ለወትረ ተግ ክንድጝ ጝንጢል ኹረዙ አፅቨ ኪርምሰነው ክንደጥ ግድርዲጝቀት ነቃቕጝ ክንድጛንስ ከቨኩ።
ክንደጥ ማፅንፅንሸው ኹረ ዀነውዝ ትኽነዝም አቑ ቺዝየው ክንድጝዙ ቲክንክነዝመ ዊርተ ፃየው ክንድጝም ችጝጘኲ።
እንት የቁ አፅቨንጥ ግድርድ ቓቭዝጝ ግርቭ አቐነውዝ አርቕትዙ ሊግዝትዝመ ክንድጝዙ ፈንዝጎ ቃውጘኲ።
ብላ ክልሊዝጘድም ዲቈው አምረይዝ 294 ሽኽዝ 800 ንየ ክንደጥ ክንድጝ ጝንዙ ኹረ አርውሸጥ ዊንጘጘድ ክንድጝ ቢሮዙ ሚዝረድ ቓሊሰኩ።
ኹረዙ አፅቨድ ዚልቀትነይዝ ቃፅልሰናንስም ፃጀ ጒይጥዝመ እቀኽቭሪዙ ክፍልድ ሲትፍዘው ጊንዝቭ አኽቨነውዙ ሰቭድ ፃጝዛጙ ጫቅኲ።
2018 ዓ.ስ ክንድጝዙ ዚምኒዝ ኹረዙ አፅቨዝ 326 ሚሊዮንዝ ንየ ቁርሽ ገሪሽኲ።
አቕሽም ኹረዙ አፅቨድ ቃዝየውዝ ኪርምሽየው አቐነዊዝ ምላሰን ንቕፀው ክንደተ ክንድጚስ ቢዘ አቓጙ ችጝሸኲ።
ፃግብጂ ወረደ እጥቅኑ 1ትረዝመ ማኽልኘ ተግ ክንድጝ ጝንዙ ክንደጥድ ዊግትጘውድም እኔንት የጝ።
ሰርካለም ሀይሌ 4ትረ ክፍልዙ ክንደተ ጚ። ጝር ክንድጝድ ቲክንክንድረውድ 30 ደቂቀዙ ጉግ ፃጝር የጝ።
ጝርም አች ሊጘ 3ትረ ክፍልዙ ጝርፅንድ ጝተ እፈርትነይዙ አቅምዝ ፃጝጝ ክንድጘው ክንድጝ ጝኒል ኹረዙ አፅቨ እጀው አቐነዊዝ ግድርዝመ ዝቛነድ ቸለነው ብጘጘድ ዊግትርኲች።
“ይነ ክንድጝ ጝንድ እክል አቐነዊዝ ቺተዝ ቈሽ መልቁ እፈር ግድርድጘኩ። ሲዘ ሰቲል አሽ ነቃቕን ክንድን በርን ጝዝ ግረ ላውድ ፍ ፊረኩ ላውድ ቈሽ ዝሞረኲ። ሊጘ ይፅን 3ትረ ክፍልዙ ክንደጥ እኩⶔ ነን ክንደነውድ ችብስጝኩⶔ። ያን ኽይ የር አቓንስቅ ግድርድ ቸል ክንጣጙ የጝ” ይርኩች።
ኽይጠጘድቅ ላው ሰትዙ ጒደነ ፃጝጝ ክንደቁ አጘንስቅ ጝተኩ ቁርስ ኹጝም ዀቅ ይጙም ክንድጝ ጝኒል ግድርደነውድ እዳቓውም።
ላየ 3ትረ ክፍልዙ ክንደተ ጌታሁን አለነ ክንድጝ ጝኒል በውግትጘ ኹረዙ አፅቨ እጀው አቐነዊዝ ክንሰተድ ክንሰው ክንድጝድ ቲክንክነናንስ ችግርሸቁ አቐነውድ ጋልፅኲ።
“ጝተ ጝኒ ጣመነ ዂጝቀት ተረቁድ እረፍትዝ ፊርጘኲ። ክንድጚስ እዳቐቁም ብጭቕ እኩⶔ። ጣመነ ዊናን አሰነዙ ሰቲል አሽ ክንድጝድ ቲክንክነናንስ ከቭጠ ዊኑ፣ ክንሰተ ክንሰው ክንድጝድ ቲክንክናይነጘ ፃቫጙ የጝ”የኲ።
