“በኩር” የዉ ጋዜጠዝ ጝቃዉሰተነይድ ኪርመዉ ብላ ሚዲያ ኮርፖሬሽን ( አሚኮ)30 እምት ዉሸብለዙ እድሚዝ ክልሊዝ ዲቁ ያንድም፣ ኢትዮጲየስ የዉም ምስራቅ አፍሪከስ አቐዉ እክሰዉ ሰቭ ሰራሻጙ ተርኩ። ታኽሰስ 7/1987 ዓ.ስ በኩር ጋዜጠዝ 8 ጋጸኒዝ ጝሰቭድ ኪርመዉ አሚኮ ንጭትል ኢትዮጽየ ጽይረዉ አጉረጥ ሚዲየዝቁ ችብረንጢስ ለወትረዝመ ቃዉሰተ የጝ። እክሰቁዝ ጝታጝን፣ እንቅቱ ዊግተነ፣ ጻፈነ ጝታ ብእር፣ ከረነ ጝታ ዚወ፣ ጝታ እትለነ መሥታቪትየጝ። እክሰቁድም ጝታ ቸልቲጅቅም ስረንትጝኩጙ። ጝታ ኒቪድ ጽብጝኩጙ። ጝታ ሩሄዙ ሲሪየድም እቑርጝኩጙ። እክሰዉ ዚምናኒዝ እትልየቁ እትልጝኩጙ። ጝታ እማንትነይድ ዊግትጝኩጙ፣ ጝታአዉትነይድ ቓሊሥጝኩጙ፣ ጛሲጘድ አርቐአርቒስጝኩጙ። ጛኒቪድ እማን ጻቭጝኩጙ። 30 እምት ኢትዮጵየቱ ሚዲየዙ ሲጘ አቒዝ ጝወንቱ ደፈድ እቑርኩ። ጝሲጘይስም ኹሊስ ደፈ ማልኩ ብላ ሚዲያ ኮርፖሬሽን። ፈተንጥድም አጝሽ ሚስምርድ ቀስጝጥጘ ቸልየቁም። ኪዉተዝ ጒዥቱ ጚ። አሚኮትቁ ሰብተጥድ ንጭትጘ ሚዲየ ናኒዝ ጻይሽቲጝቀ፣ ጁበዝ ጻይሽት ጅልወነዉ ኮር ዊኒጝቀት፣ሚቸዉ ጉጉ ተሢትየዊዝ፣ ኢንተርኔት አርቕሽትየዊዝ፣ ዚምኑ ቴክኖሎጂ ኒቭ አቐዉ ዚምኒዝ ናኒዝመ ልኩዝ ሳንየ ክቢጛጙ እክሰቁ አብቅድ ጊምጝኩጙ፣ እክሰቁ ገዉሰቁ ዋርብድ ከርጝኩጙ፣ አቑ እጀዊዝ ዝቋንድጝኩጙ ንጭቱ ይና ጽፈሽዝ አሚኮቱ ሻቘ ጽቃ እምት ጒዥትንድ ሚሪሸዉዝ ብላ ሚዲያ ኮርፖሬሽን (አሚኮ)ቱ አይነተ ሰቭ ጻጝዘተ አቐቑ ጋዜጠኘ ሙሉቀን ሠጥየ ጅቅ ጻቭነዉ ዊንተድ አንቭቭስነ ቀኑን። አሚኮት ሊጘ ጒደነዝ ጋልጸነዉ ቸልሸኩ። ለወትረድ እንቅቱ የጝ።