ገረዱ ሚዲየ ወይቱ ቀሰው እሴተንድ አትርዘናንስ አጉረው እኩሰ ፃየው አቐነውድ ጋልፅሽቱ።

ገረዱ ሚዲየ ወይቱ ቀሰው እሴተንድ ጉልምድጝ ፍጘንስ ጝእኩሰድ አጉረው አቐነውድ ገረዱ ሚዲየዙ አሩሸጥ ጋልፅⶔ።

ገረዱ ሚዲየ አትረው ዴሞክራሲዙ ስረትድ ኲነናንስ ቸልሰቁ እሴተን ማኽሊስ ኻሰቭ ናፅነይዝ ጅልውልውዘነዙ አገነ ብዘነው የጝ።

ገረዱ ሚዲየ ቀሰው ገቨዝ አርውሸነው ቸልሸውዜም ንቕፀቁ ችግሰንጥድ እክሰነውዝ ኽዝቭዝመ ኽዝቭዙ ዲምቅሽንድ አትርዘነው ቸልሸኲ።

ወይ ኽምረ ብሔረ እቅ ጭሰጭሰኒዝጘድም ገረዱ ሚዲየ ጭቓ ገቨዝ ግሪሰቁ አካለን ፅብጘጘድ አቕጝ ቀሰው ገቨዝ ግሪሰቁ ብጭቕ ውሸብልም እኲⶔ።

ገረዱ ሚዲየ አርውሸቊስ ሳቁጠ ኻትመዙ ፅበተ አት ሀይሌ በየነስመ ፃግቭጂ ወረደዙ ፅበተ አት ስቡህ ነጋሽ ወይትቁ ቀሰቁ እሴተንዝመ ስረተንድ ገረዱ ሚዲየዝ ጉልምዝን ፊሰነዊል ገነ ንቕፀቁ  ሰበን ኻይሽተቁ አቐነውድ ሚሪጝኩⶔ።

አት ስቡህቱ ጋልፅኒዝጘ ወይቱ ቀሰቁ እሴተንድ ላጥ ብሔር ብሔረ እቅዙ ሲጘ፣ ባኽለንዝመ እሴተንዝጘድቅ ገረዱ ሚዲየዝ ሰነድዝ ተምዝን ችጘነው ቸልሻው አቐነውድ ዊግትጝኩጙ።

እኒዙ ምላሰንድም ወይቱ ገረዱ ሚዲየዙ አርውሸጥዝመ እቀኽቭሪዙ ነቃዘጥድ ገረዱ ሚዲየድ ቀሰው ገቨል ግሪሰነዊል ቢተ ፅበነዊዝ አቐነውድ ጉይኲ።

“ላው ገረዱ ሚዲየዙ አሩሸተይዝጘ ወይቱ እኹርሸጥድ ወይት ጋልፀቁ ፍጥሩ ፃጀ፣ ሲጘ፣ ባኽል፣ ሽሚርነይዙ ስረት፣ እቀኽቭሪዙ አስጝጥ፣ ከቨከቭሽተነውዙ ዲዝጝተንድ ገረዱ ሚዲየዝ ላጢዝ አርቐአርቒሰነውዙ ሰበኒስ ኪርምሽቁ ፅብጝሽም እፍሰቁ ግነ አየቁም”ይጝኩⶔ

ወይቱ ገረዱ ሚዲየዙ አሩሸጥድቅ ጅውነይዙ ባኽልድ፣ ሲጘድ፣  ሲረሲርንድ፣ ቈንቈድ፣ ሽሚርነይዙ ስረትዝመ ላጥ ዳቕሽትየቁ ጝር ፍጥሩ ፃጀድ ላጢዝ አርቒሰናንስ አሩሸነው ጥውሸው አቐነውድ የጝ ሚሪጘውድ።

“ቀሰው እሴተንድ ቴክኖሎጂዝ እቑረነውዝ ኹርዝ ኹርዝጎ ከሰነው ይናጊስ ኻይሽተኩ፤ አንክርሰቁ ፍጥሩ ፃጀንድ ታኽንኽነናንስም አቑ ኻደገዝ ሊቨቁ ሲጙ ጅውንጥድ ሲጘዝ እቑረናንስ ከቭሰውድ ገረዱ ሚዲየዝ አርቒሰነው ቸልናንድ የጝ” ይጝኲⶔ።

