“መውሊድዙ በልዝመ ኪብርዝንድ”

መውሊድዙ በልድ መውሊድ አል-ነቢ” ዊንም መውሊድ አን – ነቢ ይሽተነውዝ  ጭጝሸው አቓንድ እጅጚዝ ጭጝሻንድም መውሊድ የነውዝ ጭጝሸኩ፡፡ ግሬድም ነብዩ ሙሃመድቱ እኹርሽንዙ ግሬ የጝ፡፡

ቱርክትቊድ ቈሽ መውሊድ ሸሪፍ የነውዝ ጭጝጘኩ፡፡ ጝ እክሰድ / ትርጉምድም/ ቀድሽተው፣ በርክሸው ልድት /እኹርሽን/ የነት የጝ፡፡

ፋርስትቊድ ሚለድ ፓየ ምባር ኢክራም የነውዝ ጭጘቊ አጛንድ ጝ እክሰድም ኽየው /ቅዱሲዙ ነብይዙ ልድት የነት አቕ ችጝሸኩ፡፡

አልጀሪያትቊድ ጝታ ጋቢዝ መውሊድ ነቢ ሸሪፍ የነውዝ ጭጘቊ አጛንድ ጝእክሰድም ቅዱስ ነቭይ መሃመድቱ ልድት የነት የጝ፡፡ ላጥም “አነቢ” ዊንም ነብይቱ ግሬ የነውዝ ጭጘቊም እኩጙ፡፡ እድም አቑ እድ እንቅትቅ ላው ፃቨውድ ነብይ ሙሃመድቱ ልድት ግሬ የው አቐነውድ የጝ፡፡ ሲጘ ቓሊሰውድ፡፡

በልድ ኪብርዘነው ጋብዝ ኩኒያንድ ረቢዓል አርፈይዝ 12ትረ ግርየይዝ ኪብርዘቊ አጛንድ፣ ሺዓንድ ቈሽ ረቢዓል አወል አርፈይዝ 17ትረ ግርየይዝ ኢማም ሻዕፈር አል-ሳዲቅ ልድቲጅቅ ላብጠ ኪብርዝጘኩ፡፡

መውሊድ ረቢዓል አወል አርፈይል ግርየኩ፡፡ አረቭኘ ግሬ እግዝ ግዘይዝ አርቨሸንቱ ዝቨት ጅልውን ሲርየ ፃቨው አቓንስቅ፣ ኢትዮጲቊዙም አነ አውሮፓትቊ ኮሪዙ እግዝግዝኒጅቅ ቺተው የጝ፡፡

መውሊድ ሳዑዲ አረቪያቲስ ቢዘ እንቅ ሙስሊምዝቊ ኻግረኒል ብሔሩ ክቭርዙ በል አቐጘድ ድቊሽትኩ፡፡

ነብዩ መሐመድቱ ልድትዙ ግሬድ ንቕፀቊ ኻግራኒል ኪብረነው ኪርምሸነዊስ በውግ ንቕፀቊ እቅ ነቭዩ ሙሐመድ አኹርሽጘው ጝኒዝጐ ፊረነውዝ ፀሎት ችጝዝጛጙ ዊንጙ፡፡

እኔንም ነቭዩ ሙሃመድ እኹርሽጘው ጝንድ ኹሊፍ ማህዲታውን ዊንደውዝመ ሐሩን- አል ረሺድዙ ኲየን አረይ፤ በዓል- ኻይዙረን መስጊድዝጐ ላውጥሸጘዝመ ንቕፀቊ ምዕመነን አኽቭሽጝ ጝታ ፀሎትድ ችጝዝጘው ሥፍረም አቑ፡፡ ነብዩ መሃመድቱ ልድትድ ኪብርሸነው ኪርምሸውድ፡፡ ጛልቊ እቅዙ በንዝ አቐነው ላው ላው ሚዝርጥ ቓሊስጝሽም ራቢዓል አወል 12ትረ ግሬ ዊንም እድ ግሬየይስ ኪርምጝ ፅበው ሲኑዝ ኪብርሽተኩ የነት የጝ፡፡

ኪርመነዙ ይሽተው ነቭዩ ሙሃመድቱ መውሊድዙ በልድ ኪብርዘቊ ሱፊያንድ ቅምዙ እንሰስዙ መስዋዕት አልስጛጙ፤ ሺከ ኻውሽጛጙ፤ ኹጛጙ፣ ዚጛጙ ኪብርዘቊ ዊንጘጘድ ኢንሳይ ክሎፒዲያ ኢስላምዝመ እንሳይክሎፒዲያ ብሪታኒካ ይሽተው አውደ ጥቨቨንድ ጋልፅጘኩ፡፡

ቺተዝም ቈሽ ኮንሳይንስ ኢንሳይክሉፒዲያ ፊ-ኢስላም የው አውርዝ ጎርደን-ዲ ኒውባይ 2006 ኻትምሰው አውደ ጥቨቪዝ ጋፅ 145-146 አሽ ጋልፅጘጘድ ነቭዩ ሙሐመድቱ ልድትዙ ግሬድ ሚዜንዘቊ አስጝጥ አልሰነውዝመ ሳረድ ቈሽን ዀነውዝ ጣምተቊ ኹረዝቊ አይንታንድ ኹጛጙ ኪብርዝጘኩ፡፡

አሀለል በይት ይሽተቊ እስለምድ ቈሽ ቊርዓን ቀራቀነውዝ፣ ቘደ ይወይውሽተነውዝ በልድ ኪብርዝጘኩ፡፡

በልድ አወይ ኪብርሸው አቐጘድ ቓለናንስ ፅልየል ችጝሸው አል ነጃሺ፣ ራያ ኺጅራ ፎቂስ፣ ሰሜን ወሎስ ዳና፣ ደቡብ ወሎስ ጃማ ንጉስ፣ ባሌስ በድሬ ሸኽ ሁሴን ይሽተቊ ስፍሊል ፊርን ቓለነው ቸልሸኩ፡፡

እን ኒየይል ዳቕሽተቊ ሥፍሊል ኻግርሸንትል ችጝሸቊ ኻይማኖትዙ ቲክነጥድ ላው ሸወጪስ ቃውስ ሸነውዝ አኽቭሽጘኩ፡፡ እን ኮሪዝ በልድ ኪብርዝናንስ ተረቊ አብኒዝም ዀነው ዝየነውድ አልተኩ፡፡ ፍጭር፣ ቢቅ፣ ቢልዝመ ግምልም ዝውሽጘኩ፡፡ ተረቊ አብንድም ተርጘው ጉጒስቅ ችጝሸው አቑዝመ ቃንዝ ፃይጝ አልትጘኩ፡፡

በልድ እብለውዘናንስ አስልሸቊ ኪርብንጥድም ኮረይል እቑርሽጘኩ፡፡ አርቕሽተቊ ኻይማኖትዝቊ አቅልድም ጝታ ቲክነጢጅቅ አቐነውዝ መስጂዲል ዊንም መስጂድዙ ጅሉዘይል ጐይጘኩ፡፡ ዊር የው ጫትም ይውሽተኩ፡፡ ፍጥሩዝመ ነብዩ መሃመድት ወረወርዘቊ ዜምጥ ጊመነው ኪርምጘኩ፡፡ እን ጊዚዝ ንቕፀው ችግሰዝ ኻፅርሽርይ ዓልምሸንስ ዘገም ይጝ ሚንፍስዝ ፍጛጙ ፊረቊ እቅድ ጝታ ድመድ አጉስ ሽጛጙ ጝታ ፋጥረዊዝ ፃይጘው አንክርሽንድ ድምሰነው ኪርምጘኩ፡፡

አኰ ሶላትዝቊ ሰተኒዝመ ኹረዙ ሰት አቒየውዜ ፈወነው እጀውም፡፡ ደውልዝጘድ ቓፀቊ ኪርብንጥድም ጣቀቲል ፅበው እጅርዙ እዘንድ እምጥጘዝ መራጛንድ እክሊል ፅበው እጅርድ ቈሽ ለው እንጐ የነውዝ ጭጝጘኩ፡፡ ስፍረድቅ ቀንትዝ ቀንት አቐኩ፡፡

ጊርቀይዝመ ኻሪዝ ፀሎትዝመ ጨውንዝ፤ ቁርዓን ቀራቐነውዝመ፤ ሐዲሳንድ አንቭቨነውዝ ዲቁሰቊ ምዕመናንድ፣ ቁርዓን ቀራቐነውዝመ፤ ሐዲሳንድ አነቭቨነውዝ ዲቁሰቊ ምዕመናንድ፣ እድ ግርየይዝ ክርጝ ዲብተቊ እቂዙ መቃቭርዙ (ዲብንዙ) ስፍረይዝጐ ፊረነውዝ እደረ ጝታኒቭስድ ገነቲል እቑርጠ ማጥን ፀሎት ችጝዝጝ ዋጥርጘኩ፡፡

ኢትዮጲቊድ መውሊድት ኪብርዘናንስ ላው መስጊድዝጐ ፊርጝ ኪብርዘቊ አቐነውድ ጋልፅሽትኩ፡፡ እንትየው አቕንትድ ዊንም ዲጉ ፍልውልወድ ይና ኻግርስ እቀጘዝ ቀለው አነ ጚ ላጥ ኻግራኒዝ ግነ ቸልጘው አቓንስቅ እቀጘዝ በንሽተው የጝ፡፡

እኔን ዲጉ ፍልውልወድ ግነ ጝቕምቱ አቐው ሲጙ ምላሰን ፃየው የጝ፡፡ አቓንስቅም እኔን ኲርዘው ሲጘድ ላጥ ኻይማኖተንጅቅ ቲስመምንዝመ ጥወጥውሽትን ፅብነ ፃቨው አቓንስቅ ኪብርዝን ፃየነው ኻይማኖቲዙ ቲክነጢስ ኻይሽተው የጝ፡፡ የነውዝ ምኽር ይውሽት በሊዙ አሰነድ ችጘኩ፡፡

ንጉሱ ማሩ መ/አስ/ር

ንኻሽ 30/2017