ሚድየዝመ ገረዱ ዲምቅሽንድ ነንቱ ዚምኑ ዓልም አቒዝ እቀጘዝ ተሚሰተ አቐቊ ገበኒስ ዳቕሽተጥ ጛይ፡፡ ሚድየ ቴሌቭዥን፣ ሬድዮ፣ ጋዜጠዝመ ዲጂታል ሚድየ ተከቊዝ ምላሰን ሚዝረ ዲቈዲቊሰናንስ፣ ክንሰናንስ፣ ዘናሰናንስ አግልግለኩ፡፡ ገረዱ ዲምቅሽን ቈሽ እቅ ማኽሊል ፅበው ዲምቅሽንድ ቺተዝም ገረዱ ዲምቅሽንዝ የነትም ቲዊተር፣ ኤክስ፣ ፌስቡክ፣ ኢንስታግራምዝመ ቲክቶክዝ ምላሰን ፋጥርሸው ኻሰቭዙ ላውጥውጥሸነዝ ምላሰን እቅ ጝታ በንጘው ኻሰቭድ አልስጛንድ ዲዝጝሸው ቲግቭር አቐት ጭ ግሪኩ፡፡ ብላ ሚድያ ኮርፖሬሽን 1987 ዓ.ስ ኪርም ቺተቺተቊ ሚድየመንዝ ቈጝቈዙ፣ አየር ሰትዝመ ችጝሽተትነይዙ ሽፍነድ ሊጊሰነውዝ አግልግላጙ ችጝሸው ኽዝቭዙ ፃጀ የጝ፡፡ “በኩር” ጋዜጠዝ ኪርምሸው አግልግለድ 30 እምተንዙ ጒዥትንዝ ቴሌቭዥንዝ፣ ሬድዮዝ፣ ኤፍኤምዝ፣ ጋዜጠዝመ ዲጅታል ሚድየዝ ጝ ችጝትነይድ ፈራዘው ኽየው ሚድየ አቐነው ቸልኩ፡፡ ነንት ሰትዝ ሊጘ ቢዘ ኻግርዝቊ ቈጝቊጥድ ቈሽ 12 ቈጝቊጥዝ ሚድየዙ ሽፍነ ይወውድ ብላ ሚድያ ኮርፖሬሽን (አ.ሚ.ኮ) ክልል አቒል ችጝሸቊ ብሔረ እቅ ጭሰጭሰንጢዝም ቺተው ሚርዬ ይው ሰራሻጙ ችጝሸው ሚድዬ የጝ፡፡ ወይቱ ኽዝቭ ቈጝቈ፣ ባኽልዝመ ትውፊት፣ ሲጘ ጥቅለዝ አውትነይድ ጋልፀናንስ ሚድየይዝ ሰራሽናንድ ቈጝቈድ ዊግተቊ፣ ወሸቊዝመ አንቭቨቊ እቅዙ ጝታ ኻሰቭድ ለምረነውዝ የጝ፡፡ እንዝም ብላ ሚድያ ኮርፖሬሽንዝመ ወይ ኽምረ ብሔረ እቅ ጭሰጭሰንዙ ዲምቅሽንድ አትረው አቐነዊዝ እቀ ኽቭርድ ሚዝረ ችጛንስ ፃቨነው ጋቢዝ ጝታእኩሰድ አውግረው የጝ፡፡ ሻደይት ቈሽ ቺተቺተቊ ወይ ኽምረ ብሄረ እቅ ጭሰጭሰንድ አርቐ አርቒሰቊ አፅቭጥድ አልሰነውዝ ኽዝቭዝቊ በለን፣ ሲጘዝመ ባኽልድ ቈጝቈይዝ ምላሰን አልሰነውዝ ዓልምቱ ኽዝቭድ አርቕጠ ፃቨነው ጋቢዝ አውግረው ፍልውልወ ፃቫጙ ዊንኩ፡፡ ተረዊዝም አትርዝ ቃፅለው አቐኩ፡፡ ብላ ሚድያ ኮርፖሬሽን ( አሚኮ) ቺተዝም ኽምጣጘ ቈጝቈዝ አስልሸቊ አፅቭጥድ ወይ ኽምረ ብሔረ እቅ ጭሰጭሰኒል ችጝሸቊ እቀ ኽቭረንዙ ድመ አቕ አግልግለነው ጋቢዝ ጝ እኩሰድ ንየስ የው የጝ የነውዝ ጋልፀቊ እቅዙ እግዘድ ንቕፀው የጝ፡፡ እንዛይ እቅ ማኽሊስ ዊትቊድ አልስነኩን፡፡
