አልም አቅቨ ተግዝ ሚስቅልዙ በል ኪብርዘቁ ኻግረን !!

ክርስትነዙ እምንትዝ እደረ ኢየሱስ ክርስቶስ ሲቅልሸው ሚስቅልዝ ኽየው ክብር ይውሽተው የጝ። ኪርመነዝም ሚስቅልድ ጝቕም ክርስትነ እምንትዙ ቲክነጥዝ አጉረው አርወ ፣ አጉረው እኩሰ እኩሰው ቅዱስ ቅርስ ፃቭሽት ፃይሽትኲ። ሚስቅልድ ጝቕም ቓድንዙ ምላሰን አቓንስቅ እንዝም አዳምስመ ሔዋንስ ኪርመነዙ ጝተ ኽጤትድ ፈቅሸውድ ክርስቶስቱ ስቑርትዝ ሚስቅልቱ አሰነዙ ሲቅልሽንጅቅ ፃየፃይሽተው የጝ።

ቓድንዙ ተከ አቐው ሚስቅልቱ በልድ ኢትዮጵየስመ ኤርትራት ቈሽ ላጥ አልምሸንትል ችጝሸቁ ክርስትነ እምንትዙ ቲክነጥ አምረ ጨቨቅ ኽየው ክቭርዝ ኪብርዝጘኩ።

ሚስቅልቱ በል አጉረው ሮማቱ ካቶሊክዝመ ምስራቅቱ ኦርቶዶክስ ክርስቲያንዙ አምነጥ ፅብጘው ኻግሪልቅ ኪብርሸኩ። እንዛይ ኻግረን ማኽሊስ ዊትቁድ ጉይናንድም ዩክሬን፣ ቼክ ሪፐብሊክ፣ ሩሲየ፣ ፖላንድስመ ላው ላው ጀርመንቱ ክፍለንም በልድ እብለውትዝ ኪብርዝጘኲ።

ቅዱስ ሚስቅልዙ በል ኪብርዘቁ ኻግረኒስ ዩክሬንቱ ኦርቶዶክስ ምከንዝ አጉረው ስፍረ ይውሽተው ግሬ የጝ። ሚስቅልቱ በልድም አምረጨቨቅ ሚስኩርም 27 ግሬዝ ኪብርዝጛጙ ዊንጝሽም ጣቅ ኰሪዝ ካላንደርድ ጁሊያን ካላንደሪዝጎ ላውጥሸነዊዝ ሚስቅልዙ በልድ ኪብርሸው ግሬድም ላውጥሽኲ።

‎ ቼክ ሪፑብሊክትል ችጝሽረይ ካቶሊክ ምከንሸንም እን በልድ ጥውሸውዝ ኪብርዘች። ፕሮስቴጆቭ ችጝሸው ሲጙወ ምከንሸንም በሊዝ ይውሽትረይ ጚ።

ራሽያትጎ ፊርናንድም ታምቦቭ ተከቁ ኻትምጢል ሲጙ ካቶሊክዝመ ኦርቶዶክስዙ ኽየቁ ምከንጥ ፅብጛንስቅ ሚስቅልዙ በልድ ጥውሸውዝ የጝ ኪብርዝጘውድ።

‎ፖላንድ ፥ቺተቺተቁ ኽየቁ ምከንጣን፣ ካቶሊክዝመ ኦርቶዶክስ ምከንድ ቈሽ ፖላንድትል ቅዱስ ሚስቅልዙ በሊዝ ይውሽተቁ የጝ ተክጘውድ።

‎ጀርመንት ቓልናንድ ቈሽ ፥ ባቫሪያት ተከቁ ላውላው ጀርመንቱ ካቶሊክዙ ክፍለኒል ነንም በልድ እብለውትዝ ጝነ መቅደሰኒል ኪብርሽ ግሪየኲ።

በልድ ኪብርሻን ትኰር ‎ጭቅተ አቐው እደረ ኢየሱስቱ ሚስቅልድ ችጝሸነውድ አርቒሰነውዝ ኪርምሸኲ።

ሚስቅልድ ንየስ ንየስ ሸነውዝም እደረ ኢየሱስ ክርስቶስት ሚዘንዘነውዝ፣ ጨወነውዝመ ላጥ ቲግቭረንድ አክንወነውዝ ኪብርዝጝ ግሪጘኲ።

ሚስኩርም 14 ግሬዝ ሲሪሸው 7^ትረ አድለ ዚምንዝ ሚስቅል ኢየሩሳሌምትል ፋርስቱ ለጣሽኒስ እግርገ ዊስ ዋጥረነውድ ኻስቨነውዝ ኪብርሸው በል የጝ።

ኢየሩሳሌምትልም ቅዱስ ሚስቅልዙ በል ኽየው ስፍረ ፃየው የጝ።

‎ሚስኩርም 14 ግሬዝ ኢየሩሳሌምቱ ላቲን ፓትርያርከን ፣ ፍራንቸስኮ ኩስቶስመ ኢየሩሳሌምትል ደርግቭሸቁ ንቕፀቁ   ካቶሊክዙ ስረተን ሚስቅልድ ንየስ ንየስ ሸነውዝ በልድ ኪብርዝጝ ግሪጘኲ።

አቕሽም ኦርቶዶክስ ምከንሽን ጋብዝ ላየ ሽጙዝ የጝ አርቕሽተውድ።

ኦርቶዶክስ ምከንሸን ሚስቅልቱ በልድ ሚስቅልቱ ንየትነይዙ በል ይራጙ ጭጘች። ግሪክቱ፣ ራሺያቱ፣ አረብዝመ ሮማኒያቱ ኦርቶዶክስ አምነጥድም እን በልድ ላየ ግሬዝ የጝ ኪብርዝጘውድ።

ጘጝም ሴፕቴምበር 27 (ሚስኩርም) 17 ግሬዝ ኪብርዝጘኲ።

ሳምራዊት ግርማይ

ሚስኲሩም 15/2018