ጽይነዉድ ጥዉሸዉዝ አሩሸቅ የነዉ ነሠዉ ቖጨድ!

‎‎ለልዙ ጻጀዝ አይነተ ችግሰድ ሙየ ጒይጢዙ አርቕት ቢተ፣ለልዘጥ ጐዘ መዛኒዙ አቕንትዝመ እቻቐቅ የነዉ፣ ወየዙ ኪብርን፣አልስንዙ እጅጝት ዊርተዙ ችግሰ፣ ኽግዝ ቢዘ አቐዉ አንጸ አርመዝመ አንጸ ኾይረዙ ኬሚካል አሩሽን ዚርፊዝቁ ችግሰን ጛይ። ነንት ኮሪዝ ብላ ክልሊዝጘድም አነ ወይ ኽምረ ብሔረ እቅ ጭሰጭሰኒዝጘድ አጉረዉ ለልዙ ጻጀ ጻየዉ አቕሽም ኽግስ  ቢዘ አቐዉ አንጸ ኾይረዝመ አንጸ አርመ ኬሚካል አሩሽን ጽበነዊዝ ምላሠን ለልዙ ግሪድ ቃጽቫጙ ችጝሸኩ።

‎ኢትዮጵየቱ ፌዴራል ዲሞክራቲክ ሪፐብሊክ ጥቅለ አቃቪ ኽግ ቒየ እግዘ 660/2022 ታኽሰስ 15 ግሬ 2002 ዓ.ስ ጻድቀዉ ለልዙ ጻጀ እፍርት ኻይንዝ ፈዉ ቕየድ ኻግርሸንትል ለልዙ ጻጀ ጻየቁ ጅውንጢል  ጝነቁዝመ ንግርንዙ ለሊል እፍርት ፈራቓንስ ጻቨነዉዝ ጻጀድ ሳልጠዉ ኢኮኖሚዙ ሊግዝትዝ ጡዉሸዉ እኩሰ ጻያንሰ ቕየድ ፍኩ። እንዝ ሲሪየም  ለልዙ ጻጀ እፍርት የዉ አንቀጽ አቒል አዉማዉ እጅርድቅ ጝቕመቱ ዝቨ ዊንም እንግርነይል ለል ፍርዘነዉ ቸልሸዉ አቐነዉድ እቑረኩ።

‎ለልዙ ኻይን ኽግድ ቓልናንድ ቆሽ  ለልዙ ጻጀ እፍርት ጻጝዘናንስ የዉ ፍጥሩ ጻጀይል ቖጨ ችጝዘዉ ለሊል ለልዙ ጽዉዘ ዲቈዲቁሰናንስ ምላሠን አቐዉ ዊንም ጥዉሽትነይ እጀዉ ለሊል አንጸ ኾይረዝመ አንጸ አርመ ኬሚካል አሩሽን ምላሠንዝ ፣ለሊል ልየዙ ቃጥልሽን ችጝዘዉ አካል5000 ሺኺስ ኪርም 10 ሺኽ ቁርሽ ችጘዉ ጊንዝቭ ቐጻሻንስ ዊንም 3 እምትዝ ኪርም 7 እምትል አሽ ችጘዉ እጹሽዉ ዊንም ሊጘይዝቅ ቀጻሻንስ ጻድቅኩ። ይንም እደሴ ለልዙ ጻጀይል ጥቕዘ ጪሳጙ ችጝሸዉድ ዉር አጠቲ የዉ ገቨድ አንቭቭስነ ቀኑን።

‎ብላ ክልሊል አጉረዉዝ ሳረዙ ጊቭርት ጊቭርትሸዉዝመ ዊርተዝ ማርጽሽተቁ ሳረዝቁ ጊቭርተኒስ ላዉድ ወይኽምረ ብሔረ እቅ ጭሰጭሰኒል ጊቭርትሸዉድ ቃዉሰተነይዝ አርቕሽተዉ አቐነዉድ ሙየ ጒይጥ ዊግትጘኩ።

