‎ትኽኑ ዲምቅሽንዝጎ ዊሰው ባኽሉ ሽሚርነይዙ ስረት!! ይና ኻግር ኢትዮጵየቱ ባኽሉ እሴተን ማኽሊስ ሽሚርነይዙ (አርቅሰነዙ) ስረትድ ጉየነው ቸልሸኲ።

ኻግርሸንትል ችጝሸቁ እጝቅ ብሔር ብሔረ እቅ ጭሰንጭሰን ጋብዝም ባኽሉ ሽሚርነይዙ ስረቲዝ አጉረው ስፍረ ፃየው የጝ። እጅር ኹርዙ ፍልውልወንጥዝ ገጫሸነው ዊንም ጥወጥውሽተቅ የነው ፋጥርሻንድ ዜገን ቺተቺተቁ ኽግዙ ማኽለንዝጎ ፊረነውዝ ጝተ ቅሬተድ አልስጘኩ።

አቓንስቅም ባኽሉ ሽሚርነይ/አርቅሰነዙ ስረትድ ሊጘ ገጫሸቁ አካለን አቕየው ጎርዝጎ ጥዋይጘጘ ጝታ ኻለይድ ሽሚርዝ እኪታንስ ፃቨነውዝ ዚንነይድ ዊነዊዝጎ ዊሰው ባኽል የጝ።

ባኽሉ ሽሚርነይዙ ስረት የነት እቀኽቭሪዙ ሩሔ፣ አካልዝመ ጥፍትል ኻደገ ችጘነዊስ በውግ ቃውስን ማኽተናንስ ከቨው የጝ። ማኽተነው ቸልሽየው አጋል ፋጥርሻንድም እክሰዙ ሚረ የጝ።

እን ባኽልድ ወይትጘድም ገጠር ኻትመ ይጝቀት እጝቅ ጅውንጢል ቲግቭርሸው አቓንድ እቀኽቭሪዝም እቀጘዝ ለምርሽትነይ ፃየው የጝ።

ዝቛለ ወረደል ቺተቺተቁ ኻለየንዝ ቃርሸቁ አካለን አርቅሰነውዝ አርቕሽተቁ ጅውነይዙ አቅሊስ ላውድ አት አሰፋ በላይ ባኽሉ ሽሚርነይዙ ስረትድ ጋልፅጛንድ”  እቀኽቭሪል ትኽኑ ዲምቅሽንድ አትር ቃፅላንስ ከቨው የጝ”ይጘኲ።

“ላውዝ  ፅበናንድ አየው እጅር ኹር ጋልም ገጫሸኩ ቃየው ዊገድ” እጅር ኹር እጅርጅቅ፣ ጝዝንጅቅ ፅባንድ ከቨከቭሽትንዝ፣ ቀንትዝ ፅበዊዝጘድቅ ላው ላው ግሬ ኻሰቭዙ ቺተንዝ፣ ድበርዝ፣ ጊንዝቭዝ ቃር ፋጥርሸኲ።

ሽሚርነይዙ ባኽሉ ስረትድም ቘይሸዊዝመ ቘጨ ችጝዘዊዙ ኻሰቭድ እክሱነይዝ ወሸነውዝ ቃርሸቁ አካለንዝመ ጝነቁድ ዊነው ትኽኑ ዲምቅሽኒዝጎ ዋጥርጛንስ ፃቭሽተው አቐነውድ አት አሰፋ በላይ ጉይጝኩⶔ። አውም አካል ሽሚሪስ ፈው እጀው አቐነውድም ዋርዝጝኩⶔ።