መልቁ እፈር ጝተ አይምሮድ አውማው ገቨድቅ ቃዝየውዝ ለምረነውዙ አቅም ፃየቁ አጝሽም ግድር ችበችብረነውዙ አቅም እጀቊም።
እጥቅኑ ክንድጝ ጝንዙ ክንሰተ ብርሃኑ ሞገስ ጝተ ጋብዝ ሰሜንቱ ጣይትኒስ በውግ ዊነው ኹረዙ አፅቨድ ችብረነዊዝ ክንደነው ተምዛጙ ቀቨው ክንደተድ ንቕፃጙ ተረጘ ዊግትጝኩጙ።
” ክንደጥ ኹረዙ እጅጝትዝ ክንድጝዙ ስረትድ አቢቲጝቀት ቀቭጝ ፍጘኲ፣ ጝተ ጝኒል አሽ ፊርን ነስነኩን፣ ዊስጝ ፍጝ ፊርጘኲ፣ ክንስናንድም ቲክንክነቁድ ዊትቁ ጛይ” ይጝኩጙ።
እጥቅኑ 1ትረዝመ ማኽልኘ ተግ ክንድጝ ጝንዙ አውር ክንሰተ ዘውዱ ግርማይ 2018 ዓ.ስ 750 ንየ ሚዝግቭሸቁ ክንደጢስ 2 ላዝ ንየ ክንደጥ ኹረዙ እጅጝትዝ ምላሰን ክንድጝድ ቀቭጘጘድ አርቒስጝኩⶔ።
ክንድ ጝኒል ኹረዙ አፅቨ ኪርምሰነው ቺዝየው ክንደጥዙ ፈንዝመ ቀቨቁ ክንደጥዙ እግዘድ ቃፅቨው የጝ።
አቕሽም እጥቅኑ ክንድ ጝኒል ኹረዙ አፅቨ እጀው አቐነዊዝ ቺተዝ ቈሽ መልቁድ ግድርድጝ ክንድጛንስ ጊድድሽጛጙ አቐነውድ የጝ አውር ክንሰተድ ሚሪጘውድ።
ጥቅለ ፃግቭጂ ወረደይል 23 ለወትረ ተግ ክንድጝ ጝንጥ ፅብጘንድ ዲቈው አምረይዝ ሰውጠ (8) ክንድጝ ጝንጥል እቀኽቭሪዙ ሲትፍሽኒዝመ ወረደይዙ በጀትዝ ሊጘ ላ ኩንታልዝ ንየ አልት ኹረዙ አፅቨ ኪርምሽ ዊነጘድ ክንድጝ ጽ/ጝኒዙ ሚዝረድ ሚሪየኲ።
2018 ዓ.ስ ክንድጝዙ ዚምኒዝ ሚዝግቭሸቁ 10 ሽኽዝ 400 ንየ ክንደጢስ 7ሺኽዝ 300 ንየድ ክንድጝ ቲክንክነቁ አጘንድ ሻቘ ሽኽዝ ንየ ክንደጥ ኹረዝመ ጥወርዙ እጅጝትዝ ጝተ ክንድጝድ ቀቭጘጘድ ክንድጝ ጽ/ጝንዙ ቲክነተ ዲቈተ አት ሀይሌ ወንድሙ አርቒስጝኩⶔ።
ክንደጥ ዊርተ ፃየው ክንድጝ ለምርጛንስም አቑ ክንድጝ ቀቨቁ ክንደጥዙ እግዘድ ቃፅቨናንስ ምጝግስትዝመ ከቨጥ ድርጅተን አቭርደነውዝ ክንደጥዙ ኹረዙ አፅቨ ኪርምስጛንስም ዋቕርጝኩⶔ።
ወይኽምረ ብሔረ እቅ ጭሰጭሰን ክንድጝ ቃወነድ ጝ ጋብዝ ዲቈው አምረይዝ አልምቱ ኹረዙ ድርጅትዝ ፃይሽተቁ ክንድጝ ጝንጥ ዊንጘጘድ ሚሪኲ።
ክንድጝ ቃወነይል ኹረዝመ ስረተ ኹረዙ ሙየ ጉሪየ አት መስፍን ዲቈው አምረይዝ ኹረዙ አፅቨ ኪርምስጝ ዊነቁ ሲዘ ወረጥድ ዲቈው አምረይስ ቲርፈው ግዘንዝ ነንም ኹረዙ አፅቨድ ፃጝዝጛጙ አቐነውድ ዊግትጝኩⶔ።
