ሳቁጠ ስወዙ እጅጝት ማዕከልድ ጊቭርዘትነይድ ሊጊሰናንስ ሰራጫጙ የጝ ዩ፡፡

ሳቁጠ አርሽነይ ምርመረ ማእኸልድ ስወዙ እጅጝት ጽየቁ ጁዉንጢዝ ስነ ምህዳሪዝ ቲስመመቁ ቺዘቺዝ የቁ ኽወዝቁ ዚረንድ ጒዝ ጨተይስ አልሰነዉዝ ጊቭርትነይዝ ሰራሻጙ አቐነዉድ አርቒሱ።

ሳቁጠ ስወዙ እጅጝት አርሽነይ ምርመረ ማእኸልዙ ሰቭ ጻጝዘተ አት አዳነ ባህሩ(ዶ.ር) ጋልጽጛንትጘን ማእኸልድ ስወዙ እጅጝት ጽየዉ ወይ ኽምረ ብሄረእቅ ጭሰጭሰኒዝመ ጅዉነድ ጊቭርትነይድ ቈሻንስ ሰራሻጙ ችጝሸኩ።

እንዝም ቺተቺተቁ ኽወዝቁ ዚረንድ ነስሰነዉዝመ ጅዉነይል ጽበቁድ ቈሽ ጝታ ጊቭርትነይድ ምርመረዝ ሊጊሰነዉዝ፣ ዲዝጝሰነዉዝመ ትንዝሰነዉዙ ሰቭ ሰራሻጙ ችጝሸዉ አቐነዉድ ጋልጽጝኩጙ።

ንጭቱ አምረይዝ ደዉሰ፣ መይለዝመ ቦሎቄዝቁ ዚረንድ ቺዝሸነዉዝ ጒዝ ጨተይዝ ትንዝሳጙ አቐነዉድ ዳቕስጝ ንጭቱ አምረይዝም  ከ200 ሄክታር ዝቨ ጣቭ፣ መይለ፣ ዚሩ፣ ደዉሰ፣ ቦሎቄዝመ ማሾዝቁ ኽወኒዝ 200 ሄክታርዝ ሺፍንሸዉ አቐነዉድ ዳቕስጝ ብሄረ እቅ ጭሰጭሰንድ ሻቈ አይንት ዝቨዙ ምህዳር ጽየዉ አቓንድ ቆለ፣ አርቨ ዲቀ፣ እኒዝጘም ዲቀ እንዛይ ስነ ምህዳረኒስ ቲሥመመቁ ቴክኖሎጂያንድ አርቐ አርቒሰነዊል ችጝሸኩ” ይጝኩጙ ሰቭ ጻጝዘተድ።

ቆልቁ ጅውንጢስ ዝቋለ 2 ቀቨሊ፣ አቨርገሌ 3ቀበሊ፣ ሳቁጠ ወረደ4 ቀቨሊ፣ ዲቀ ጅውንጢስ ድሃነ 1ቀቨሊ ቴክኖሎጂድ አርቐ አርቒሰነዉዙ ሰቭ አክንዋጙ ችጝሸኩ።

ምርመረ ማእኸልድ ጝችጘርድ ፍ አርሽነይ ጽ/ጝንድ ቃጽልስጠ ማጥን ለወንትዝ ዞኒስ ኪርም ቀቨሊል አጢስ ጽረዝ ሰራሸነዉዝ ቃጽልትነይ ጽይጠ ማጥን ጒዝ ጨተድ ንቒሳጙ ሰራሽጠ ማጥን ጻቨነዉዝ ንጭቱ አምረይዝ ሳቁጠ ወረደይል 40 ሄክታር ችጘዉ እንቁ ደዉሰዙ ዚረ ንቒሰነዉ ቸልሸጘን ዲቈተድ ጉይጝኩጙ።

ጒዝጝ ጨጥድ ቓጸድ እንስሰኒስ ኹረ አቐነዉ ቸልየዉም ይጘዉ ዋቅረድ እክሰናሥም ኽወዙ ስረንድን ጻቨነዉዝ ቓጸድ እንሰሲስ ኾሽትጠ ማጥን ጥረምረዙ ኽወድ ስረንዘነዉዝ እን አምረይዝ 80ሄክታር ሺፍነዉ አበርገሌትል አርቐ አርቒሰነዉ ሰቭ ሰራሽተጘን ዊግትጝኩጙ።

እን አምረይዝ ሊጘ ቆሺተተ እንቁ ደዉሰዝ ዚረዙ አይንተን ብሄሩ ዚረ ጻድቅዘተ ኮሚቴዝ ጊምግምሽ ጻድቀነዉ ቸልኩ ይጝኩጙ። ነንት ሰቲዝ ጻቭሽታጙ ችጝሸዉ ለዉርድኒዝ ኽወዙ ችብረድ ጭቅተ አቐዉ ተስርድ ቲክነዉ አቐነዉዝ ነንቱ ሰቲዝ ቀሰዉ ይሽተዉ ችብርኒል ጽበጘን ዊግተቁድ ዲቈተድ እቻቐዉዝ እቻቐዉ ቈልቁ ጁወንጢል ዊቱ ዝቨይልም አቕሽ ጒዝየዉ ጒዝ ጨተ እጀዉ አቅሽም እቻቐዉ ፓኬጅድ አሩሽን ፊዘነዉዙ ግትን ጽበነዉድ ዊግትጝኩጙ።

ሳቁጠ ጅሉዘ ወረደ 020 ቀበሊ ጽበተ አቐቁድ ጒዝ ጨተ ድረስ ተስፋየ ዲቈዉ አምረይዝ ምርመረ ማእኸልድ ጻቨዉ ከቨይዝ ዚረዝመ እፍርዘነዙ ከቨይዝ ላዉ ሄክታር አጡ ቺዝጝዙ ዝቨድ እንቁ ደዉሰዝ ሺፍነነዉ ቸልጘጘዝመ ጝጊስም አጡ ጊቭርት ችጘነዉ ቸልጛንስቅ ንጭቱ አምረይዝም 2 ሄክታር ዝቨይል ምርመረ ማእኸሊስ ችጘዉ ዚረድ አሩሽጝ ፊዘነዉ ቸልጘጘን ዊግትጝኩጙ።

ላየ ቓለ ነየተድ ዝቛለ ወረደ 02 ቀቨሊዙ ጽበተ አቐቁ ጒዝ ጨተ እንግዳ ሚሰዉ ጝታጋቢዝ  “አርሽነይ ምርመረድ ዚረዝመ እፍርዘነ ይዋንስቅ እንቁ ደዉሰ እቑመ ሊጘ ጽምር ግሬ ፊዝ ሲዘ ኩንታል ችጘነዉ ቸልኩን። ንጭቱ አምረይዝም 5ጽምር ግሬይል እፍርዘነ አሩሸነዉዝ እንቁ ደዉሰ ፊዝኩን እንዝም እቑመስ አዉግረዉዝ ቺዝየዉ ጊቭርት ችጘኩን የር ኻሊኩን” ይጝኩጙ።

አመልማል ተድላ

ሚስኲሩም 15/2018