አልምቱ ኹረዙ ድርጅት ኢትዮጵየስ እትለዉ እገረ ጊቭርት ብክንትድ ኻስቭዘተ ተጊል ችጘጘ አራሰዉ ጻቭኩ።
እንዝም ይነ አልምስ ኹረዙ ጥር ጻየ ጻይንዙ ግትንዝ ምላሰን 100 ሚሊዮን አሜሪካ ቱ ዶላር ችጘዉ ጊንዝቭ ቢሰኩ የጝ ይሽተዉድ።
ይነ አልምቱ ኽዝቭድ ኹረዙ አርወ አሩሽን ቲኩርት በዉ አቐነዉድ ድቁሽተኩ። እገረ ጊቭርት ጻየ ጻይኒስ አርወ አሩሽኒል አጢስ ጽበቁ ጻጝን አቒስ ኹረዙ አረይል እትለዉ ብክንትድ አጉረዉ አቐነዉድ ሚዝረጥ ቓሊስጘኩ።
አልምቱ ኹረዙ ድርጅት(ፋኦ)ጣቂዝ አርቒሳንትጘ አልምቱ ኽዝቪስ አምሩ ድረይስ ማኽል 1.3 ቢሊዮን ቶን አጡድ ብክንትዝ ጻቭሰኩ። እንም ጥቅለ አምሩ ጊቭርትድ ሲዝነ አጡድ ጻይኩ።
ብክንትድ 990 ቢሊዮን አሜሪካቱ ዶላር ቑጠ ኪሰረ ጪሰዉ አቐነዉድም የጝ ሚዝረድ ቓሊሰዉድ።
እድወ ንጭቱ ጽፈሽዝ ጊቭርትዙ አኽቨ አኽቭን ጋዝ ጊቭለ ወረደ 01 ቀቨሊይዝጘ ዉር ተከኩ የዉድ አንቭቭስነ ቀኑን።
ኢትዮጵየስ አርሽነይዙ ጊቭርተኒል አምረ ጨቨቅ እትለዉ ብክንትድ ኻስቭዘኩ።ጥቅለ ጊቭርቲስ 20ስ 30 ላይል ብክንትዝ ጻቭሰጠ ቸለዉ አቐነዉድም ጽንኸን ቃሊስጘኩ።
ብክንትድ እትለዉድ እክሰዉድ እገረ ጊቭርት አኽቨ አኽቭን ኮሪዝ አክንዉሸቁ ጥንቅቀ ጒድለዉ ተሥር ምላሰንዝ አቐጘ ወይ ኽምረት ብሔረ እቅ ጭሰጭሰን ጋዝጊቭለ ወረደ 02 ደብረ ወይላ ቀቨሊል ችጝሸቁ ጒዝ ጨተ ሲሳይ ስዩም ስልክዝ ጻቭነዉ ዊንተይዝ ዋርዝጛንትጘ ጛት ቆሽ ላጥ ጅዉነይዙ ጒዝጝ ጨጥድ ጊቭርትዙ ብክንትድ ማኽተናንስ ጻቭጘዉ ልቕረድ ሳሥ የዉ አቐነዉድ ዊግትጘኩ።”አይርንዝ፣ጣብንዝ፣ ጝኒዝጎ ጕዥታን ትኮር እኒዝጘም ቅፋነል አኽቭናንድ ጥንቅቀ ግተዉዝ አቃንስቅ ብክንትዝ ጻብሰኩ።”ይጛንድ ዊኑ ጒዝ ጨተድ ዋርዝጘዉድ።
ናዘዝመ ቺተቺተቁ ኾይርጢስ ማኽተናንስ አክንዉሸቁ ኬሚካልዙ ትንዝንድ ጫይረነዉ ትኽኑ አረይዝ ቘጨ ጽየጘን አስክዘ ጽየቁ አቐነዉድ ልብስጝኩጙ። አነጚ ይጘኩ”ጣቅ ኮሪስ እንጎ ብክንትድ ኢኮኖሚል ችጝዘዉ ጥቕዘዙ አቕንቲል ጒዝ ጨተይዙ አሰክዘድ ሊግዛጙ ችጝሸኩ”ይጛንድም ጋልጽጝኩጙ።
አይርን ኮሪዝ ችጘዉ ብክንትድ ቃጽቨናንስ 2 ሄክታሪስ ንየ ጒዝጘዉ ስቅምዝመ በቂለ እኒዝጘም ጣቭድ አርሽነይ ሙየ ጉሪየይስ ቸጘዉ ክንድጝድ አሩሽጝ ቃዝ ቃዝየዉዝ ችጘቁ ችጘቁድ በክንዚንቀት አኽቨናንሥ አስልሽጝኩጙ። ጊቭርትዙ ዚምኒዝም ችጘናንሥ ኻሊጘዉድ 30 ኩንታሊስ ንየ ቺተቺተቁ ኽወጥድ ዚምኑ አቕ ተሲተዉ በርሚልዙ ጎመዝ ጻጉዘናንሥ አስልሽት ጻቭጛጙ የጝ። 3 አጥጘ ጎመዝቁ በርሚለን ጝታ ጅቨነዉድም ደድስጝኩጙ።