ዊስንሸቁ እቂዝ ጭቑ አይጝቀስ ብጭቅዝ አርወዉ ገቨይዝ ወየ ኪፍላጙም አቕሽ ጝግል ችብር ሰራሸዉ ሚዲየዙ ችብረ የጝ። ሊጘትረድ እማንም አርቕት ዊትቁ እቂል ጭቑ አይጝቀስ ጽበዉድ እክሰቁድ አግልግልሽጘዉዝመ ዊግትጘዉ የጝ። አቓንስቅም አሚኮ ብጭቕዙ የጝ። እን ሻቈ 10 እምታንድ ጒዥተዉ ብላ ሚዲያ ኮርፖሬሽን አወየዉ የጝ ይሽትርን ዋቕርሽርናን ዉር ይርን ጋልጽርነኩ ይሽትጝ ዋቕርሸቁድ ኮርፖሬሽኒዙ አይነተ ሰቭ ጻጝዘተ ጋዜጠኘ ሙሉቀን ሰጥየ ይዉጘዉ ዊሰድ የጝ። አይን ኪርምሻንድ ቃዉሰጥድ እክሰቁ 10 እምታንድ ቃዉስጝ ኒቪድጝ ብላ ክልሊዙ ኽዝቪዝ ቃውሰተ ድመ አቓንስ ኒቭ ፃይሻንድ እክሰቁድ ኻሊጘዉ ጒደነዝ ጝወንቲስ ተግረዉ አብልሸቁ ድመንድ ወይሰናንስ እኩን የዉ ችብረዉ ችብረ አቐጘን ጝአቅልድ ኪርመነይዝ እምዝጝኩጙ። ችብረድ ችብረዙ ኲንን ንድፍ ጽይ ዊኑ እን ንድፍድ ዝቨይል ጊመነዉዝ ችብር ጽበናንስ ችብረይዙ እኹርሽንዙ ለምርምረዝ ችብረይዙ ኳነ ፈወነድ ቃጽሉ አይነተ ሰቭ ጻጝዘተድ ይጛን ትጘም አሚኮትቁ ታትነትቁ ጒደንጥድ 3 አይንተ ጒደንጥዝ ገሪሸቁ አጛንድ ጽባይነዊስ ጽበነዉድ አብዝርሸዉ ጎነዙ ፈወነድ ሚዲየዝቁ ማርጸንጥድ ሊጊሠነዉዝመ ጝወንቱ ቀለም ጻይ ተረዉ ፈወነ እኒዝጘም 3ትረድ ነን ጽብነዉ ዲጂታላይዜሽንዙ ዚርፍድ ቃወዉ ኮር የጝ። ይጘኩ” አሚኮቱ ጝወንቱ ጒደነድ ቲክነናንስ ልቕረ ጻቫጙ የጝ። ዲጅታልዙ ዚርፊዝ ጝወንቱ እኩሠድ እኩሰነዉ ጡዉሸኩ። እክሰቁ አሩሸቁድ ዉሸቭል አጛንስቅ እክሰቁ እቀኽቭርዙ አድለንድ ችጘነዉ ቸልሸኩ። አይነተዝም ጥቕዘ ፋጥረተድ አጉረዉዝ ሊጊስናጙ ፊርናንድ ሊጘትረዝመ ሸወትረ ኹል ይሽተቁ ላየ ኻግርል ጽበቁ ኢትዮጽቁድ ጝታ ኻግርቱ ሲጘ ባኽልድ ልብጥጘ፣ ጝታ ሲጘድ አርቕጥጘ ጻቨኩ። 30 እምታንድ አጉረዉዝ ኽነዝ ኽዝቭዝ አርወኩ የዉ አምነውድቅ እንቅ ኪዉየዉ ችብረይዝ አግልግለ ይዋጙ ችጝሸዉ አሚኮ ብላ ክልሊዝ ጭቑ አይጝቀስ ኢትዮጲየቱ ኻግረ ምጝግስትዙ ኲንንዝ ጝወንቱ ደፈ እቑረነዊል ችጝሸኩ።” እኔንትም አትር ቃጽልዘኩ ይጘኩ። ብላ ሚዲያ ኮርፖሬሽንዙ ወነድ ብላ ክልልየጝ። አቓንስቅም ብላ ክልሊዙ አሩሸተነይድ ኪቭርዘቁ ሰባኒል ሰራሽጠጘን