ኻግርዝጘድ ብሽተው ስፖርትዙ ፈንድ ዊሰናንስ ሊግዘጢል ትኲርትዝ ሰራሸነው ፈንድ ኽየው አቐጘ አምንሸኲ።
እኔንት ጎነ ጻቨነውዝ ሰቭድ ሰራሽጛⶔ ችጝሸቊ ጅውንጢስ ወይ ኽምረ ብሔረ እቅ ጭሰጭሰንድ ዳቕሽተኲ።
ብሔረ እቅ ጭሰጭሰኒዝጘድ 2018 ዓ.ስትዝ 38 ጣቭየኒል 900ዝ ንየ ሊግዘጥ ስፖርተኝጥ ስልጠነድ ፊሰቊ አቐነውድ ጭሰጭሰኒዙ ውሸብል ዝመ ስፖርት ቃወነይዝ ችጝነው ሚዝረድ ቓሊሰኲ።
ሊግዘጥዙ ፕሮጀክትዙ ስልጠነድ ፊሰቊ ሊግዘጢስ መሸሃ ኻትመዙ ፅበተ አቐውድ ሀብታሙ ሽባበው ጝታ ወረደይል ይውሽታጙ ችጝሸው ፕሮጀክትዙ ስልጥነይዝ 13 እምትዝ ሳ ልኲዙ ኳስ ፕሮጀክትዙ ስልጠነ ሳልጠናⶔ ችጝሸኲ።
“እንዝሚቅ ዊነው ስልጠነዙ ጻጝቲዝ ልኲዙ ኳስ ዋርደ አወየው አቐጘ ፣ አወሽን ዋርደነው ቸልሸው አቐጘ ዝመ ዋርደዙ ኮርዝ ዋርደድ ጓነዝ አወሽን ዋርድን ኻቐነው ቸልሸው አቐጘ ስልጠነይስ ችጘነው ቸልኲን” የውኲ።
ስልጠነድ ቀለምዙ ክንድጚዝም ኽየው አርወ ነየው አቓንድ እቀ ኽቭሪዝም ሥነ ሚግቭሪዝ ቀንሸተ አነጘድ ጻቨው አቕሽም ስልጠነድ ፈንዝ እቻቓየጘድ ግነ ቲክርክረዙ አገነ እጅጝት ዝመ ስልጠነይዝ አቐቊ ጎዘመዘንዙ እጅጝትድ ስልጠነይዝ ኽየው ፅጋ አቐጘም የጝ ጋልፀውድ።
ሊግዘጥዙ ፕሮጀክትዙ ስልጠነድ ፊስጛጙ ችጝሸቊ ሊግዘጥ አምድወርቅ ኻትመዙ ፅበተ አቐውድ ሮቤል ተስፋው ላውድ የጝ። ጝታ ወረደይዝጘድ 6 ስፖርትዝቊ አይንተኒስ ንየ ፕሮጀክትዙ ስልጠነድ ይውሽታⶔ ችጝሸኲ።
ያንም 13 እምትዝ ሳ ልኩ ኳስዙ ፕሮጀክት ስልጠነይዝ ሲትፍሻⶔ አቓንድ ስልጠነድ ግን ትኲርትዝ ይውሽታጙ አቐጘም ዊግተኲ።
“ስልጠነድም ስፖርት ሳይንስዙ ክንሰጥድ ይውጥጘ ጻቨነውድ ስልጠነድ ቀለውዝ ችጝናንስ ጻቭኲ። ኽየው ችግሰድ ግን ቲክርክረዙ አገነ በነውዝመ ስልጠነይዝ አቐቊ ጐዘመዘንዙ እጅጝትድ ግነ ይና ቸልትድ ሊጊሳይነጘድ ጻቭኲ” ያንድም ጋልፀኲ።
”ቺተዝም ፕሮጀክትዙ ስልጠነ ሳልጥነተ አቐነውድ ይ ክንድጝዙ ለምረ ለምርኒዝም ቀሰው ፈን ሚዝግቭሳንስ ቸልስኲ” የውኲ።
ስሃለ ሰየምት ወረደ ውሸብል ዝመ ስፖርት ጽፈሽ ጝንዝ ስልጠነ ዝመ ቲክርክረ ጓነ ቃወተ አት ጌታቸው አሰፋ ጋልጽጘጘድ ጝታ ወረደይዝጘድ ሊግዘጥዙ ፕሮጀክት ስልጠነድ ክንድጝ ጝንጥድ ሚስርት ጻቨነውዝ ስልጠነድ ይውሽታጙ አቐነውድ ጋልጽጝኲⶔ።
”ስልጠነድ ፈንዝ ኻትሻንስም ስፖርት ምኽር ጝኒጅቅ አቭርደነውዝ 1ላ ሽኽዝ ንየ ጊንዝቭ ፊሰነውዝ ፕሮጀክትዙ ስልጠነ ፊሰቊ ሊግዘጢዝ ጎዘመዘን ጅቨነውዝ አልሰነው ቸልሽሽም ነን አቐው አየውም” ይጝኲⶔ።
2018 ዓ.ስ 6 ስፖርትዝቊ አይንተንዝ ስልጠነድ ይወናንስ ሳልጥንዘጥ ዝመ ሳልጥነጥ ሚልምለነውዙ ሰቭ ሰራሽተው አቓንድ ባኽልዙ ስፖርተንድ ቈሽ ዳርት፣ ቼዝ ፣ ልኲዙ ኳስ፣ ቴብል ቴንስ ስልጠነድ ይወናንስ ቃውሰ አስልሽትድ ኻትሽ ሰቪዝጐ ጥውሽተጘም ጋልጽጝኲⶔ።
አምድወርቅ ኻትመ ጭሰጭሰን ውሸብል ዝመ ስፖርት ጽፈሽ ጝንዙ ስልጠነ ዝመ ቲክርክረ ጓነ ቃወተ አት ተንሳይ ንጉሴ ጝታ ወረደይዝጘድ ሊግዘጥዙ ፕሮጀክትዙ ስልጠነድ ክንድጝ ጝንጥጅቅ አቭርድንዝ ሰራሽታጙ ዊነነውድ ዊግትጝኲⶔ።
አቭርድንዝ ሰራሸነውድ ንቕፀቊ ሊግዘጥ ስፖርተኝጥ ፍርዘናንስ ቸልሰጘም ጉይጝኩጙ።
” ስልጠነይዙ ኽየው ቢተድ ስልጠነይዝ አቐቊ ጎዘመዘንድ እቻዘነውዙ ሰቭድ ፈተነ አኲ የቊ ጓነ ቃወተድ ምጽነዝም አቕሽ ስፖርት ምኽር ጝንድ ከቨናንስ ልቕረ ጻቭሽም ችብረይዙ ከቨድ ጭቚ እፍስጠ ቸላውም” ይጝኲⶔ።
2018 ዓ.ስ በጀትዙ ዓምረይዝ ኻትመ ጭሰጭሰኒዝጘድ አትሌቲክስት ቈሽ ላጥ ዲዝጝሸቊ ስፖርተኒዝም ሊግዘጥድ ሳልጥንዘናንስ ቃውሰ አስልሽትዙ ሰቭድ ኻትሸነውድም ጉይጝኲⶔ።
አመልማል ተድላ
ጥቅምት 15/2018
