ኢትዮጵየ 80 ናን ላይስ ጝር ኢኮኖሚዙ ሊግዝትድ አርሽነይ ዚርፊዝ ሲሪሸው የጝ።
ውርም እኰ ጒዝጨተድ ዚምኑ አርሽነይዙ ማሽነንድ አርውሻው አቕሽም ጝሰቭድ ቃልጥፍዘናንስመ ጊቭርትነይድ ሊጊሰናንስ አርውሸቁ ባኽሉ ማሽነን ዊንም ጎዘን እኩጙ።
እንዛትም አጭነድ ልየዝ ቃልጥዝጝ ጝተ አግልግለይዙ አይንቲዝጘድቅ ሚልክዝጝ አልሰቁድ ናነ ጥቨቭዙ ሙየጒጥድ ጛይ።
ቺተዝ ቈሽ አርሽነይዙ ዚርፊዝ እቀኽቭሪዙ እልቱ ፍልውልወይዝ ግርቭ አቐቁድ ምኻርሸ፣ ጭዋረ፣ ግጅም፣ መይር፣ ሰለዝመ ላጥ እጅር ናንዝ ሰራሸተቁ ተካቁ አጭነዙ ጎዘንድ ሰራሽጝ አልስጘኲ።
ማፅወዙ ኰሪዝ ቓልናንድም ግጅምዝመ መይርዝ ጒዝጨተይዙ ኽየው መሰሪ አጘንስቅ ጝ ናኒስ ድዛቁም።
ምላሰንድም ኰሪዝ ጝኽወድ ጥቅለውድ እንዛይ መሰሪየንድ ዊንጘንድ የጝ።
መይር፣ ግጅምዝመ ላጥ አጭነዙ ሰበኒል ውላቐቊ ሳቁጠ ኻትመ ጭሰጭሰኒዙ ፅበጥ ማኽሊስ አት ሞገስ አለሙ ዊግትጘንድ አጭነዙ ሰቭድ ኽፅምቲስ ኪርም ጝተ አቅልድ ሰራሽጛጙ ተርጘጘድ ዊግትጘኲ።
እንዛይ አጭነዙ ፈንጥድ ሰራሸናንስም ቃውሰትነይዝ ዊነቁ ቀቨቀቭሽተቁ አጭነ ማጭነንድ ጅቭሽትጘኲ።
አጭነድ ኻኽመይል ድውጝ ዊፈዝ ዊፍዘነውዝ አጭነድ ጀት እግርገ መይርም አነ ምኻርሸ ኰሪዝ ተምዝጘው መሰሪዙ አይንቲዝጘድ ካኽዝጝ ፊስጘኲ።
አግልግለዝ ቢዘ ዊነው አጭነዴት ልየል ቃልጥዝጝ፣ በንጘው ሚልክድ ተርጥዊል አሽ ጅልውልውዝጛⶔ ቃጥቅጥጘኲ።
ሰቭድ ሰራሽታንድ ላው እጅሪዝ ጭቑ አየውም። ፃየተ፣ ጣዘተዝመ አስለተ እጅርዙ ኻይል ተሚሰው አቐነውድ ሚሪሽኲ።
ፃየተድም ጣዘተድም ሰቪዝ ኽየው እኩሰ ፃየቁ አጝሽም ዊርተ ፃየቁ ናነ ጥቨቭዙ ጊቭርተንድ ጊቭርዘናንስ ኽየው ችጘርድ ፃየውድ ግነ አስለተድ ዊንም ናነ ጥቨቭዙ ሙየጒሪየድ የጝ።
ምላሰንድም ጛይ ኻይልዝ ከቭሰጥ ጛይ ጚ ጥቨቭዙ ቸልት እጀቁ አጥጘ ቸልጘኲ።
ናነ ጥቨቭዙ ሙየ ጒሪየድ ግነ ፅጉትዝ ኽይቲዝ፣ እንዝጘም መሰሪዙ አይንቲዝጘድ ካኽዝን ፊሰናንስ ፃየው ጝጥቨቨንድቅ አርውሸኲ።
