ሴፍትኔትዙ አሩሸጢስ ተከ አረይ ጒዝ ጨተ አሰፉ ምትኩ ወይ ኽምረ ብሄረ እቅ ጭሰጭሰኒል ችጝሸቊ ወረጢስ ላይ አረይ ጻግቭጂ ወረደ 01 ጻተ ኻትመይል ችጝሽረይ አንኮረ ጒዝ ጨተ ጚ።
ጒዝ ጨተሸን ጝታ በልቢትድ ጝታጅቅ እጀዉ አቐነዊዝ ምላሠን 3 ኹል ሊጊሠናንሥ ይጝ ጝታለ ጽብንድ ሹሹደነዉ ኪርምጘጘ ጋልጽጝኩጙ። አይንት ኮሪዝ አወይ ይለ ይቑርድ ሊጊሰነዉ ቸለኩን የዉ ገቨድ ጥማ ዊኑ የቊድ ዊዝር አሰፉ ጅውነይል ጽበው ሴፍትኔት አጽቨይል አሩሸተ አጨ ማጥን አገነድ ችጝኩን ይጝኩጙ።”ችጘዉ አገነይዝ እቀጘዝ እምጥጘር ዊናንሥቅ ሴፍትኔትዝ ሰራሸዉ ቲግቭሪዝ ቀሰዉ ፍልዉልወ ቓሊሳጙ ዊኑን”የጝ ይጘዉድ።
እኔንት ጐነ ጻቨነዉዝ ይጽየዉ ዝቨይስ ሰቭ ኪርሙን የቊድ ዊዝርሸን አርሽነይ ሙየ ጒይጢስ ምኽርዙ ኻለይ ለምረነዉዝመ ቺተቺተቁ ዚምኑ ጥወራንድ አሩሸነዉዝም ቀስረይ አርሸ አቕኩን ይጛንድ ዊግትጝኩጙ።
ሚስምርዝ ፊዘነዉዝ፣ ቺተቺተቊ ዚረንድ ፊሰነዉዝ ጫረድ ዲቋንድም አቑ መዉረነዉዝ እንግርነይል አትክልተን እፍርዘነዉዝ ፈን ነሠነዉዝ ይቑርድ ዉርም ግቲጝቀስ ጝታ ክንድጝድ ጡዉሸዉዝ ክንሳጙ የጝ።
“እንዝም ላጥ ይጘን አቐቊ እቑንድ ድኽቲስ ፍጥጘ ማጥን አይነተዝም ይና ዝቨ ጽይን፣ ላጢስ ቲርፈዉ አቑ ጽይን ግድርዳይነጘዝመ ጨዉንዝ ይና ሽጙድ ጭጝሻየጘ ክንሳጙ ይሰቭድ ቓሊሳጙ የጝ” ይርኩች።
እኔንት ቲክንም ወረደይል የዉም ዞኒል ተከ እቁን ጒዝጨተ አቓጙ ቈድሸነዉ ቸልኩን ይጛንድም ዋርዝጝኩጙ።
እንዝም እምጥጘነዉዝመ አዉጉረዉዝ ጒሰጒስሽተነዉዝ ጝታ ቑርድ ከቭስጥጘ ማጥን ጻቨነዉዝ አርሽነይዙ ሰቭድ አትርጝ ቓጽለነውዝ ይወንቱ ኹረዙ ወይትነይድ ደድሰነዊስ ከስጘ ጥፍት ፍርዝጨጘዝመ ግልወ እጀር አቕሽም ጝታ ቑርት ጝታይር ጝታጅቅ ጽበቅ ይሽም ዉርም አይንት ቺግሰ አጋልዚጝቀስ ጝታ ቑርት ክንስጛጙ ችጝሽጘኩ።
እዉነ እፈረዝ ኩየን አቐነዊስ ቖሸዝ ቺተቺተቊ ጽብንዙ ጥቕዘንጥ አጋልዝጝጥጘ ቸልጘኩ። የቁድ ጒዝ ጨተ አሰፉ ምትኩ ምነነ ቀቨቅ የነዉዝመ ጝታወንት አትርዘነዉዝ ያን ቸለኩን የዉ ሚንፍስዝ ሰራሽጝ ጝታ ችግሰድ ኻቓይጘው፣ ጝታቑርድ ቺዝየዉ ተጊል ችጝዛይጘዉ ዉርም ምላሠን ዊናዉም።
