30ትረ አቭርደቁ መንግስተንዙ አየር ንቭርትዙ (COP30) ፃጝሽተው ጉባኤድ ፃረቊዙ እግዝግዘዝ ኽደር 10ስ ኪርም 21/2025 ግሬል አሽ ፃጝሽትጠ አቐነውድ ጋልፅሽትኲ።
ብራዚል አማዞንቱ ደኒል ጥወነይል ችጝሽረይ ቤለም ይሽትረይ ጝር ኻትመሸትል ፃጝዝተ አቐጘድ ጋልፅሽተው ጉባኤይል አየር ንቭርትዙ ሙየ ጉይጥ፣ ዓልም አቅቨ ቃወጥ ዝመ ዲፕሎማተን ችጝሽጝ ዊቱ ቃል ኽየው ቲግቭር ሰራሽጘኩ ይሽት ኻይሽተኩ።
ተረው ሸወጪዝ ፃጝሽተው እን ጉባኤድ፣ እንዝ በውግ አየር ንቭርትዙ ልውጠ ነሰናንስ ጥውሽተቁ ቃለንድ ቲግቭሩ አቐቅ የነዊዝ ምላሰን፣ 64 ኻግረን አልስጘቁ አይጥ ኻለየኒል ማኽርኽርሸነውዝ፣ አየርዙ ቢክልንድ ማኽተናንስ አገነ ፃይ ተረኩ ይሽት ሊምድሸኩ።
ፓሪስትል አየር ንቭርትዙ ቲስመምንድ ፊርመቁ 195 ኻግረኒስ፣ ሊጘ ሻቘትረድ አየር ንቭርትድ ችዝሸናንስ ቸልሰው አይር ኻለይ አልሲየቁ አቐነውድ አየር ንቭርትዝ ይውሽተው ትኩርትድ ፅጉጠጘድ ላው ምላሰን አቕ ጋልፅሽትኩ።
ብራዚልትል ፃጝሽተው አየር ንቭርትዙ ጉባኤድ ዓልም አቅቨ ብርትድ ማኽተናንስ ዓልምቱ ኻግረንድ ላው አቕጝ ሰራሽጘንስ ቸልሰው የጝ ይሽትኩ።
አየር ንቭርትዙ አጀንደ አሜሪካቱ አጀንደ አየውም የነውዝ በውግስ ይጝ ጋልፀቁድ አሜሪካቱ ፕሬዝደንት ዶናልድ ትራምፕ ጉባኤይል ጝተቕመም ችጝሻቁም፣ ደርግቭሸጥም በርሳቁም ይሽትኩ።
ዚርፊዙ ቲንትነጥ ቲንትንጘንድም ነን ተሚሰውድ እንዝ በውግ ይሽተቁ ቃለንድ ቲግቭሩ ፃቨነንስ ቸልሰው ፖለቲኩ ሚንውት ዝመ ጊንዝቩ ከቨ የጝ ይጝኩጙ።
ጉባኤድ አልም አቅቨዝ አየር ንብርትዙ ልውጠድ ቓቭዘናንስ እንዝጘም ተረዊዝ ተግረ ፊሰናንስ ትኩርት ፃቨው የጝ።
COP30፣ COP21ዝ ፊርምሸው ፓሪስቱ ቲስመምኒስ ጎነ ፃቨነውዝ ቲስመምንድ ቃፅለው አቐኲ።
ዋልጠ ማርፅሽተቁ ማኽልዘጥ አውር ኻለየንድም፦
√ ግሪንሀውስቱ ጋዝዙ በርሽትንድ(ሊቅሽንድ) ቃፅቨነው።
√ አየር ንቭርት ልውጠይጅቅ ዲዝጘነው።
√ ሊግዘነዊል ችጝሸቁ ኻግረንዝ አየር ንቭርትዙ ፋይናንስ አኽቨነው።
√ አይርሸቁ ኻይለንዝመ እጥልቃን- ካርቦን ቴክኖሎጂየንድ ሊጊሰነው።
√ ድር ፈራዘነውዝመ ታኽንኽነነው እንዝጘም ቈሽ
√ አየር ንቭርት እክሱነይ ፃቨነዊል ገረዱ ሚልከንድ እክሰነው የቁ ጛይ።
እንዛይ ኽየቁ ኻለየንል ትኩርት ፃቨነውዝም ዲቈውዝ ዊነው ሚንውትዝመ ተረዊዝ ፃቭሽተቁ ተግረንጥድ አቭርኽርኽሽትጘኲ።
ቺተዝ ቈሽ አልምቱ ብርትዙ ቈሽንድ 1.5 ዲግሪ ሴንቲግሬድዝጎ ጊምዘናንስ ትኩርት ይውሽተኩ ይሽት ኻይሽተኲ።
ሚዝረድ Africa news ስመ Wionቱ የጝ።
ሳምራዊት ግርማይ
ጥቅምት 30/2018
