ኽወ በክኒንቀት ፤  ዲግ ዘስክርሺንቀት አሩሽነ ጡሸኵ!

ላይ ኻግርስ ዲግ አቐነው 60 ናን ኢኮኖሚዙ ሊግዝት ሚዝግቭሻንስ ምላሰን አቐጘ ዓልምቱ ፒስ ኢንዲክስ ሚዝረድ ቓሊሰኵ፡፡  ኢትዮጵየትል፣ ብላ ክልሊል የውም  ወይኽምረ ብሔረእቅ ጭሰጭሰኒል ጥቅምት አርፈድ ኽይጠ አዝምረ አኽቭሸው ኰር የጝ፡፡

አነጚ ላዘ ጋቢዝ ቈሽ ሊጘ እምታንዝ ቊጠ ፈነ ጥወነ ቢሰው ክልሊል ፋጥርሸው ኽምዘድ እንቅዝቅ ጽጋ አቐጘ ቃጽልኵ፡፡

ወይ ኽምረ ብሔረ እቅ ጭሰጭሰኒል ንጭቱ ጊቭርትዙ ዚምኒዝ ጕተው እንቅ አይንት ዚረይስ ላው ነቊጠ አኰ ሚሊዮን ኵንታል ችጘናንስ ኻሊሽት ሠራሽታጙ ዊንኵ፡፡

እኔን እርፋኒዙ ልቕረድ አዝምረ አኽቭሸውድ እግረ ነን የጝ፡፡ እን ኰሪዝ ለዊዝም ጻግቪዝም ቃርዙ ነጋሪት ድድበቊ ዊግናን ቈሽ ኽዝቭድ አቕል ጻቫየጘ ሠራሽጛጙ አቐጘ አርወዙ እማን የጝ፡፡ አነጚ እን ቃርዙ ነጋሪትድ ፣ ዊርንዙ በንድ፣ ኻይላንዙ ገጫሽንድ አዝምረ አኽቭኒዝ ፈተነ አጠ ጡሻውም፡፡

ኽዝቭድ  ጝተገተግሽኒዝ ላው ናኒዝ ጝዲግድ ኻይሳጙ ላዘ ናኒዝ ቈሽ ጝአዝምረድ ጡሸውዝ አኽቭጠ ጡሸኵ፡፡

አረ ጡውሸዉዝ ጻጝትዝ አኽቨነው፤ ኪምረነው፣ ጣበነውዝመ አኽቨነው ኰርድ ሊምደው ጻጝት የጝ፡፡

ኰርድ ኻይየው ስወዝ ጨቅሻየጘም ላው እዘንዝ ሠራሸነው ጡሸኵ፡፡ ጡሸውዝ አኽቨነው 30 ናን በክነው አረድ ጒትረይዝጎ ጥዋንስ ከቨኵ፡፡

ተከተከውዝ ፍልውልውን ሠራሸናንስ፣ ችጝሸው አረድ አርየይዝጎ አልሰናንስ፣ ገረዱ ሰቭ ሠራሸናንስ ፣ ጽዊተውድ ጥላል ችጝዘናንስ፣ ዲግ አይነተ ገቨ አቓንስቅ አንጻሩ ዲግድ ችግሰ አቓየጘ ዘስክርሸነው ጡሻውም፡፡ ዲግዙ ወነድ አዊስቅም ንየ ጋጽ ይወው ፣ ጋጽ ጊቨውድ ኽዝቭ የጝ፡፡ እን ገቨድ እቈሳጙ ኪርም፤ እቈሳጙ ዊሳውም፡፡ ከዝጝዝመ አቚዝጘ የጝ፡፡

ወይቱ ኽዝቭድ አዊስቅም ንየ ለወዝመ ጻግቭዝ ጉይሽተቊ ኰር እኹረቊ ኽዝቭዙ ብርት ሊክየንጥ አጀንድጢዝ ዊሊቲንቀ ቃውስ የው  ጕየቊ ጝዋቕርጢል ትኵርት ጻቭጠ ጡሸኵ፡፡ ቃል ጥውሽትጝ ሰቭ ኪርምሽየቊ ዚምን ኹⶓጙ ኻጚተቊ ፕሮጀክታንድ ዊሰ ችጛንስ ሠራሽጠ ጡሸኵ፡፡ አዊንም ሚርየይዝ ተረቊ ወይቱ ኽዝቭድ ሲትፍዘው ቃርዙ ጎነ አርዋው አቐነውድ ልብተነው ጡሸኵ፡፡

ቃውሰው ሰቭድ ነን ኪርምሸው ኽወዙ ሰቭድ ጡውሸውዝ አኽቨነው፤ ክንድጝ ጝንጥ ዊርተዝ ክንስጛንስ ከቨነው የጝ፡፡ እኔንም ነንቱ ኹርድ እምጥጘው እገረ ኹርድ ቈሽ አሩሰው አቐነውድ ኻስቨነው ጡሸኵ፡፡

ጅግንትዙ ወይሰዝ ልየል ድወው ጻጝት ተሚሳውም፡፡ ነን ክንሲነው ኹሪስ ቀሰው ሲጘ ሊምደነው ቸልሻውም፡፡ ነን ኢንቨስት ጻቪነው ሰቪስ አለቨ ሊምደነው ቸልሻውም፡፡ ኰርድ ተከነውዝመ ላጥድ ተከነውዙ ጻጝትድ የውም ቘጨዝመ አርወዝቊ ገባንድ እግረ እግረ ወይትቊ ዋቕርጥድ ዊስጛንድ ቓሊነቅ አቓንስቅ ይናወንትቊ በንጢዝ ላጥድ ከቭጛንስ ቸልሰው ችብረዝጎ ላውጥሸነው ጡሸኵ፡፡

ላጢዙ በለ አቐነዊስ ጝወንት ቸለው ዲቭየ አቐነው ጡሸኵ፡፡ እጻሸጥዙ አዊንም ጻጝትድ፤ ኻምዘጥዙ አዊንም ጻጝትድ እርⶓ ሚክረነዊስ ላዘ አርወው ገቨ እጀውም፡፡

ግርማ ተጫነ

ሚስኲሩም 30/2018