አበርገሌ ወረደይል ቢተው “መቅድም ጝነ መጻፍድ” ክንደጥዝመ ውሸብልዝ ቺዝየው አርቕት ፃይጘንስ ከቨው አቐነውድ አርውሸጥድ ጋልፅⶔ።
ጝነ መጻፍ የነት መጻፈን፣ እልቱ ኽትምተን እንዝጘም ላጥ ሚሪየቁ ሚሪየንጥ (reference) ጝተ አይንቲዝጘ ገሪሽጝ ችጝሽጘው ጝን የጝ።
እኔንም ምጝግስትዝ፣ ችብረንጥዝመ ጝሉ እጅር ተግዝ ችበችብርጠ ቸለኲ።
ኢትዮጵየትልም ጝነ መፃፈን ንቕፀዝ ኽይ ኽይ የቁ ኻትምጥል አቕሽ ጚ እጝቅ ጅውንጢል ችጘነዉ ቸልሻውም። ፅበቁድም ምጝግስት ተግዝ ኲንሸቁ ጚ ጝሉ ተግዝ ኲነነው እድቑጠም ዲዝጝሽየውም።
እንዝም ምላሰን ቈሽ እቀኽቭሪዙ አንቭቨነዙ ዲዝጝትድ ሳስ የው አቕኲ።
ጝነ መጻፍ እቀኽቭሪዝ፣ ውሸብሊዝ ቺተዝ ቈሽ ክንደጥዝ አርቕትዙ መድ የጝ።
ወይትጘድም ምጝግስትዙ ጝነ መፅሐፍ ክትሸጘ ችጝሻው ጅውነ የጝ።
እኔንት ልብተቁድ አበርገሌ ወረደዙ እኹርሸተ ዶ/ር ዮሐንስ ዘሪሁን ናፀዝ አግልግለ ይወው መቅድም ይሽተው ጝሉ ጝነ መፃፍ ጊውርስ አግልግለዝ ብዝኲ።
አበርገሌ ወረደይል መቅድም ጝነ መጻፍ ቢተነዊዝም ጝተ አርቕትድ አትርዘናንስ ከቨነውድ አርውሸጥ ዊግትⶔ።
ኒየር አቑ ኻትመዙ ፅበተ ውሸብለ ተስፋይ በዛብህ ጝነ መፃፍድ ቢተነውድ አየው ስፍረል ግሪያይጘጘድ ፃቨነውድ ዊግትኲ።
“ጝነ መፃፍድ ኽትምትዝም አቑ ኮምፒውተርዝ እቑርሸቁ ብጭቕ ዲጂታል መፃፈን ፅይኩ። ንቕፀው አርቕት ችጝናጙ አቓንስቅ አየው ስፍረል ግሪየነውድ በርን አንቭቨነዙ ዲዝጝትድ ሊጊስናጙ የጝ” የኩ።
ላየ 7ትረ ክፍልዙ ክንደተ ናትናኤል ሽሞት ክንድጝ ጝኒል ችጝሻቁ መፃፈንድ ጝነ መፃፍል ፊርጝ አንቭቭጛጙ አቐነውድ ጉይ መፃፊስ ከስጘ ፋጥርንዙ ሰበንድ አትርዘቁ ቲግቭርዝ ዲዝጝዝጘነቁ ጎዘን ፅበነውድ ዊግትኲ።
ዶ/ር ዮሐንስ ዘሪሁን ቅዱስ ጳውሎስ ሆስፒታሊል ኽክምነ ሳይንስዝ ጝተ ክንድጝድ ኻተቁ አጘንድ ነንቱ ሰቲዝም አበርገሌ ወረደል ትኽነዙ ችብረንጢል ኽክምነዙ አግልግለ ይውጛጙ ችጝሸጘኲ።
ዶ/ር ዮሐንስ ዘሪሁን በውግቲስ ኪርም መፃፍ አንቨቨነዙ ጝተ ዲዝጝትድ አጉረው አቐነውድ ዊግተቁድ ጝተስን ዊዝር አያልነሽ ዘሪሁን ጝነ መፃፍ ብዘነውዙ ጝተኻለይዝ ጛይም ቲስመመነውዝ መጻፍ እቑረነቁዝመ ጎየነቁ ወንበረንዙ ከቨ ፃቭጘጘ ዊግትጝኩⶔ።
