አቭርደቁ ምጝግስተንዙ አጉረተ ደጝት ጝንድ

እስራኤል አቭርደቁ ምጝግስተን ድርጅትዙ እጅርነይዙ ከቨድ ጋዛትጎ ዲቁሰናንስ ፊቅደነውዙ ግድጝ ፃይረይ አረጘድ አርቒስኲ።

አልም አቅቨ ደጝት ጝንድ እስራኤል አቭርደቁ ምጝግስተን ድርጅትዝመ ጝር ድርጅተኒል ጋዛ አቒዝ እጅርነይዙ ከቨ ችጘው ፍልስጤምቱ ሲቪለንዙ ሲሪዩ ተምዝትድ እቻይሽትጛንስ ምቸምችዘነውዙ ኽጉ ግድጝ ፃይርኩች የውኲ።

ቢቢሲቱ ዘገቨይዝጘድ አቐውዜ አቭርደቁ ምጝግስተን አጉረተ ደጝት ጝንዝ ይውሽተው ማኽርዘነዙ ቓለድም እስራኤል  አቭርደቁ ምጝግስተን ፍልስጤምቱ ስድተኝጥዙ ኤጀንሲ(ኡንዋ) ጝተ እግዘድ ንቕፅቁ ሰቭተጥድ ሃማስቱ አቫለን ዊንም ላጥ ከምሸቁ ጓንጥ ጛይ የነውዝ አልስረው ክስድ ደድሲረይም የውኲ።

አቭርደቁ ምጝግስተን ድርጅትዙ ዲቈተድም እስራኤል ኽየው አቐው ውሳኒድ ኪብርዘች የው እምንት ፃየቁ አጘጘም ዊግትጝኩⶔ።

ታኽሰስ አርፈይዝ አቭርደቁ ምጝግስተን ድርጅት ጥቅለ ጉባኤ እስራኤልቱ ግድጘንድ፣ ከምሸቁ ኻይለንዝመ አቭርደቁ ምጝግስተን ድርጅት አቫል፣ አቭርደቁ ምጝግስተን ኤጀንሲየንዝመ ጋዛትል ፍልውልወቁ ላጥ አልም አቅቨ ድርጅተን እንዝጘም ምሥራቅ እየሩሳሌምት ቈሽ ፃይሽተው ዌስት ባንክል አልም አቅቨ ደጝት ጝንድ(ICJ) ፃይ ፅበው ቓለድ ዋቕርኲ።

እስራኤልቱ ፓርላመድም ኡርዋትል እስራኤልቱ ቅምንል ፃቭሽተው አውማው ፍልውልወድ እስራኤልቱ ስልጣን ጉጥዙ ዲምቅሸንድ ጊግቨው ኽግድ ፊሰት እግርገ የጝ።

አልም አቅቨ ደጝት ጝንድ ፍልስጤምቱ ሲቪለንዝ ተሚሰው አልስነንድ ውርም ፅጋ አቒጝቀት ችጝዘናንስ ፊቅደነው እስራኤልቱ ግድጝ አቐነውድ ሚሪሽኲ።

እስራኤል ሊጘ እምትዝ በውግ ሃማስጅቅ ጣይትን ኪርምረት እግርገ ጋዛትል እቻቐውዝ 2.1 ሚሊዮን ኽዝቨንዝ አቐው ኹረዝመ ላጥ እጅርነይዙ ከቨንድ እዳዝርኩች።

እን አርፈይዙ ቲጉዝን ችብሰነውዙ ቲስመምንድ ቲግቭሩ አቐነዊስ በውግ አቭርደቁ ምጝግስተን ድርጅት ከቨቁ አልም አቅቨ ሙየ ጉይጥድ 640,000 ንየ እቅ ኹረዙ እጅጝትዝ ምላሰን እቻቐውዝ እቻቐው እጅር ሰራሸተ ግድር ጽበጘድም ጣንቅቅዝጝኩⶔ።

እስራኤል ላየ ጋብዝ ጥውሸው ኹረ ችጝተጘ ፊቅድራጙ የጝ የነውዝ ግድርዙ ቕየድ ማልድርኩች።

ሳምራዊት ግርማይ

ጥቅምት 15/2018