‎ነን ነን ግነ ቂስምሸቁ ጽየንዝመ ለሊዙ ሩሄይል ችግሰንጥ አጋልዝጛጙ ችጝሸጘ ቸግሰይዙ አይነተ ዳቕሽተተድ  ቆሽ እን አርመዙ ኬሚካል አቕ ችጝሸኩ።

‎ቺተቺተቁ አንጸ ኬሚካለን ጥዉሸዉ ስፍረይዝመ ኮርድ ኻይጝቀት አሩሽንዝ ጎዉ ሳረዙ ጊቭርቲዝመ እጽዋተንድ ቢክለነዉዝ ንየሥ የቁ አርወ ጽየቁ ለሊል እኒዝጘም ኻዘዝመ ላጥ ኒቭሰኒል አጉረዉ ቆጨ ችጝዛጙ ችጝሸኩ።

‎ወይ ኽምረ ብሄረ እቅ ጭሰጭሰን ድሃነ ወረደይል 026 ቀበሊል ችጝሸቁ ጒዝ ጨተ ለጋሡ ቸኮል አርመድ ድሰናንስ የነዉዝ ኽወይል ትንዝሽተቁ አንጸ አርመ ኬሚካለን ቂስመዝቁ ጽየንድ ድሰነዉዝመ ለልድ ቅወነዉዝ ጊቭርትድ ቃጽቭጠ ጻቭኩ።አርመድ ድሰናንስ የነዉዝ ኽወኒል ትንዝሽተቁ አንጸ አርመ ኬሚካለን ቂሥመነ ጽየንጥድ ድሰነዉዝመ ለልድ ቅወነዉዝ ጊቭርትድ ቃጽቭጠ ጻቭኩ ።

‎ላዉ ቅፋነይስ 40 ኪሎ ግራም ሳረዙ ጊቭርት ችጛጙ ዊነጘ አስክዝኩ። ጣቅ ኮሪስ እንጐ ግነ ላዉ ለልዙ ግሪዝ እቻቐዉ ቅፋነይስ እጉር ትዊስ ሲዝነድ ቑጠ ጭቑ ችጛጙ አቐነዉድ ዳቕስ ጒዝጨተድ አንጸ አርመ ኾይረዙ ኬሚካል ጥዉሽት እጀዉ ሚልኪዝ አርወል ግሬነዉዝ ለልዙ ግሪዝ ኻደገዝ አጋልሽተነዉድ ጋልጽኩ።

“አንጸ አርመድ አራሠዉዝ የጝ ትኒቶድ 28 ቅፋነ ጻቅ ዊንሽም ዳቐቁድ ግነ 15 ጛይ። አምረ ጨቨቅ ጝታ እግዘድ ቃጽቫጙ ሳረዙ ጊቭርትድም ችጝሻየጘ ጻቭኩ።ዳቐቁድም ጥላድ ትኒተነዉድ ችብርየዉዜ ድዝጥጘ ቸልጘኩ የር ምነነ ቀቭኩን” እቀኽቭሪዝ ልብትንዙ ክንድጝ ይዉሽታን  ችግሰድ ቃጽቭጠ ቸለኩ የዉድ አት ለጋሱ ቸኮል”ምጝስት ጋቢዝ ለልድ እክል ሰፍረይል ፊራይጘጘ ሙየዙ ከቨዝመ ጝን እንግርነይል ቢቁለቁ ጽየዝቁ ዚረንድ አልሰነዉ ቸላን ቀሰዉ የጝ”።