አቓንስቅም አጭነዙ ሰቭ ዝላ ፃየው አቕሽም አጉረው ፈን ፃየው አቐነውድ አት ሞገስ ዊግትጝኩⶔ።
“ያን ነን ይጝንድ ቃወውድ አርሽነይዙ ሰቪስ ከስጘ አጭነዙ ሰቪዝ የጝ። ቺተዝ ቈሽ እየዝመ ጫረ ያው ሰቭ አቓንስቅ ጥውሸውዝ ሰራሻንድ ላው አርየይዝ ጭቑ 8 ሽኺል አሽ ቅየኩን” ይጝኩⶔ።
ላየ” ከየ ፋንድ ያቅልድ መጨ ይጝ ነይጘውድ ጊንዝቭ ዊንም ቢረ አቒጝቀት ሙየ የጝ” የቁድ ቈሽ አት ምስጋናው አለሙ ጛይ።
አት ምስጋናው አለሙ ጝተ ክንድጝድ ክንድጛጙ ጋብዝ ጋብ ቆሽ ጝተይር ሰራሽጘው አጭነዙ ሰቭድ ከቭሰነውዝ የጝ ሙየድ ዲዝጝጘውድ።
ጝተ ክንድጝድ ኻትጘት እጝጎም ጝተ አቅሊስ ችጘው አጭነዙ ሙየል ውላቕጝ ጝተ ከየድ ቃውጛጙ አቐነውድ የጝ ሚሪጘውድ።
“ይ ክንድጝድ ኻትጘ ጭቅተ ይርቲስ ችጘው ሙየድ አርውሽ የጝ ይቕመት ቃወነው ቸለውድ። ላጥድ ሰቭ ብጝ ጝተ አቅልድ ችግርዝጘንድ ያን ነን ሲዘ ይቑርድ ጭሰጭሰውድ አጭነዙ ሰቪዝ የጝ” ይጝኩⶔ።
አት ምስጋናው እጝቅ አርሽነይዝም አቑ ጝንዝ አግልግለቁ አጭነዙ አይንተንድ ዊርተዝመ ሚልክዝ ሰራሸነውዝ ጝተ ኰሪዝጘድ አልሰቁ አቐነውድም አርቒስጝኩⶔ።
“ጫረ ጥወነይዝ ምኻርሸዝመ ኪርቭዝ፣ ጫረ ፈነይዝ ግጅምዝመ መይር፣ አምር በልዝ ሰለ አስለነውዝ እቀኽቭሪዙ ተምዝቲዝጘድ ሰራሽነኩን። ሰቭድ ዝላዘው አቕሽም ላው አርየይዝ ጭቑ 10 ሽኺል አሽ ባይነቅም” የነውዝ ዝላይስ ፈንድ ኽየው አቐነውድ ዋርዝጘኲ።
አት ሞገስመ አት ምስጋናው ውርም እኰ እን ሰቭድ አጉረው ፈንዝመ ልውጠ ፃየው የጝ ይጝሽም ምጝግስት ጋብዝ እኪትጥጘ ጥውሸቁ ዋቕረንጥድም ጉይጝኩⶔ።
አጭነዙ ሰቭድ ሰራሸናንስ ፈው እጅርዙ ኻይልዝመ ዝላድ አጉረው የጝ።
ዝላድ ቃፅቭጝጠ ቸለቁ ማሽነን እንዝጘም ሰራሸነዙ ስፍረ ተምዘነውዝ ሚሪሸው አካሊዝጎ ደግምግመዝ ዋቕርጝሽም ዊሰ ችጝየቁ አቐነውድ ጋልፅጝኩⶔ።
ነንም ምጝግስት ችግሰንጥድ ልብተነውዝ ሰቭል ውላቐቊ ናነ ጥቨቭዙ ሙየ ጒይጥዝ ስፍረዝመ ማሽነንድ ምቸምችዛንስ ዋቕረ አልስጝኩⶔ።