አት ነይኑ በላይ ዊዝር አሰፉቱ ግዘ ጛይ። አት ነይኑ ዊዝር አሰፉ እቀጘዝ አትርድረይ፣ ሰራሽር ሰራስረይ፣ ላጥድም አወይ ያን ጝሪግስ ጽጐኩን የዉ አኑሽን ፋጥረቊ ይና ጅውነይስ ተከ አቐቁ ጒዝ ጨተ ጛይ ይጝኩጙ።
ጻግቭጂ ወረደዝ 01 ቀቨሊዙ አርሽነይ ሙየ ጉሬ አት መብራት ማሞ ጒዝ ጨተ አሰፉ ሳሥ የዉ ጽብን ጽበቁ ይሽትጝ ሴፍትኔትዙ አሩሸተ ዊንጘጘን ጋልጽጝ ሴፍትኔትዝ ኻትሽጝ ጻቭሽተው ከቨዝመ ይውሽትጘዉ ክንድጝድ አሩሸነዉዝ ልቕርደቁ አጝኮረ ጒዝጨተ ጛይ።
ጻግቭጂ ወረደ ጻተ ቀበሊዙ አርሽነይ እፍርት ጣቪየይዙ ዲቈተ መብራት ሞሞ ኲየንጣኒዙ ጥወርድ ሊጊሰነውዝ ትኽኑ ኹር ኲነናንስ ኲየንጣን ዊትወ ዝቨትል ፈኑ ፃቭጠ ቸለው ሰቭ ሰራሽንጠጘ ፃቭሽታጙ አቐነውድ ጋልፅጝኩጙ፡፡
ዲቈው አምረይዝ 20 ኲየንጣን አትክልትዝመ ፍረምረዙ ዚረ ከቨ ፃቨነውዝ ሰቭድ ኪርምሸነውድ ጉየቁድ አት መብራት ማሞ ነንቱ አምረይዝ 50 ኲየንጣን አሩሸተ ፃቭሽተነውድ ጋልፅጝኩጙ፡፡
ጻግቭጂ ወረደ አርሽነይ ጽ/ጝንዙ ቲከነተ ዲቈተ አት አብርሃ ደሴ ወረደ ተግዝ ኲየንጣኒዙ ጥወርድ ሊጊሰናንስ ዊትወ ዝቨል ቺዝ የው ጥወር ችጚሰው ሰቭ ሰራሽተነውድ የጝ ዊግትጘውድ፡፡
“ዲቈው ዓምረይዝ 930 ንየ ኲየንጣን አሩሸተ ፃቨነውዙ ሰቭ ሰራሽትኩ የቁድ ጓነ ቃወተድ “ነንቱ አምረይዝም”
ወረደይል ቺተቺተቁ ከበጥ ጛልትቁ ድርጅተንድ አቭርዘነዉዝ 960 አጥቑ ኩየንጣኒስ 456 ይዝ 33ሺኽዝ 300ስ ኪርም 37500 ጝታ ላር ላሪዝ ይወነዉዝ ፍጭር፣ ጅርቊ ጅቭጝ ፍልዉልወ ጻቭጛንስ ጻቭሽታጙ ችጝሸኩ” ይጝኩጙ።
ላየ ኻግሪል ጨውንዝመ ቺተቺተው ስድት ፊረቁ ኩየንጣን ጝታ ኪዉ ትጐ ዋጥርጥጘ ማጥን ላጥ ጝታ ጝን ኻጽሪል አቕጝ ሰራሽጝ ላዉጥሸቊስ ክንድጝ ፊስጥጘ ማጥን ለዉርሰነዉዝ ጛይ ሰራሽጝ ላዉጥሽጥጘ ማጥን ቃዉሰዝ ጝታግስ ይዉሽተዉ አቐነዉድም ዲቈተድ ጉይጝኩጙ።
አመልማል ተድላ
ጥቅምት 15/2018