አት ሀይሌ በየነ ጝተ ጋብዝ ፅቃ እምተንዝ በውግ ወይቱ ጅውንጥዝመ ውቅር መስቀሎ ክርስቶስቱ ቅርስድ ገረዱ ሚዲየዝ አርቐ አርቒሰነውዝ ላው ሚሊዮንዝ ንየ ገረዱ ሚዲየዙ አሩሸጥ ጋብዝ ቓልሽተነው ቸለጘድ አስክዝጘኩ።

ነንቱ ኰሪዝ ግነ ፖለቲከዙ ኻለየንዝጎ ውጥየው ኹር ፋጥርሸነውድ ሚሪጘንድ

“ሙየዙ ዚርፊዝ ፅንኸ ፃቨቁድ እዳቒጝቀት ገረዱ ሚዲየ አርውሽጘንድ ፖለቲከይስ ዊርይጝ ወይት ጋልፀቁ ቀሰው እሴተንድ አርቒስጘንድ እትላቁም”ይጝኩⶔ።

እንዝም ገረዱ ሚድየ አሩሸጥድ ወይቱ ፍጥሩ ፃጀድ፣ ባኽልዝመ እሴተንድ ፅንኸ ፃቨነውዝ ላጢዝጎ ችጝዘነው ጋብዝ እግርተቁ አቐነውድ ዊግትጝኩⶔ።

ወይትል ችጝሸቁ ምጝግስትዙ ሚሪሸቁ አካለንድም ገረዱ ሚዲየ አሩሸጥዝመ እቀ ኽቭሪዙ ነቃዘጥዝ አርቕት ፋጥርን ይወነው ጥውሸው አቐነውድም ሚሪጘኲ።

“ባኽልዝመ ባኽልዝ ቲክርክርዘነው አቒጝቀት ግፅጅቅ ላው ፃቭጥጘ ቸለቁ፣ ጅውነይዝጎ ዊትርጥጘ ቸለቁ እማንቱ ባኽለንዝመ ቀሰቁ እሴተንድ ጉልምዝን ፊሰነዊል ትኩርት ይውሽት ሰራሽትጠ ጥውሸኩ” ይጝኩⶔ።

ገረዱ ሚዲየ ቀሰው ገቨዝ ግሪሰነው ቸልሸውዜ ጅውነይዙ እፍርትድ፣ ባኽልድ፣ ዲግዝመ ላውንትነይድ ሩዘናንስ ከቨው አቐነውድም ወይ ኽምረ ብሔረ እቅ ጭሰጭሰን ኮሚዩኒኬሽን ቃወነይዙ ዲቈተ አት ከፍያለው ደባሽ ሚሪጝኩⶔ።

ገረዱ ሚዲየ ጭቓ ገቨዝ አቒጝቀት ቀሰው እሴተንድ ጉልምድጝ ፍጥጘ ማጥን እኒስ በውግ እጝቅ ወረጢዙ (ኽዝቭ ዲምቅሽንዝመ) ጭሰጭሰኒዙ ቃወጢዝ ስልጠነ ይውሽተጘድም ዲቈተድ አርቒስጝኩⶔ።

ጥቅምት 14/2018 ዓ.ስ ኪብርሸው ገረዱ ሚዲየዙ ግሬድም ገረዱ ሚዲየዝ ኻግርት ኲነው፣ ዲግድ ሩዘነው ቸለው ኹር ፋጥረናንስ ትኩርት ፃቨው አቐነውድ ልብስጝኩⶔ።

“እጝቅ ወይቱ እቀኽቭርዙ ነቃዘጥዝ (አክቲቪስተን) ቀሰው ገቨዝ ውላቕጝ ጝተ ባኽልድ፣ ቀሰው እሴትድ፣ ቈንቈድ ሊጊሰነውዝ ጝተ እቀኽቭርድ አግልግልጥጘ ማጥን ስልጠነ ይወናንስ ሰነድ አስልሻጙ የጝ” ይጝኩⶔ።

አቓንስቅም ‎እጝቅ ወይቱ እቀኽቭሪዙ ነቃዘጥም አነ ገረዱ ሚዲየዙ አርውሸጥ ወይት ሊግስጥጘ ቸለቁ ኻሰቨን፣ፍጥሩ ፃጀ፣ ባኽልዝመ ቀሰው እሴተንድ አርቒሰነውዝ ጝተ ኽዝቭድ አግልግለነው ጥውሸው አቐነውድ ዲቈተድ ኻስቭዝጝኩጙ።

ጥቅምት 15/2018

ሳምራዊት ግርማይ