“ያን ጣውለዙ ሰቭዝ ውላቕ የጝ ሰራሸውድ ይዝን ጝነ መፃፍ ብዘነውዙ ጝኻለይድ ሩዛንስ ተምዝት ፃቀር ዊናንስቅ ጝነ መፃፍዝ አቐቁ ጣውለዙ ከቨ ፃቭኩን”ይጝኩⶔ።
ዶ/ር ዮሐንስ ዘሪሁን ንቕፀቁ መፃፈን አንቭቭጘጘድ ጉየነውዝ ክንደተ ፅብጛጙ ችጚጘቁ አገንጥድ ነን ፅበው ኹርድ ችጝ ጅውነይል አንቭቨተ ኹር ፋጥረናንስ ጝሉ ጝነ መፃፍ ብዘነውዝ ኻግሩ ዲቁትነይድ ፈነው ተምዝጘጘ ዊግትጝኲጙ።
እኔን ቈሽ ኻግርሸንጅቅም አነ አልምሸንጅቅ እርወ ፊረው እቀኽቭር ፋጥረነው ቸልሰው አቐነውድ ጋልፅጝኩⶔ።
“ጅውነይዙ እቀኽቭርድ ጣይትኒዝመ ፍጥሩ ኻደገንዝ ቘይሸው የጝ፤ እነየው ጅውነይዝ ቈሽ እቀኽቭርድ ላዘ እቀኽቭሪጅቅ እርወ አርቕት ፃይ ፊርጠ ማጥን ትኩርት ፃቨነውዝ የጝ ብዘውድ” ይጝኩⶔ።
ጝነ መፃፊልም አማኑኤል ሆስፒታልዙ ክንደጢስ፣ አሚኮ ኽምጣጘ ክፍል አስለተዙ ሙየጒይጢስመ ጅውነይዙ ላውላው እቀኽቭሪስ አኽቭሸቁ 9 ላዝ 67 ኽትምትዙ መፃፈን፣ 3 ሽኽዝ ንየ ኮምፒውተሪል ፃንሸቁ መፃፈንዝመ ፋጥርንዙ ቸልትድ አትርዘቁ ዲዝጝዝጘነቁ ቴክኖሎጂየን ፃየነውድም ጋልፅጝኩⶔ።
ዶክተርድ አውማው እቀኽቭርድቅ ውርም ጊንዝቭ ኪፍሊጝቀት ኻግርዙ ባኽልድ፣ ሲጘ እንዝጘም አልምሸን ችጝረው ተግድ ልብሰቁ መፃፈንድ አንቭቨነውዝ ጝተ አርቕትድ አትርዝጝጠ ጥውሸው አቐነውድ ሚሪጝኩⶔ። እንዝጘም ቈሽ ሚሪሸው አካልድም አንቭቨጢዝ ምቸው እንዝጘም ፋጥርንዙ ቸልት ፃየቁ ውሸብልድ ዲዝጝዝጝሰነዙ ስፍረ ምችዘነውዝ ጝ ችጘርድ ፋንስም ዋቕርጝኩⶔ።
አበርገሌ ወረደ ባኽልዝመ ቱሪዝም ጽ/ጝንዙ ዲቈተ አት ቀለመወርቅ አስማረም
“ዶ/ር ዮሐንስ ኻሰቭዝ፣ ኻይልዝመ ጊንዝቭዝ አውም ከቭሲጝቀት እኒስ በውግ ጝሉ እጅርዝ ሰራሽት አርቓው ሰቭድ የጝ ዲፍር ሰራሸውድ”ይጝኩⶔ።
እኔን ቈሽ ፅበው ኹርድ ጝጅውነይዙ ባኽልድ እሴትድ፣ ፖለቲኩ፣ ኢኮኖሚዝመ ገረዱ እፅቁፅቈድ ልብት ፊረው ኹር ፋጥረነዊስ ከስጘ ውሸብለድ አየው ስፍረይል ግሪያየጘ ፃቨነውዝ አንቭቨተዝመ ጊቭርዘተ ኹር ፋጥረናንስ ከቨው አቐነውድ ሚሪጝኩⶔ።
ዶ/ር ዮሐንስ ጝነ መፃፍ ብዘነዊስ ከስጘ 52 መፃፈን ባኽልዝመ ቱሪዝም ጽ/ጝንዝ እኩስጘጘ ሚሪጝ “ተረዊዝ ጘጝ አልሰቁ ስፍረዝመ ላጥ ዋቕረንጥድ እክሰናንስ ጽ/ጝንድ ሚሪሸቁ አካለኒጅቅ ዊግሻጙ የጝ” ይጝኩⶔ።
ሳምራዊት ግርማይ
ሚስኲሩም 30/2018