አትሌት መሰረት ደፋር አውጚ?

አትሌት መሰረት ደፋር ኻምል 12/1975 ዓ/ስ አዲስ አቨቨ እኹርሽች።ጝር ጝነቁድ እቀጘ ድኽ አቐነዊዝ ጎው መሉሲንቀት ኪርምር ግርየዙ ሰቭ ሰራሽራጙ ዊኑ  ጋብዝ ጋብ ጝር ክንድጝድ ፃጝዝረውድ ።

ውጠይዝጎ ጥወነውዙ አገነ ችጝረውድ ሊጘትረ ደረጀ ክንድጝ ጝን ክንደተ አቕር የጝ። ኰሪዝ ክንድጝ ሚኒስትርዝ ምላሰን አስልሸቁ ንቕፀቁ ቲክርክረንጥድ ኻቐነዉዝ  አ.እ 1998 ዓ.ስ ባንኮች አትሌቲክስ ጓነይዝ አቅቭሽተ ቸልች።

ባንክ ጓነይል ፅብራጙ ፃቭሽተቁ ንቕፀቁ ቲክርክረንጢስ ንቕፀቁ ኻግር አቒትቁ ቲክርክረንጢል ቓሊስረው ድሊስኒዝ ኢትዮጵየቱ ብሔሩ ጓነይዝ ማርፅሽትተጘድ ፃቭኩ። ቃውሰተ ኰርዝም 1999ዓ.ስ ፖላንድ ቲስ 3 ሽኽ ሜትር አልም አቅቨ ቲክርክረ ፃቭር ሊጘትረ ፍርኩች።

መሰረት አልም አቅቨ ክቭረ ወሰነንም ሚዝግቭሰነው ቸልድርኩች።  2006 ኒውዮርክ ትል ፃጝሽተው 5 ሽኽ ሜትርዙ፣  2007 ጀርመን ትል ፃጝሽተው 3 ሽኽ ሜትር  ጝን አቒቱ ቲክርክረ፣ 2007 ካሊፎርኒያ ትል ፃጝሽተው  2 ማይልዙ፣ 2007 ቤልጂየም ትል  ተከተከውዝ 2 ማይል ጝርቕመስ ፃይሽት ዊነው ሰትድ ቺዝሸነውድ ዳቕሽተቁ ጛይ።

እን ፈኒዝም አልም አቅቨ አትሌቲክስዙ ፌዴሬሽንቱ 2007ቱ ማርፅሽተተ አትሌት ይሽተው ቈድንድ ችጘነው ቸልድርኩች።

መሰረት ውርም እኮን አጡ ፈንዝመ ድሊስን ሚዝግቭስርሽም ኻግር ደርግቨቁ ኦሎምፒክዙ ቲክርክረንጢል ውጥየናንስ ግነ  ንቕፀቁ ፈተንጥድ ዲቁርኩች።

ኪርመነ ጊዝዝ ኻግር ደርግቭር  አቴንስ ኦሎምፒኪል 5 ሽኽ ሜትር ቲክርክረይል ቲኪሸተ(ኻየተ) አቐነውዝ አገነድ ችጘነው ቸልድርኩች። እንዝም አንክርሰው ፈን ሚዝግቭሰነውዝ ለወትረ ደረጀ ፃየነውዝ ውጠድ አሰነው ቸልድርኩች።2012 ለንደንቱ ኦሎምፒኪልም ሳልጠው ሰት ሚዝግቭሰነውዝ ሊጘትረ ድሊስን ሚዝግቭሰነው ቸልድረይ ጅግነ ጚ።

2011 ዓ.ስዝ ኪርም ጝርቕመት ውጠይስ እክልዝረይ አራንድ ምላሰንድ ግነ አርቕሽታውም። እንቸን ኻግርዙ ወረተ ጉርየ አትሌትሸን ባንክዙ ልኰ ኰስ ዋርደተ ዊነው ቴዎድሮስ ሃይሉጅቅ  ከየ ሲርየነውዝ ሲዘ ኹል ፍርዘነው ቸልድርኩች።

ኪሮስ ወ/ተንሳይ

ኻምል 30/2017