አቕሽም ጭሰጭሰኒዝጘድ እጝቅ ወረጢዙ ለወትረ ተግ ክንድጝ ጝንጢዝ ክልሊዙ ምጝግስት ጋብዝ ኹረዙ አፅቨድ ኪርምሻንስ ዋቕርጛጙ አቐነውድም አርቒስጝኩⶔ።
ብላ ክልልዙ ክንድጝ ቢሮድ ኹረዙ አፅቨድ ኪርምሰናንስ ቃውሰ አስልሽትዙ ሰበንድ አክንዋጙ አቐነውድ አርቒስኲ።
ብላ ክልልዙ ክንድጝ ቢሮ ኹረዝመ ስረተ ኹረዙ ሙየ ጉሪየ አት መኮነን ታደሰ ዊግትጘዊዝጘድ ክልሊዝጘ 2.8 ሚሊዮንዝ ንየ እፈር ኹረዙ አርውሸጥ ፃቨናንስ 5 ላ ሚሊዮን በጀት ገሪሽትኲ።
ቺተዝ ቈሽ ስወዙ እጅጝት ፃየቁ ሰሜን ወሎስመ ወይኽምረ ብሔረ እቅ ጭሰጭሰንዙ ጅውንጥል ትኩርት ፃቭሽት ሰራሽታጙ አቐነውድ አርቒስጝኩⶔ።
ወይ ኽምረ ብሔረ እቅ ጭሰጭሰኒዝጘድ ዲቈው አምረይዝ ምጝግስትዝ ኹረዙ አፅቨድ ፃጝሽታጙ ዊነቁ ሲዘ ወረጢል (አበርገሌ፣ ሰሃለ፣ ዝቛለስመ ሳቁጠ ወረደ) ነንም ኹረዙ አፅቨድ ቃፅለቁ አቐነውድ ዊግትጝኩⶔ።
እን ሸወጭ አቒዝም ምጝግስት ጋብዝ ፃይሽተቁ ሲዘ ወረጥል ኹረዙ አፅቨድ ኪርምሰው አቐነውድ አርቒስኲ።
እኒስ ከስጘም እቀኽቭሪዙ ሲትፍሽኒዝመ አልምቱ ኹረዙ አፅቨዝ ወይትል ላጥ ፃይሽየቁ ክንድጝ ጝንጥል አፅቨድ ቃፅልሰናንስ ሰራሽታጙ አቐነውድም ጋልፅጝኩⶔ።
“ንቕፀቊል ቃውሰ ገሪየኑ ክንደጥዝ ጭቑ ይውሽትሽም ወይትጘድ ላጥ ጅውነይስ ቺዝየው አቕንትዝ 1-8ትረ ክፍሊል አሽ የጝ ይውሽተውድ።
ቺተዝ ቆሽ አልምቱ ኹረዙ አፅቨዝመ ምጝግስት ጋብዝ ፃይሽተቁ ኻለየን እኩጙ”ይጝኩⶔ።
እኒስ በውግ ፃንሽ ፊራጙ ዊነው ኹረድ በረነውዝም ክንደጥ ጝተ ጅውነይል አርቕጘው ኹረድ አርውሽጛንስ ኻልየነውዝ ላው አምረዙ ኹረዙ አፅቨዝ አቐው በጀት ገሪሽተነውድ አት መኮነን ዊግትጝኩⶔ።
እኔንም ቃውሰ አስልሽትዙ ሰቭድ አቢት እን ሸወጪዝ ሲኑቲስ ኪርም በጀትድ ወረጢዙ ጝተ አካውንቲዝጎ ጥው ቃዚጝ ኹረዙ አፅቨድ ኪርመቁ አቐነውድ ልብስጝኩⶔ።
እፈር ዊርየው ጝተ አይምሮይዝ ዊርየው ክንድጝ ችጝጘውድ ጛይ ፅብጘዊል እጝቅ ኹረዙ አፅቨ ዊናንድ የጝ።
ግድርድን ክንደነውዝ ግነ አርቕት ሽምተነው ቸልሻውም።
ኹረዙ አፅቨ ክንድጝዙ ዊርተድ ደድሰነውዝ ቲክርክርሸተ ክንደጥ ፍርዘናንስ ቸልሰኲ።
አቓንስቅም እቀኽቭርድም አነ ሚሪሸው አካልድቅ እፈር እጥልቃንዝ ኹረዙ አፅቨ ቃዝየውዝ ኪርምሰነውዝ ዊርተ ፃየው ክንድጝ ክንድጛንስ ፃቨነው ጥውሸኲ።
ሳምራዊት ግርማይ
30/02/2018
