አቑ እኹረተ ፅውዘንድ ማኽተነ ሰቭ ሰራሽታጙ የጝ

ወይ ኽምረ ብሔረ እቅ ጭሰጭሰን ጋዝጊቭለ ወረደ ትኽነ ጽፈሽ ጝን ጫረይጅቅ ፃየፃይሽት  አቑ እኹረተ ፅውዘንድ ማኽተነ ሰቭ ቃውስ ሰራሽተነውድ ጋልፅኩ።

“ትኽነ ኤክስቴንሽንዙ ሙየ ጉይጥድ ነይጘው ክንድጚዝ ሲርየ ጅውነይዙዝመ ጝሉ ዊርተ ኻየነው ሰቭ ሰራሽነኩን። እንዝም ሲርየ ቅብረተዝመ ይዘው ኻቨረ አኽቨነ አስልንኩን“  የነውዝ ጋልፅረይሸን አስከተማ ኻትመዙ ፅበተ ዊዝር ሲሳይነሽ   አዳነ ጚ።

ትኽነ ኻየነ ፓኬጀንድ አሩሸነው ኪርምረው ሰቲስ ኪርም ጝነቊዙ ትኽነድ ቺዝ ያጙ ተረነውድ ጉይረይ ዊዝር ሲሳይነሽ፤ ትኽነይስ ከስጘ ጅውነይዙ ካኽተ ፋጥረጘም የጝ ዊግትረውድ።

ላየ ቓለ ነየተ አረይ ዊዝር  ፀጋ ገ/መድህን ቈሽ ጝር ጋቢዝ ጅውነድ ባምቦዙ አቑ እጅጝት ፅበነዊዝ ኽዝቭድ ኽይጠጘዝ አሩሸውድ ዊርቨዙ አቑ አቐነውድ ጉይር አቑ ኻክመነ ኬሚካልዙ እጅጝት ፅበነውድ ጋልፅርኩች።

ዊርቨዙ አቑ አሩሸተ ኽዝቭድ ንቕፀው አቕሽም ብልቁዝን ዝየነውዙ ዲዝጝትድ ፈራቓጙ ተረነዊዝ አቑ እኹረተ ፅውዘዝ አጋልሽተነውዙ አቕንትድ ግነ ቃፅቭሸነውድ ዊዝር ፀጋ ዊግትርኩች።

ቀቨሌዙ እቀ ኽቭሪዝ 18 ትኽነዙ ፓኬጀንድቅ ቲግቭርጛንስ ቲክንክነዝ ክንድጝ ይውሽታጙ አቐነውድ  አስከተማ ኻትመ 01 ቀቨሊዙ ትኽነ ኤክስቴንሽንዙ ሙየ ጉርየ ዊዝር አሰፋች መኮነን ዊግትርኩች።

አቑ እኹረተ  ፅውዘ ነሰቊስ እርወነዝ ቑጥን ስየዝመ አትክልትዝመ ፍረምረ  አቐጘ ሚርየቁድ ትኽነ ኤክስቴንሽን ሙየ ጉርየየን እነየው ፃቭኒስ ተንሸነው ጡሸጘም ዊግትጝኩጙ።

ባምቦዙ አቑ አሩሸጢዝ አቑዙ እፍርት ጊዝጨቨቅ አቑ ኻክምነ ኬሚካል አሩሸጘ ጉይረይ ሙየ ጉርየሸን፤ ዊርቨዙ አሩሸጢዝ ግነ ውሃ አጋርዝጘ የቁ ኬሚካለን ትኒትጛጙ ዊነቁድ መጝግስትቁ አየቁ ድርጅተንዝ ዊናንስቅ ነንቱ ሰቲዝ ቀቭሽተነውድም ዊግትርኩች።

ሙየ ጉሬየን እኒጅቅም ፃየፃይስጝ ጫረዙ ስወይዝ ምላሰን ቓፅጨቨቅ አቑ አቁለነውዙ አቕንት ፅባንስቅ መቈዙ አምልቀ (ትነረ)ዝ ሚቻየጘ ጅውነድ ዊርሸነውዙ ሰቭ ጊዝጨቨቅ ሰራሽተጘም ዊግትርኩች።

እቀ ኽቭርድ ጒስጉሽቲንቀት ጝቕመ ቃውስ ትኽነዙ ማኽተነ ጉገንድ ልብተነውዝ ትኽነዙ ፓኬጀንድ ቲግቭሩ ፃቭጛጙ አቐነውድ ጉይረይ ሙየ ጉሬሸን፤ እቀ ኽቭሪዙ ትኽነድ ጊዝጨቨቅ ቺዝ ያጙ ተረነውድም ጋልፅርኩች።

አቑ እኹረተ ፅውዘንዝ ጎንድ ፅውዘ ነሰተ እጥልቃን ተሕዋስያንዝመ ዊርቨዙ አቑ ቢክልሽን ፅበነውድ ወይ ኽምረ ብሔረ እቅ ጭሰጭሰን ጋዝጊቭለ ወረደ ትኽነ ጽ/ጝንዙ ዲቈተ አቐቊ አት ሀብቱ ካሴ ጋልፅጝኩጙ።

እንዛይ ማኽሊስም፦ እጥልቃን ተሕዋስያንዙ ቢክልሽን፣ አጡ አየው ዊርተዙ ኻይን፣ ቢክልሸው አቑ፣ አርሽነይዙ ጊቭርት ኬሚካልዙ ቢክልሽን፣ ኢንዱስትሪዙ ቅብረተ፣ ፍጥርዙ ኻደገ ተከተከቁድ ምላሰንዝጘ ጒይሽጝጠ ቸልጘጘም ዲቈተድ ዊግትጝኩጙ

አቑ እኹረተ ፅውዘዝ ተርጝጠ ቸለቁ ፅውዘንድም ኮሌራ፣ታይፎይድ፣ ሄፓታይተስ፣ ጃርዲያ፣ ቦቶሊዝም፣ ሌፕቶስፒሮሲስ… ተከተከቁድ ጛይም ይጝኩጙ ዲቈተድ።

አቑ እኹረተ ፅውዘ ነሰጥ ተሕዋስያንድ ማኽተናንስ ዊርተዙ ኻየኻይንድ ደድሰነው እርወነ ገቨ የጝ የቁ ዲቈተድ፤  አቑ ብልቁዘነው፣ዊንም ዋርብድ ኬሚካልዝ፣ እጅርዝ ዊንም እንሰስዝ ቢክልሻየጘ ማኽተነው ጡሸጘም ሚርይጝኩጙ።

ትኽነ ኤክስቴንሽንዙ ሙየ ጒይጢዝ ምላሰን ጫረ ጥወነዊጅቅ ፃየፃይሸቁ ፅውዘንድ ማኽተናንስ ቸልሰው ክንድጝ እን ሚዝረድ አኽቭነው ሰቲል አሽ ሲዘ ሽኽዝ ንየ እቀ ኽቭርዙ አድላንዝ ይውሽተነውድ ጉየቁ ዲቈተድ፤ቃውስን ማኽተነ ሰቭ ሰራሸነዊስ ከስጘ ፅውዘድ አጋልዝ እትልሽ ይሽት ጥላም ጅቭሽት እቑርሸነውድ ዊግትጝኩጙ።

ኪሮስ ወ/ተንሳይ

ኻምል 30/2017