ላየ ስልክዝ ዊግስነቁ ጋዝጊቭለ ወረደ 02 ደብረ ወይላ ቀበሊዙ ጽበተ ጒዝ ጨተ አድኖ አበባዉ ነንት ኮሪዝ ማጽወዙ ኽወዙ እፍርት ጝታ ሰቭድ አክንዉጛጙ ችጝሸቁ አጛንድ 2ሄክታር አጠ ጝታ ዝቨድ ቺተቺተቁ ኽወኒዝ ሺፍነነዉ ቸልጝኩጙ።
ጊቭርትድ ሊጊስጥጘ ቸለቁ ጥወራንድ ቃዉስጝ አሩሸነዉ ቸልጛንስቅ ነንቱ ሰቲዝ ጽበዉ ጝታ ኸወዙ ጊቭርትድ ቀሰዉ ችብርኒል ችጝሸጘዝመ ስቅመድ ችጛንስቅ አይርጛጙ አቐነዊዝ ጥንቅቀዝ ጉየነዉዝ ተረዊዝ ሚንወዝ አሩሸናንሥ አስልሽት ጻቭጛጙ ችጝሽጘኩ።”ንጭቱ አምረይዝ ቺዝ የዉ ጊቭርት ችጛንስ የር ይችዝጝድ ጡዉሸዉዝ አስለነዊስ ኪርም እፍርዘነዝመ ማርጽሽተዉ ዚረ አሩሽ ፊዝኩን ።ነን ጽበዉ አቕንቲዝ እቑመ ላዉ ሄክታሪስ 20 ድቋል ይጝን ድዉኩን ንጭ ቆሽ እቑመቲስ ቺዘዉዝ 30 ኩንታሊስ ንየ ችጘኩን የርኩን”።
አረዙ ብክንት አጋልዛየጘን አጡ አቐዉ ክንድጝ ሙየ ጒይጢስ ችጝጘጘ ጉየቁድ ጒዝጨተድ ጥንቅቀዝ አይርጝ ኪምርጘት እግረ አረድ ጣብንዝም በክነዉ አቐነዉዝ ኬንደ ጅቭጝ ኬንደይል ኪምርጝ ጣበናንሥ አስልሽትድ ኻትጘጘም ጋልጽጝኩጙ።
ጋዝ ጊቭለ ወረደ 02 ደብረ ወይላ ቀቨሊዝጘ 11 ሺኽዝ 72 ሄክታር ዝቨ ፊዘናንስ ኻሊሽት 11 ሺኽዝ 28 ሄክታር ዝቨ ጒዘነዉዝ 17 ሺኽዝ 320 ኩንታል ጊቭርት አኽቨናንስ ኻሊሸጘን ዋርዘቁድ ቆሽ ጋዝ ጊቭለ ወረደይስ ደብረ ወይላ 02 ቀቨሊዙ ኽወዙ እፍርት ሙየ ጉሬ አቐቁድ አት መኮነን ካሣ አጛንድ ነንቱ ጫረይዝ ጝታ ቀቨሊይዝጘን እንዝ ሚቅ እትል አርቓዉ ስወ ጣቅ ግሬይል አጢስ ሊቫጙ ዊነጘን ዊግትጝኩጙ።
” ጅዉነይል ሊቨዉ ስወድ ንቕጸዉ ዊናንስቅ አርድ አይርሽጝቀት ችብርንዝ ዊንጠ ማጥን ክንድጝ ይዉነዊዝ ሲሪየ ስወድ ዳቓጙ ተራንድ ነን አይረነዉ ኪርምጝኩጙ”። አይርጛንድ ብክንት አጋልዛየጘዝመ ኾይረዝመ አቑዝ ስጙርሻየጘ ኪምረነዉ ብጣድ ዝቨይስ 50 ሴ.ሜ ዝቨይስ ንየሥ ይጠ ማጥን ክንድጝ ይዉሽታጙ ሰቪል ጥዉሽትኩ።
ጒዝጝ ጨጥድ ከቨከቭሽትን ሰራሸነዉዙ ዲዝጝት ጝታ ባኽል አቕሽም ክላሥተርዝ ላዉ አይንት ዚረ ፊዘነዉዝ ጒዘነዊስ ኪርም ጣብጝ ጝታጝን ድዉጥጙዊል አሽም ተገተግሽትጝ ሰራሽጘኩ ይጘኩ ።”ቀበሊይዝጘም 38.5 ሄክታርስ ንየ ክላሥተዘርዝ ፊዘነዉዝ እኒስም ፐር ሄክታሪስ 13 ኩንታል ችጘናንስ ኻሊሽት 96 ጒዝጝ ጨጥ ክላሥተርዝ ጒዝስን ላብጠ ሰራሽን ሊግዘነዉዙ ጒደነድ ቓሊስናጙ ችጝሽነኩን”ይጝኩጙ ኽወዙ ሙየጉሬ አት መኮነን ካሳ።
