ኻግር ኲነናንስ ውሸብልዙ እኩሰድ አውግረው አጠ ጥውሸኩ

ኢትዮጵየ ኽየተ ኽዳሲዙ ክትረ ኲነድ አስር አውግረው ፕሮጀክቲዝ አስልሸነውድ ይፈዝ ድቊሽትኩ፡፡ ክትረይዙ ጊውርሽን ስነ ስረት ኰሪዝ ጥቅለተ ሚኒስትር ዐብይ አህመድ (ዶ/ር)፣ ዲግዙ አለመዝ ግሬው ኒኩሌርዙ ቃወ ግብር ኪርምሸው አቐነዊዝመ ላጥም ሜጋ ፕሮጀክተን ቃፅለቊ አቐነውድ አርቒሰነውድ አስክዝሽተኩ፡፡

ኢትዮጵየ ውርም ቢንቀስ ድኽትዝ ገልታሽረይ ኻግር አቐነውድ ውርዝ ምላሰን አቐነውድ ንቕፀቊ ምላሰንጥ አልሰነው ቸልሸኩ፡፡ ዚምን ጨቨቅ ተረቊ ፖለቲከኝጥድ ጝታ ችግሰድ ትውፅውፀው ጒደነዝ እክሰነው ቸለቊ አቕጛን፣ ኻግር አውማው ዊረተ ኻይሊስ ኻየነው ቸለቊ ውሸብል ሲጘ ሰራሸነው ቸለቊ አቐነውድ አምንሽተው የጝ፡፡ ኢትዮጵየቱ ውሸብልድ ሰራሽጝ ሰራሰቊ ቃወጥ ችጘቊ አጘውዜ አየውም አፍሪከዝ ዓልምስም ቲርፈቊ ጊቭርተንድ ጊቭርዘነው ቸልሸኩ፡፡ ግሬዝ ሻቖን ኾነው ሲመይዝ ቑጠ እክልደነውድ እዳቕ ዓልም አቅቨ ተግዝ በው ቃውሰተ እፃቐተዝመ ለምረተ አቐነው ቸለው ዊኑ፡፡ ቺተንድ ዲግ አቐው ጒደነዝ እክሰነው ቸለነው በቊ ጝር ኹሊዝ ምላሰን ግነ ውሸብለ ኻይልድ ጅውነ ጨቨቅ ከምሸተ አቕ ኻግርዙ ዲግድ ኻምዛጙ ችጝሸኩ፡፡

ሰሀራቲስ ሳ ፅበቊ ንቕፀቊ አፍሪከትቊ ኻግረኒጅቅ ኢትዮጵየ ቲክርክርሽራንድ ገነ ሰራሽነ ጥውሸቊ ሰበን ፅበነውድ ቓለነው ቸልሸኩ፡፡ እኒዙ ቓሊሰነ አቐውድ ቺተቺተቊ ዓልምትቊ ችብረጢዝ ፈቊ ሪፖርተንድ ተምዝን ቓለነው ጭቑ አቐው ሚዝረ የጝ፡፡ ቺተዝም ቈሽ ዲቆቊ 50 እምተንዝ ቑጠ ቲኪየ ቲክሽጛጙ ኻግሬት ቃወቊ ዊግነንድ ዚልቅትነይ ፅየው ኻግሬቱ ችግሰድ እክሰ ችጝጠ ማጥን ሚንውትዝ ሰራሸነው ተሚሰኵ፡፡ ታትነትው ቀርሸው ጒደነዝ ፃጘነውዝ ተከተከው ቀተ ፋጥረነውዝ ኻግርቱ ሊግዝትዝመ በንትድ እግርገ እዳዘው ፃጝት ፃቨነው ውርም ልውጠ ነስጠ ቸልየውምነ ይና ትውፅውፀዙ ፊልየድ ቃውጠ ቸለው ፃጝት ማርፀነው ግድን አጠ ጥውሸኩ፡፡

“አይር ኹልድ ኻግር ለምረተ የጝ” ይሽታንድ የነየንዝ ቑጠ አቒጝቀስ ሚንውትዝ ልውጠዝ ጎቊ ኹል አቐነውድ ደድሰነው ጥውሸኩ፡፡ እን ኹርድ ቃውስ የቊ ኹሊስ ቀሰቊ ይሽተቊ ገበንድ ፊሰነውዝ ፣ ተሚሳቊ ገበንድ ቈሽ እክልዘነውዙ ዲቊትነይ ፊስጠ ጥውሸኩ፡፡ እንዝ ቈሽ አትርን ክንድጝድ ቲክንክነነው፣ ዚምንዝቊ ቴክኖሎጂየንድ ከምረነው፣ ዓልም ችጝረው ሊግዝትዙ ደረጀድ ልብተነው፣ እጅርነይዝ ቃውሰ ይወነው፣ አድልውንዝመ ስጙኒስ ክቕመት እክልሰነው፣ ሞራልዝመ ስነ ሚግቭርዝ ክቕመነት ኲነነው የቊድ ጥውሸውዝ አክንወነው ቸልሸውዜ ኻግርቱ ትውጽውፀዝመ ውሸብልዙ አርውሸትነይድ ደደደድሽታው ውርም ምላሰን ዊንጠ ቸላውም፡፡

ኢትዮጵየቱ ዝቨይስ ጣይትን አሰነ ኰርዝ እክልድ ዲግዝ ፅበነው ቸልሸውድ ኪብረኪብርሽንዝመ ይጊስ ክት ወስረኩ የነውዝ ኻስቨ ኻስቭሽን ፅየነው ቸልሽየውዜ አይር ኹርድም ኢትዮጵየቱ ተምዝትድ ደድስጠ ቸላውም፡፡ ውሸብልድ ዲቈው ኻዝንሰው ሲጘይስ ዲዝጝት ፊስ ጝቕመት ሊጊሰነውዝመ ትውፅውፀዙ ጒደነዝ አስለነው አምርስ ይሽተው ቲግቭር አጠ ተሚሳውም፡፡ እንቸንት ተክረይ ፍጥሩ ፃጀዝ ቀቫሽረይዝመ አትረው ኽዝቭ ፅይረይ ኻግር ውሸብል ጝር ኹልድ ሰቪዝጎ ፍልውልውጘውዜ ጝር ቕመነቲስ ቲርፍጝ ዓልምስ ችጘቊ ንቕፀቊ እኩረን ፅይርኩች፡፡ ውሸብልድም ኻግር ኲንጛንስ አገነድ ይውሽትጠ ጥውሸኩ፡፡

ወንድሙ ቸኮለ

ሚስኲሩም 15/2018