‎ላየ ድሃነ ወረደይል 026 ቀቨሊዙ ጽበተ አቐቑ 2013 ዓ.ስ ኪርም ሰቭድ ኪርምጝ ለሊል ችጘዉ ሳረዙ ጊቭርቲዝ ጝታ ጝነቁድ አርሽነይዙ ሰቪስ ቆሸዝ ጭሰጭስጛጙ ጝታ ቑርድም ክንስጛጙ ችጝሸቁ አት ገብሩ ደሴ ኬሚካል ሰት እጀዉ ትንዝሰቁድ ችብስጛንስ ሚሪሸቁ አካለኒዝ ሚሪጝሽም እክሰ ይዉሽተነዉ ቸልየዉ አቐነዉድ ዋርዘነዉዝ አይነተዝም ሳረዙ ጊቭርቲል አዉግረዉ  ቖጨ ቲክንዛጙ ችጝሸኩ ይጝኩጙ።

“አንጸ አርመ ኬሚካልጅቅ ጻየ ጻይሽተዉዝ ሰት አጀዉ ትንዝሰቁድ ሙየ ጒይጢሥም አነ ትንዝሰቊስ ድቁናንድ ዊትቁ ለሊዝ ይን አወሽን ኻግሪዝ አቐዉ ጊቭርትዙ ጥላድ ችብስነኩን የዉ ዊሰ ነይጘኩ።”

ጻይጝ ዊንጘዉ 5 ለልዙ ቅፋኒስ 4 ይዝጐ  ጊምኩ። ጥላድ ጊግቨዉ አካል እጀዉ አቐነዊዝ አዊንም ሻቅጠ ማቅጠኒዝጘ ሱቀኒል ቅይሻጙ ችጝሸዉ አቐነዉድም  ዊኑ ዋርዝጘዉድ።

ቖጨ ቲክንዛዉ አቐነዉድ ልብታዉ ጒዝ ጨተ እጀዉ አቕሽም ናኒዝ አርመናንስ ሲዙረነዉዝ ጥላድ ትንዝስጛጙ ችጝሽጘኩ፡፡ የቁድ ቆሽ 026 ቀቨሊዙ እንሰስ ፍርዝን ሙየ ጉሬ ዊዝር በለጡ አድኖ “ጒዝ ጨተድ ለልዙ አርወድ አርቓዉ አየዉም ይንም ሲን 5ስ ኪርምን ልብትን  ፋጥረነ ክንድጝ ይዉናጙ ተርንሽም ናንዝ አርመነዉ በናቁ አቐነዊዝ አርመዙ ኬሚካልድ የጝ አሩሽጘዉድ” ይጝ ኩጙ።ለሊስ ጭቑ አይጝቀስ ዝቨዙ ማእድኒል ቖጨ ችጝዘዉ አቐነዉድ ሚዝረንጥድ ዳቕስጘኩ።

ወይ ኽምረ ብሄረ እቅ ጭሰጭሰን ድሃነ ወረደይዝጘ 20 ሺኽዝ 562 ለልዙ ቅፋነ ችጝሸኩ። እን እግዘድ ቃጽቭጠ ጻቭሰዉ አንጸ ኬሚካልዙ ትንዝሽትንድ አቓንድ ኬሚካልድ ትንዝሰቁድ ተግረ ፊሰናንስ ኮሩ ጻዉተዙ ችግሰድ ፊትነዉ አቐጘዝመ እን ጫረይዝ ጭቑ 558 ለልዙ ቅፋነ አንጸ አርመ ኬሚካልዝ ድዝጠ ቸለነዉድ ዊግተቁድ ቆሽ ድሃነ ወረደ እንሰስዝመ ኻዘ እፍርት ጭሰጭሰን ጽ/ጝን ዙ ዲቈተ አት መለሠ ባየ ዊግትጝኩጙ።

“ጥቅለዝ ወረደዝጘ ለልዙ ቅፋነ 520 ባኽሉ፣2ሽኽዝ787 ዚምኑዝመ 445 ከረ ከረተ ቅፋን እኩጙ። እን ሊጘ እምቲዝ ፊትናጙ ጽበዉድ ጒዝ ጨተይስ ቀሰዉ ልብትን ፋጥርን ኩኑን ለወትረድ  አንጸ ኬሚካል ትንዝሰነዉ ኽግዝ ዋቕርሸተ

