይንት ሰቭ አክንወው ኰሪዝ ሰቭድ ሳልጠው አቕንትዝ ሰቭተናንስ ከቫንስ አስጘ ዲርድራጙ ጅመኩ።ተክዘ ኹራረዙ፣ልቭነዝጘ የቁ ጓነዝቁ  ሰበኒል ስነ ቃለንዝ ጅመነው ክንሸው ቲግቭር የጝ።

ሰቭዙ ጅመን ሰቭድ ሲለሰው አቓየጘዝመ ሲትፍሸጥድ (ሰቭተጢል) ዝላ ወይሳየጘ ፃቨኩ።ዜመድም አነ አስጘድ ሲትፍሸጥድ ሰቪዝ አትርጛንስ ከቨነዊስም ንየ ኰሪዝ ዝላ ወይሳየጘ ፃቨነውዙ ኻይል ፃይኩ ይሽት አምንሸኩ።

ጒዝጝ ጨጥ አምረይዙ ኰረኒስ ንቕፀቁ ሰበን ሰራሽጘኩ። ጝታ  ጅውነይዙ አየር ንቭርቲዝጘ ጝታ ቻፅጚል  ሰራሽጘቁ አርሽነይዙ ሰበንድ ስነ ቃልዝ እብለውዝጘኩ።

ቺዝጚዙ ቃውሰ አስልሽትዙ ሰቪስ ኪርም ጊቭርት ጥቅልሽጡዊል አሽ አክንዉሸቁ ሰበኒል ጅውነይዙ ባኽሊዝጘድቅ ቺዝጝ ጒታንድ፣ጒልጉልሻንድ፣አርመዝ፣ኽወ ኻይሽታንድ፣አይርኒዝመ ደስኒዝ ይሽተቁ ስነ ቃለን እኩጙ።

ንጭቱ ይና ዲቭየይዝም ቺዝጝ ጒዘነ ኰሪዝ ይሽተቊስ ዊትቁ ስነ ቃልዙ  አስጘንድ ጕተቁ ቢሊዝ ማጥን አምኰረዝመ ሲዝወረ አርሸይዝ ማጥን ይሽተቁ አስጝጥ ቲክነዊዝጘድ ንቨቭዝ አልስነ ቀኑን።

አርሽነይዙ ሰበኒል ቺተቺተቁ አስጝሽተቁ አስጝጥድ ጒዝጨተድ ጝሙየይዙ ኽይትድ ጝጽብኒዝ ተሚተተ አቐነውድ ቲክነቁ አስጝጢዝ ጋልፀኩ።

ያንስ ጒዘኩን  እንጎይስ – አምራሪጠቀርም፤

ችግሰ ማፅቭዝ  – ጀግዝጨ ቸላቅም።

አውር ጣጥመነው – ጉተነ ማልጠኩ፤

ብልባል ከምሽን -ጒዘነው ቺዘኩ።

አርሽነይዙ ሰቭድ እርወነዝ ቢረ እጀው ኻስቭሸው አየውም።ይና ኻግር ኢትዮጵየቱ ኽይጠጘ ጒዝጨተድ ጒዘውድ ቢረዝ የጝ።ጒዝ ጨተይዙ ሩሔድ ቢረጅቅ እፅቁጽቁሸው አቐነውድ ቓሊሰቁ አስጘንድም ቲክነዊዝጘ አልትጝኩጙ።

ስምቡል ክት እጀው- ጀንበር ክት እጀው፤

ይኧልድም ቓላው- ይቀርዝድም ወሻው።

ቢረ የውድ አው የጝ- ክሽጙድ ፅጉዝ፤

ምጝግሰተ ሰማያት ይንቀት አጉረውዝ።

ጥርድመ ቺዝጠ -ኹነ ግዘንደ፤

ቢረ አየውመ ውረ – ጭቅሸውድ ጝንደ።

እማን ነን አውኩ- ቢረዝጘ ግልወ

ሚዝም ሊነ መውር -እጅር ሚግቨወ።

አርሽነይዙ ሰቭድ ኰርድ ኻያጙ አስየው ሲዝወረ ጅውነይዙ እቀ ኽቭሪዝ ሳስ የው ግምት ይውሽተኩ። እንዝም ሲርየ ዛዝሽተኩ፤ጝነቁድም ግድርዝ አጋልዘው አቐነውድ  ቲክነቁ አስጘኒዝ ድቁሽተኩ።

ክት ቺዝጝ ጒዝተ-ጒዝነ ኻግር እንቅ፤

እለቀይ ዳቓየጘ – ብጥዝመ  ጭቀድ።

ክት ቺዝጝ ጒዝተ- ጒዝጝነ ካቅል፤

አሚ ሲቫየጘ – ሊልመ ክልኲል።

እንጎይስም  እንጎይስም – ይነውዜ ሀይ ሀይ፤

ጒጅ ጭልቛነ የጝ- ኾሰኩ ተቨይዝ።

እየም ጒዥ የናንድ – ኮረሸንት ገውቱ፤

ኻምል ጒዥ የናንድ- ስወዴንት ገውቱ፤

ጝ ኹር ሚ ዋቕራንድ – ዊቀዝ ገውስውሱ።

ኬሮስ ወ/ተንሳይ

ኻምል 30/2017