ሳቁጠ ኻትመ ጭሰጭሰኒዝጘድ 280 ንየ ሚስቅል፣ ገይፀ መይፀ እንዝጘም ምኻርሸ ተከቁ ቺተቺተቁ አጭነዙ ሰቭል ውላቐቁ ናነ ጥቨቭዙ ሙየጒጥ ችጝሽጘኲ።
ናነ ጥቨቭዙ ሰበንድ እልቱ ሰቭዙ ፍልውልወድ ቃልጥፍዘነ ጭቑ አቒጝቀት ኻግርሸንቱ ባኽሉ እሴተንድ ጝተ አቒዝ ፃየቁ ጛይ።
እንዝ ሲሪየም ጥቨቭዙ ሰበንድ ፅበው ኹሪዝም አቑ ተረው ኹሪዝ ጅውነይዙ ባኽልድ ጋልፅጛጙ ፊረቁ መሰሪየን ጛይ።
ሳቁጠ ኻትመ ጭሰጭሰን ባኽልዝመ ቱሪዝም ጽ/ጝንዙ ዲቈተ አት ካሳ ከበደ ጝተ ጋብዝ ናነ ጥቨቭዙ ሰበንድ ሊጊሰናንስ ትኩርትዝ ሰራሽታጙ አቐነውድ ሚሪጝኲⶔ።
ባኽሉ መሰሪጥድ ሊጊሰነዊስ ከስጘ ሰቭዙ አገነድም ሊጊሰቁ አጛንስቅ ሰቭዝመ ስልጠነ ጽ/ጝኒጅቅ አቭርደነውዝ ሚስቅልዝመ ገይፀ መይፀዙ ዚርፊል ውላቐቁ 10 ውሸብሊዝ ሊጘትል ተገተግሽትጝ ሰራሽጘው ስፍረ ይውሽተነውድ አርቒስጝኩⶔ።
ነንም “ምኻርሸ፣ ኪርቭዝ፣ ግጅም፣ ሰለ ተከቁ ባኽሉ ጥቨቭዙ መሰሪየንድ ሊጊሰናንስም አቑ ዚርፊል ውላቐቁ እቀኽቭር ክፍሊዙ አርውሸትነይድ ደድሰናንስ ሚሪሸቁ አካለንጅቅ አቭርድንዝ ሰራሽናጙ የጝ”ይጝኩⶔ።
ዚርፊዝ ውላቐቊዝ ሰብድ ቃልጥፍዘቁ እንዝጘም ዝላድ ቃፅቨቁ ሰራሸነዙ ማሽነንድ አርውሸጥ ፃቨናንስ አዲስ አበባትል አሽ ዊገዊግሽጛጙ አቐነውድም ሚሪጝኲⶔ።
ፅበው ፃውተዙ ችግሰይዝ ምላሰን ግነ ነንትል አሽ ማሽነን ወይትጎ ጥወነው ቸሊጘጘድ ሚሪጝ ነንም ጥውሸው ልቕርትድ ፃቭሽታጙ አቐነውድ ልብስጝኩⶔ።
አጭነዙ ጥቨቨን ጒዝ ጨተይዝም አቑ እጝቅ እቀኽቭሪዙ እልቱ ፍልውልወይል ነንትል አሽ አግልግለዝ ግሪጛጙ ፅበቁ ባኽሉ መሰሪየን ጛይ።
እውነ ግልወ፣ ኽየው እጥን ይጝቀት አርውሽጘቁ ሰቭዙ መሰሪዝመ ባኽሉ ገይፀንጥም ጛይ።
አቓንስቅም አጭነዙ ሰቭዝ ውላቐቊ ናነ ጥቨቭዙ ሙየጒጥድ ጥውሸው ከቨዝመ አትርዘነ ይወነውዝ ጅውነይዙ የውም ኻግርሸንቱ ባኽሉ አጭነዙ ጎዘመዘንድ ድዛይጘጘ ሰራሸነው እጝቂስቅ ኻይሽተኲ።
ሳምራዊት ግርማይ
ጥቅምት 30/2018