ጻቨዉ አቐነዉድ፣ሊጘትረድ ቆሽ ለሊስ ጭቑ አይጝቀ  ቺዝጚልም ቖጨ ችጝዘነዉድ ልብስናጙ የጝ።አነጚ ጅዉነይል ጽበዉ ጻዉተዙ ችግሰድ ሳረ ጊቭርዘነዉ ሰቪል ዉላቐቁድ ቖይዛጙ ችጝሸኩ እንዝም ሲሪየ ነንቱ ጫረይዝ ጭቑ 6.58 ለልዙ ቅፋነ አርወይስ ቢዘ አቕኩ” ይጝኩጙ።

‎ብሄረ እቅ ጭሰጭሰኒዝጘ 120 ሺኽዝ ንየ ለልዙ ቅፋነ ችጝሸኩ። ለሊል ጥቕዘ ጭሳጙ ችጝሸዉ አንጸ  ኾይረዙ ኬሚካል ትንዝንድ ሳረዙ ጊቭርትድ አጉረዉ ተግዝ ቃጽቭጠጘ ጻቭሰጘድ ወይ ኽምረ ብሄረ እቅ ጭሰጭሰን እንሰስዝመ ኻዘ አፍርት ጭጝሸተ ጽ/ጝን ዲቈተ አት ሲሳይ አያሌዉ “ኽወዝ ይሽት ትኒተዉ ኬሚካልድ ለልዙ ግሪል አዉግረዉ አቕንትዝ ፈተነ አቓጙ ተርኩ። እን ገቨድ ችብራንስ መ ችብጠቅ ይሽ እኳን ሰት ማርጽሽት ትኒጠ ማጥን  ክልሊዙ ምኽር ጝንድም አነ ብሄረ እቅ ጭሰጭሰኒዙ ምኽር ጝንድ ምኽር ጝን ተግዝ ቕየ ፊስሽም ፋጽምጽመዙ ግትን ጽበነዉድ ጭቭረዉ አየዉም”የጝ ይጘዉድ።

ብሄረ እቅ ጭሰጭሰኒዝጘ  ለልዙ ጻጀይልም አነ ለሊዝ ችጘነዉ ጡዉሸዉ አርወድ ጊዝስ ጊዝዝጐቃጽቫጙ ችጝሸኩ።እን ችግሰድ ጊግቨናንስ ችጘር ጒይጥ ችብረንጥ ጅቅ አቐነዉዝ ለልዙ ኻይንዝመ ኽግዝመ ደንብድ ኪብርዘነዉ ሰቭዝመ እቀ ኽቭሪዝ ልብሰነ ኻትርሰነዉ ሰቭ ሰራሽታጙ ችጝሸኩ ይጛንድም አት ሲሳይ ዊግትጘኩ።

“ኬሚካልዙ አርወ አሩሽኒጅቅ ጻየ ጻይሽት ብሄረ እቅ ጭሰጭሰኒጅቅ  ምኽርኽረ ጻቭን ኩኑን እኔንት ምላሠን ጻቨነዉዝም ተረዊዝ ጻጝሽተዉ አቭላይተዝ ሚሪየ እቑርሽተኩ ይን ኻስቭነኩን”፡፡

ለል ላዉ እጅሪዙ ጻጀ ጭቑ አይጝቀ ኻግርዙ ጻጀ የጝ።አንጸ አርመድ ትንዘቅ የነዉዝ እቀ ኽቭርድ ጝቅመቱ ልቅረ ጻቫን እኒዝጘም ሚሪሸቁ አካለን  ክንስጥጘ ቸለዉ ተግረድ ፊሰነዉዝ ለልዙ ሩሄድ ሳብጥዘናንስ ልቕረ ጻቨነዉ ጥዉሸኩ ይና እጻ የጝ።

አመልማል ተድላ

ሚስኲሩም 30/2018‎

- Advertisement -spot_img
- Advertisement -spot_img

Latest article

AMECO Himitgna