ዲግ ኻግሩ ለወንትነይዝመ ኽዝቭዙ አርውሽንዝ

ኢትዮጵየ ውሸብለ እጅርዙ ኻይልዝመ አርቕትዝ እኒዝጘም ዲዝጝት ፅየቍ እቅ፣ ፈራቐውዝመ እፍርደው ዝቨ ፣ አፍሪከትል ቲክርክርሸተ እጀው አቑዙ ፃጀ ፣ ንቕፀቍ ማዕድነንዝቍ አይንተን፣ ንቕፅት ፅየቁ ቱሪዝምዝቍ ዊትረንጥዝመ አየርዙ አምል ፅይረይ ኻግር ጝር አቐነውድ ደግምግመዝ ዊግሽኩ።

እንዛይ እኩረንድ አቭርዘነውዝ ሠራሸነው ቸልሰቍ ንቕፀቍ አገንጥዝመ ምርፀንጥ ፅይን ፅብናጙ ኻግሬቱ ጊዝዝመ ፃጀድ በክናጙ ችግሰል ሊቨነው ጥውሻውም።

ኢትዮጵየ አቒል ግቨሪስ ንዬ አቐው ኽዝቭድ ድኽትዙ ወለሊስ ሳ ፅበው አቐነውድ ቺተቺተቍ ፅንኸን ቓሊስጘኩ። ደርሰው ኹረዙ ከቨ ጨውነቍ ጣይትንዝመ ቺተቺተቍ ምላሠንጥዝ ቖይሸቍ ዊግነንድ ጊቭርዘጥ አቐነው ጥውሻንድ ግድርድጝኩጙ።

ማኽለኘ ጥወር ፅይጝ ዊነቍ ድኽትዙ ቲረይል፣ ድኽትዙ ቲረይል ዊነቍድ ቈሽ ድኻዙ ድኻ ይሽትጛጙ አቐነውድም ፍራትዝ ወይሽተኩ። ኻትመል ፅበቍ ዜገንድ አውግረው ፅብንዙ ችግሰዝ ገልታሽጛጙ አቓንድ አቐው ፅብንዝመ አግልግለ ችጘናንስ ሳዝመ ንየዝ ይጛጙ ፅብጘው ኮሪዝ ወሰው ኻምዝን ፋጥረነውዝ ችግሰ ዲግል ወሰው ችግሰ ፋጥረነው ኻግሩ ለወንትነይድም አቑ እፍርድን ላውጥሸነውዙ ተምዝትድ ተርጠ ቸላውም።

ይና ኻግር ኢትዮጵየትል ነንት ሰትዝ እንልም እድልም እትለቍ ጣይትንዝመ ኽምዘንድ ጝታ ጎንድ ውርም አቑ ውር ችግሰድ እክሰነው ቸልሸውድ ምኽርኽረዝ የጝነ ችብር ይን እክሰ ነስጥጘ ቸለቍ ገበኒዝ ጅልውዘ አቭላይተ ፃቨነው ጥውሸኩ።

ዲቈቍ ላጝጠ ዋልጠ እምተንዝ ቑጠ ኢትዮጵየቱ ሲመይስ ዲግዙ አየር ብሽት ገጫሽንዝመ ጣይትን ሲፍን ቓለነው እልት እልትዙ ቲግቭር አቐት ሳብጥ አጭነዙ ድመ ወሸነው ይና ዲዝጝት አቕኩ።

እን ጣይትንድ አውትሽን ችብሰነው ቸልሸኩ የዊዝ ጅልውዘ አቭላይተ ፃቨነውዙ ይና ዲዝጝትድ ግነ ምጝስትዝመ ህወሐትስ ደቡብ አፍሪከትል ፃቭሽተው ፕሪቶሪያቱ ቲስመምንድ ላው ቓሊሰነ የጝ።

እን ቲስመምንድም አቑ እን አቭላይተይስ ችጝነው ዲዝጝትድ ደይ ችጛንስ እንቅ እቅዙ ኻለይ አቕ ቃፅልሰነው ጥውሸኩ።

ብላ ክልሊል እትለው ፃውተዙ ችግሰድ ዲግ አቐው  ጕደነዝ እክሰናንስ  ከምሸጥ አካላኒጅቅ አቭላይተ ፃቨነውዙ ተምዝት ምጝግስት ጋቢዝ ፅብሽም ከምሸጥ ጋቢዝ ፅበው ላው አቕን አቭላይተል ጎየቅ የነዉዝመ ላጥ ምላሰንጥዝ ጅልውዘ ቲስመምን ፃቨነው ቸልሽየውም።

እንዝም ኽዝቭድ ስፍረይስ ስፍረ ፍልውልዋየጘድ ፃቭኩ። ፍልውልወውድም ጒደነል ጝ ፅየውድቅ ቀምሻንድ ዲቊ ያንድም ንቕፀቊ ላ ሽኽዝ እጊተው ጊንዝቭ ኪፍለነው ቸሊረውዜ ዲቋርም ይሽት ገልታሻንድ ቓለነው እልቱ ቲግቭር አቓጙ የጝ።

ወይ ኽምረ ብሔረ እቅ ጭሰጭሰንድ ንቕፀቍ እምተንዝ ቑጠ እፍርደነውዙ ተምዝት ፅይ ቸልሸው ጕደነይዝቅ ልቕርደውዝመ ዋቕረው ኰርዝ ኻግር ፋዝጠ ቸለው ችግሰ ተራንድ ችብር ይን ኻስቨነውዙ ዲዝጝትዝመ ባኽልድ ቀሰው የጝ ይን ፊሰነው ቸልሸኩ።

አቕሽም ግነ ላዬ ጅውነይዙ አጀንደ ለምረቍዝመ ጝታቕመነቱ አርወዝ ሽሹደቊ ጓንጥ ኽዝቩ ፅብንድ ችግሰል ማልጛንድ ቓልሽታጙ የጝ። አቐነዊዝም ጝ አቒስ ፈቊ ውሸብልድ ማኽርን ዊሰነውዝመ ዋቕረም ፅይጝሽ ዲግ አቐው ጕደነዝ እኪታንስ  ማኽርኽርሸነውዝ ዊነው ይና አቅሉ ባኽልድ አትርዘነው ይና ዲዝጝት ፃቭነ ጥውሸኩ።

ወንድሙ ቸኮለ

ጥቅምት 15/2018