ባኽሉ ሽሚርነይዙ ስረትድ ቘጨይዙ አይንትዝጘድ ቺተቺተው አቓንድ አርቅሰናንስ ማርፅሽተው ስፍረድም ጝቕምቱ እክሰ ፃየው የጝ።

ሳቁጠ ኻትመይል አርቅሰነዙ ስረትዝ ንቕፀው እምት አግልግለቁ ወይኽምረ ብሔረ እቅ ጭሰጭሰኒዙ ዲግዙ ኮሚቴ አኽቨተ አቐቁድ ላዕከ ሰላም ቀሲስ ወ/አረጋዊ  ነይጘው ኻሰቭድ ቈሽ “ሽሚርነይዙ ስረትድ ፃጝሽተውድ ጎሪዙ አይንቲዝጘ የጝ፣ ቘይሽኩን የው እጅርድ ልኻንድ አቐውዜ ልኻንድ ቓዘው ከሰ ቘጨ ቲክንዘው አካልድ ከሰ ኪፍላንስ ፃቭሽት ሽመቅልድ ዊስነቁ አጘኲ”ይጝኩⶔ። ወይትጘድ ሽምርነይዙ ስረትድ ፃጝዘነው ስፍረድ ኽየው እፃ ፃየው አቐነውድም ሚሪጝኩⶔ።

ቃርሸቁ አካለንዙ ሩሔም አነ አካልዙ ቘጨ እጀው አቐውዜ አርቅሰናንስ አኽቭሸነድ ኽየው ዘፊል ዊንም ሚንድሪል አጠ ቸለኲ። ብርዙ ቃርሽን አቐውዜ ግነ ኽየው ዊርቨይል ዊንም ምከኒል ፃጝሽተኲ።

‎‎እኔንም ቅወው እጅርድ ኽየው ቀተዝመ ኽጤት ሰራሸጘድ አምንሸው አቓንስቅ ዊርቨይል ዊንም ምከኒል ሽሚርነይዙ ስረትድ ፃጝሽተኲ። ቅወዊዙ ኽጤትድ አቑዝ ፊረኩ/ምከንዙ ፀሎቲዝ ዊርየኩ ይሽት አምንሸው አቓንድ ክረዊዙ ጝነቁድም ጝታ አቒዝ ፃይጝ ዊነው ኽዝንዝመ ቃርድ ምከኒል ጝተ አምላኪዝ ይውጘው አቓንስቅ የጝ።

ዊርቨል አቐውዜም ጝተ ኽዝንድ ዊርቨይዙ አቑል በርጝ በውግ ዊነው ሊጘ ጓንዙ ዲምቅሽንድ ዋጥርዝጘው እፃ ፃይኩ ይጘኩ ኻሰቭድ ነየቁ ይናቅልድ።

“ስረትድ አሽተትም ጝተዚነይዝመ ዲምቅሽንድ ዊነዊዝጎ ለወ ይጝ ኪርመናንስ ቢድለተይዙ አቅለኒል ዊንም ዊግነኒል አቑ አረድ አስልሽ ምዘት ዀሽተኲ። ጝዝ ግረም ጒዘነዊልም አነ ላጥ ገረዱ ዲምቅሽነኒል ቺትጝቀት ላውዝ ሰራሽጘኩ ላውዝ ኪብርዘነው ኪርምጘኩ” የነውዝ ዊግትጘኲ።

ቓለ ነየጥድ ሊጘ ቃርሸቁ አካለን ደጘል አልትጘንድ በውግ ኻግሩ ሽመቅሊዝ ቓልሽትጥን ይሽትጝ ደጝት ጝንድ ዋጥርዘው አቐነውድ ሚሪጝ ሽመቅልዝ ንየ አቐውድ ክርጘዙ ወንጀል አቕየውዜ ኽጊል ችጚጝቀት እጝቅም ኻግሩ ሽመቅል ጝታ አቅሉ ስረትዝ እክስጘው አቐነውድም የጝ አርቒስጘውድ።

ቘይሸዊዝም አነ ቘጨ ችጝዘዊዝ ኽግዙ ማዕከሊዝጎ አልትጝ ፊስጘው ፈንድ፣ጊዝዝመ እክሱ አቐው ዊሰይስ ባኽሉ ሽሚርነይ (አርቅሰነዙ) ስረት ቺዝየው አቓንስቅ ሊጘ አካሊዝቅ ለምርሸትነይ ፃየው የጝ። አውም ሽመቅሊዙ ውሳኒድ ለምረቅ የው ደድ ፈው እቀኽቭሪዙ ክፍል እጀውም።