ቺዝጚስ ኰኩለይል አጢስ እትለዉ ኹረዙ አረ ብክንትድ ማኽተናንስ እንቅም ቀቨሊዙ ጅወንጢል ችጝሸቁ ጒዝጝ ጨጢስ አስክዘ ፋጥርሽኩ። እኒስ በዉግ ዊነዉድ ባኽሉ ኽወዙ አኽቨ አኽቭንድ ኽወይል ብክንት ችጚጝቀ ጥንቅቀዝ አይረነዊስ ኪርም ኪምርጝ ጝኒል ድዉጥጙዊል አሽ ጽበዉ ዲዝጝትድ ቀሰዉ አቕሽም ቲክንክነዝ ሙየ ጒጥድ ጒዝጝ ጨጢስ ቺታቁ አቐነዉድ ልብስጝኩጙ።
እገረ ጊቭርት ኮሪዝ አጋልዘዉ ብክንትድ ቃጽቨናንሥ ጻቭሽታጙ ችጝሸዉ ፍልዉልወይስ ጋብዝ ጋብ ጝኮርድ ኻይየዉ ስወ ጊቭርቲል ቲክንዝጠ ቸለዉ ቖጨድ ጊግቨናንሥ አጉረዉ ሰቭ ሰራሽታጙ ችጝሸኩ።”ጅዉነይል እንትየዉ ስወ ሊቭ አርቓዉ አቓንስቅ ቃዝየዉዝ ችጝጥጘ ቸለቁ ጎታቲ ፣ብስርዝመ ላጥድም ፊዝጥጘ ማጥን እንጎይስ አስልሽት ጻቭናጙ የጝ”ይጝኩጙ።
ኽወዙ ጊብርቲጅቅ ጽየጽይሽተዉዝ ወረደዙ አርሽነይ ጽ/ጝንድ ቺዝየዉ ጊቭርት ችጘናንስ ቃዉሰ አስልሽት ጻቭሽት ሰቪዝጎ ጥዉሽተነዉድ አርቕሽተኩ።
ወረደዙ ኽወዙ እፍርት ጓነ ቃወተ አት ተፈራ ሙሉየ ኽምጠ ዊከዝ ስልክዝ ዊግትጛን ትጘ ጊቭርትዙ ዚምኒዝ 19 ሺኸ 667 ሄክታር ዝቨ ኸወዝ ሺፍነናንስ ኻሊሽት 19 ሺኽ 628 ሄክታር ዝቨ የነትም 99.8 ዝቨ ዚረዝ ሺፍነነዉዝ 283 ሺኽ 171 ኩንታል ጊቭርት ችጘናንስ ኻሊሽት ሰቪዝጎ ጥዉሽትኩ ይጝኩጙ።
ጓነ ቃወተይዙ ጋልጽኒዝጘም ኻሊሽተዉ ኻለይድ ችጘናንሥ እጅር ሰራሸተ እፍርዘነይስ ኪርም እየይዝ አስልሸዉ(ኮምፖስት)አግልግለዝ ግሪጠጘ ጻቭሽትኩ።
ኽወድ ክላስተርዝ ጒዘነዉዙ ዲዝጝት ኮሪስ ኮር ቆሻጙ ተረነዉድ ልብስጝኩጙ።”ኽወድ ክላስተርዝ ጒዘነዉ ቺዝጝዙ አስልሽቲስ ኪርም ኽወዙ አኽቭኒል አጢሥ ተከተከዉ ሰትዝ ሰቭድ አክንወነዉዝ ጒዝጝ ጨጥ ማኽሊል ዲዝጝትዙ ልዉጥዉጠ ጽብጠጘን ሚቸዉ አቕንት ፋጥረኩ”ይጝኩጙ።
ስቅመ፣አትረጘ፣በቂለ፣ጣቭዝመ ተከተከቁድ ፍራትዝ ጊቭርትዙ ዚምኒዝ ፊተቁ ኽወን ጛይ።ነን ጽበዉ ተጊዝ እንቅ ኽወዝቁ አይንተንድ ቀሰዉ ይሽተዉ ተጊል የጝ ጽብጘዉድ ይጝኩጙ።ኻሊሽተዉ ኻለይድ ሩዘናንስ ቸልሰዉ ችብርኒል አቐነዉድም አቭርኽርኽዝጝኩጙ።
ጥቅለዝ ክልሊዝ 2017/18 ጊቭርትዙ ዚምኒዝ187 ሚሊየን ኩንታል ጊቭርት ችጘናንስ ኻሊሽትኩ፡፡ እን ኻለይድ ሩዳንስም ኽወድ አኽቭሽት ጝን አቒል ጡዉጡዊል አሽ ብክንት አጋልዛየጘን ጻቨነዉዝ ኻለይዙ ሩድኒዝ ይና ችጘርድ ፍነ ይነ እጻ የጝ።
አመልማል ተድላ
ሚስኲሩም 30/2018