“ብላ ሚድያ ኮርፖሬሽን እንዛይ 30 እምተኒዝ ኮሪስ ኮሪዝጎ ጝቕመነት ሊግሳጙ ተር ላጥ ሚድየኒዝ ተከ አቓጙ ተረው ሚድየዙ ችብረ የጝ፡፡ ላጢዝ ሞዴል አቐነዊዝም ክልሊስ ኪርም ኻግር አቅቨ ተግዝ አርቕት ችጘነው ቸልኩ፡፡ ብሔረ እቅ ጭሰጭሰኒል ችጝሸቊ እፍርትዙ፣ ቀሰው ጭሰጭሰንዙ፣ ገረዱዝመ ላጥ ኽየኽየቊ ገበንድ ቺዝን እክሰ ችጝጥጘ ፃቨነው ጋቢዝ ብላ ሚድየ ኮርፖሬሽን ፃቨው እኩሰድ አውግረው የጝነ ሚዘንዝጨ ቀነኩን ነንም ደግመዝ ወዝ ችጝዘት”፡፡
“ኽምጣጘ ቈጝቈዝ አስልሸቊ አፅቭጥድ ቲክንክነኩን፡፡ ቲክንክነነው ጭቑ አቒጝቀስ ቓለም ነቀኩን፡፡ ብላ ሚድያ ኮርፖሬሽን ቺተዝም ኽምጣጘ ቈጝቈድ ኪርምሸት እግርገ ይና ብሔረ እቅ ጭሰጭሰኒዙ ስነ እዘንድ፣ ፖለቲከድ እኒዝጘም ምፅነ ፃጀድ ቓሊሰነውዝ ሚዝረ ይወነው ጋቢዝ ኽየው እኩሰ ፃቫጙ ችጝሸው ሚድዬ የጝ፡፡ ተረዊዝም ዲቊሰቊ እምተኒስ ዲቈውዝ ሰራሸኩ የር አምነኩን ወዝ 30 እምት ኪብርዝንዝ ችጝዘት ይጨም በነኩን”፡፡
“ብላ ሚድያ ኮርፖሬሽን ኽምጣጘ ቈጝቈዝ ትንዝሰነው ኪርመነውድ ኰሩ ሚዝረ ችጝናንስም አቑ ይና እቀ ኽቭርድ እፍርትዙ አርውሸተ አቓንስ፣ እኪትየቊ ችግሰንጥድ እኪትጛንስ ፍልውልወ ፃቨው ሚድየ የጝ፡፡ ብላ ሚድያ ኮርፖሬሽን ወይ ኽምረ ብሔረ እቅ ጭሰጭሰኒል ችጝሸቊ ቺተቺተቊ ገበንድ ዚግቨነውዝመ እክሰ ችጝጥጘ ፃቨነው ጋቢዝ እኩሰ ፃቨነው ጭቑ አቒጝቀስ አይነተ ሽሹደተ አቐነውዝ ይና ድመ አቓንስቅ ሚዘንዝነኩን ወዝ ችጝዘት”፡፡ ብሔረ እቅ ጭሰጭሰን ቈጝቊጥዝ ሚድየዙ ትንዝት ይዋጙ አቐነውድ ብላ ሚድያ ኮርፖሬሽን ብሔረ እቅ ጭሰጭሰንጥድ ሚድየዝ ጥውሸውዝ አርውሸነውዙ ጝታ ሚቭትድ ልብተው ችብረ የጝ የቊ ቓለ ነየጥድ ሳቊጠ ኻትመል ኲንሸው ኤፍኤም ጣቭየዙ ችብረድ ቃዝየውዝ ጥወረን እቻይሽትጝ ሚዝረድ እቀ ኽቭሪዝጎ ችጝጠ ማጥን ሚርዬ እቑር ሰራሻጙ ፅበነውድ አርቕሽተው አቕሽም ቃዝየውዝ ቲግቭሩ አቓንስም ተምዝት ፅየቊ አቐነውድ ዊግትጝኩጙ፡፡ ብላ ሚድያ ኮርፖሬሽን 30 እምተንዝ ቑጠ እቀ ኽቭርዙ ልውጠዝ ልቕርደው ሚድየ አቐነዊዝጘድ ተረቊ እምተኒዝም ዚምኑ ቴክኖሎጂ አርውሸነውዝመ ሳልጥነው እጅርዙ ኻይል አርውሽ ብሔረ እቅ ጭሰጭሰኒዙ ቀሰቊ ገበንድ አርቒሰነውዝ እኪጥጘ ጥውሸቊ ገበንድም እክሰ ችጛንስ ሚንውትዝ ሰራሸው ሚድዬ አቐነውድ ችብረይዙ ቃወጢስ ቺተቺተቊ ኰረንዝ ጋልፅሽተነውድ አስክዝናጙ ይና ቺተነይዝጘድ “እቀ ኽቭርዙ ልውጠዝ ልቕርድነኩን” ይናጙ ሲነቭትሽኑን ዲግ አጥን፡፡
ወንድሙ ቸኮለ
ንኻሽ 15/2017