ነንቱ ሰቲዝ ግነ ኻግርሸንትል ፋጥርሸው ፃውተዙ ችግሰድ እክሰናንስ ኻግሩ ሽመቅሊዝ ፃቭሽታጙ ፅበው እኩሰድ አጉረው አቕሽም ኻግሩ ሽመቅሊል ምጝግስት ትኩርት ይውጠ ጥውሸው አቐነውድም የጝ ሽመቅልድ ኻስቭዝጘውድ።

ወይ ኽምረ ብሔረ እቅ ጭሰጭሰን እክሰ ቃወነይዙ ዲቈተ አት ማርቆስ ማሞ ጝተ ጋብዝ “ይና ኻግር ገሪየኑ ኽግ ችበችብር እክሱነይድ ደድሰነው ኪርሚጝቀት፣ በውግቱ ይና አቅልድ ባኽሉ ጒደነዝ ንቕፀቁ ኻለየን  እክስጛጙ ተርጝኩጙ። ነን ቺተዝ ቈሽ ክልሊል ፋጥርሸው ፃውተዙ ችግሰድ እክሰናንስ ምጝግስት ኻግሩ ሽመቅል ጝተ አቅሊዝጘ ጝተ ቑርድ ዲግዝጎ ዋጥርዝጛንስ አርውሸነዊዝ ክልሊል ንቕፀው ልውጠ ቓሊሰነው ቸልሽኲ”ይጝኩጙ።

አት ማርቆስ ኻግሩ ሽመቅል ፃጝዝጘው ባኽሉ ሺምርነይድ እቀኽቭርድ ቀንትዝመ ኪብረኪብርሽትንዝ እንዝጘም ትኽኑ ዲምቅሽን ፃይጠ ፃቨነዊስ ከስጘ ኽግዙ ሰራሽንድም ቀልዘው ባኽሉ ሰራሽን አቐነውድም ሚሪጝኩⶔ።

ጭሰጭሰኒዝጘድም “እክሰዙ ቃወነድ ኻግሩ ሽመቅልጅቅ ተገተግሽት ሰራሸው ሰቪዝ ንቕፀቁ ውሸብል ዲግዙ ቲስመምንድ ለምርጝ ጝታ ጝነቊጅቅ ዲምቅሽጝ  ፅብጛጙ የጝ”ይጝኩጙ እክሰ ቃወነይዙ ዲቈተድ።

ኻግርሸንትል እትለቁ ችግሰንጥድ ስሪስ ድሰናንስ ባኽሉ ሽሚርነይዙ ስረቲል ትኩርት ይወነው ጥውሸው የጝ።

ገሪየኑ እክሰዙ ስረቲዝ አሰነይዙ ፈን አቐውድ ጊንዝቭ ዊንም እፅውሸነው ዲቁ ያንድም ክርጘዙ ደጝት አቓንድ፤  ባኽሉ ሽሚርነይዙ ስረት ግነ አሰነዙ ጝ ፈንድ አርቅሰነው የጝ። እክሰ ጝንዝ ቐፃሽጘት እግርገ ደግመዝ ቃርድ ወረወርጠ ቸለኲ። ጥቅለ ባኽልዙ ሽሚርነይዙ ስረትድ ቓልናንድ ጨቀተዝመ ቘይሸተይዙ ቃርድ እክሰነውዝ ቃርሺጝቀት በውግ ዊነው ትኽኑ ጝታ ዲምቅሽንድ ቃፅልሰነው አቓንስቅ ኽፅምቲስ ኪርም አቅል ኹርዝ ኹርዝጎ ከሰከስጛጙ ተረው ባኽልድ ይና እጝቅም አርውሸነው ጥውሸው አቐነውድ ይና ዲቪየይዙ እፃ የጝ።

ሳምራዊት ግርማይ

ንኻሽ 30/2017