ቕየዝ ጻይሽትኩ። ብላ ክልሊል ጽበቁ እፍርትዝቁ ኻለየኒል፣ ቀሰዉ ጭሰጭሰንዝቁ ኻለያኒል፣ ፖለቲኩ ኻለየኒል፣ ጌጸንዙ ኲንን ኻለየን ጥቅለ ኽዝቩ እሴት ኻለየንድቅ ድዉሰኩ ጝታይ ፈን ነስጥጘ የጝ ችበችብረዉድ። እኒን የነት ብላ ክልል ኢትዮጵየቲስ ቺተዉ አየዉም ኢትዮጲቁጅቅ ለወንትዝ ሊግዘነዉ፤ ለወንትዝም አትርድረይ ኻግር ዊንተጘን በንዘኩ። የቁድ ጋዜጠኘ ሙሉቀን ሰጥየ ቃዉሰይዝ አግልግለ ይወነዉ ኪርምሸዉድ ብልቓጘይዝ የጝነ አረብኘቱ ቈንቈይዝ ኪርምሻንድ ኢትዮጵየ ግጽ ኻግረኒጅቅ እንቅቱነይ ዲምቅሽን ጽይጠ ጻቭሰዉ አቓንስቅ ነን ዊትዊዝም ኪርምነዉድ ሊግስነኩን ይጘኩ። ብላ ሚዲያ ኮርፖሬሽን ኽዝቭዝመ ኽዝቭዙ ዲምቅሽኒዝ አትረዉ ሲሪየ እቑረነዉዝመ ኽዝቭዙ ዲምቅሽኒዝ አትረዉ ሲሪየ እቑረነዉዝመ ዊነዉ እሴትድ ኻይሰቁ ሰባንድ ሰራሸነዉዝ ቑልፍ ቲግቭራንድም አክንወነዉ የጝ ይጘኩ አይነተ ሰቭ ፋጽምዘተድ ዊግትጛንድ። “ነንትል አሚኮ ዲቈቁ 30 እምታኒዙ ጒዥትንድ ቓሊሰቁ ቲግቭራንድ ጉየነዉዝ ኪብርዝናጙ የጝ ። አሚኮ 30ትረ እምት በልድ ንኻሽ 30/2017 ዓ/ስ አሽ ቃጽላንድ 3 አይነተ አይነተ አለመድ ሊቈ ጻቨነዉዝ የጝ” ይጛንድ ጋልጽጘኩ። ዲቈቁ 30 እምታንድ ዲቁጛንድ ቀለዉ ጒዥትንዝ አየዉም እንዛይ ጻጝኒዝም ፊሥሽተቁ ክንድጘን እኩጙ። ጝታት ቓለነዉ ተሚተኩ ኪርመነይዙድ ክንድጝ ፊሠነዉ የጝ:: ሊጘትረ አሚኮስ አይነተድ እጅርዙ ጝጻጀድ አቒቱ አትረዉ ዲምቅሽንድ አጉረዉዝ አትርዝ ተረዉ ፈተነድ ችብርጠ ቸለዉ እጅርዙ ጻጀ ፋጥረናንስ ቸልሰኩ። ሸወትረድ ችብረድ አርቐ አርቒሰናንስ ብራንዲግ ይነዊጅቅ ጻየጻይሽት አጉረዉዝ ሊጊሰናንስ ቸልሰቁ ገባንድቅ አሩሸነዉ በንዘኩ። ብላ ሚዲየ ኮርፖሬሽንዙ አይነተ ሰቭ ጻጝዘተ ጋዜጠኘ ሙሉቀን ሰጥየ አሚኮ ንየትነይዝ ጭጝሽጠ ኒቪ ሊቁሰቁ ኒቪ ጉሬ አማራ ቴሌቭዥን፣ ኤፍኤምቱ ጣቢየጥድ ቸበችብሰዉ አጉረዉ ችብረ የጝ። አሚኮ ሲጘይዝ አጉረዉ ችጘር ጽይጠጘን ክልሊዙ ምጝስቲዝመ ኽዝቭድ ሚዲየዝ ጽይጘዉ በንትድ አይነተድ ዊኑ የጝ ይጘዉድ። ወይትጘም እቀ ኽብሪዙ ሚዝረዙ በንትድ ጠራዘናስ ሰቆጣ ኤፍኤምቱ ኲነ ኲነነዉዝ ሰቆጣ ኤፍኤም እን በጀትዙ አምረይዝ ኪርምሰናንስ ሰራሽታጙ አቐጘንድ የጝ ዊግትጘዉድ አይነተ ሰቭ ጻጝዘተድ ብላ ሚዲየ ኮርፖሬሽንም ኽዝቭዙ ዋቅረድ እክሰናስ ሰራሻጙ ችጝሸዉ ሰቢዝ ሰቆጣ ኤፍኤምቱ ኲነድ ላዉድ አቓንድ ኲነድ ኲንሽት ኻትሽ አግልግለ ኪርምሰናስ ጎዘመዘንዙ ጅብን ጻቭሽታጙ ችጝሸዉ አቐነዊዝ ጁነይዙ ኽዝብድ አቅል ጻቭ ኻይጠ ጡሸዉ አቐነዉድ የጝ ዊግትጝትጘዉድ። “እቀ ኽቭርድ ልብጠ ጡዉሸዉድ ኲነድ ኻትሻንስቅ ትንዝሽትን ኪርመነዉ ቸልሻዉ አቐነዉድየጝ። ቀለወዝ ሊጘ ገባን በንዝጘኩ”። ለወትረድ እስቲዲዮዝቁ ጎዘመዛን በንዝጘኩየቁ አይነተ ሰቭ ጻጝዘተድ መሠሪጥዙ ጅቭንድ ጻጝትል አቐነዉድ ዳቕሠነዉዝ እንም ጅቭንድ ጻጝሽተዉድ ቢዘ ኻግርስ አቐነዊዝ ጎዝድ ተራንድ ትንዝሽትኒዝጎ ጥወኩ ይጝኩጙ። ነንትሰቲዝ ጅዉነይዙ ኽዝቭቭድ ሚዝረ ችጛየጘን ጻብሰዉድ ባህርዳርስ ለምር ሳቁጠ ትንዝሳጙ ዊነዉ መሠሪድ ሰሜኑ ጣይትኒዝ ምላሠን ቈጨዝ አጋልሽታንሰቅዝመ ሰጙሽታንስቅ ጁነይል ትንዝሽትንድ ችጝዘነዉ ቸልሽየዉ አቐነዉድም አት ሙሉቀን ዊግትጝኩጘ። እኔት ቲኬየነዉዙ ሰቭ ሰራሸናንሥም ጽይሸዉ በጀትዙ አምረይዝ ደደደድሽተዉዝ ትንዝሽትንድ ኪርመኩ ይጛንድም ደደደድስጝ ብላ ክልሊዙ ምጝግስትዝመ አሚኮ ግነ ጅነይል ትንዝሽትንድ ኪርምስጠ ቸልሰዉ እንቅ ገባንድቅ እቻዝጝኩጙ።አቓንስቅም ጻጝት ጭቑ የጝ ዳቐዉድ ይጛንድም ዊኑ ጋልጽጘወድ። ብላ ሚዲያ ኮርፖሬሽን ኢትዮጲየቱ ኽገ-ምጝግስት ኲንንዝ ጝወንቱ ደፈድ እቑር ችጝሸዉ ችብረ የጝ። አሚኮ 30 እምታን አቒዝም እክሰቁ ፍን ጊምንድቅ ዲቈዉ አጉረዉ ችብረየጝ። እቀኽብርዙ ልዉጠዝ ሰራሽነኩን!
አመልማል ተድላ ንኻሽ 15/2017
