ዝቋለ ወረደል ልኰ ኳስዙ ክለቭ ሲሪሩ

‎ወይ ኽምረ ብሄረ እቅ ጭሰጭሰን ዝቛለ ወረደ ስፖርትዝመ ውሸብል ጽ/ጝንድ ግልቊዙ ስፖርት ጓነ ሲሪየነውድ አርቒሱ።

ስፖርት  እጅር ኹርዙ አካል ዝውዝመ እምሮዙ ትኽነዝ ኽየው አርወ ጽየው የጝ።እጅር ኹርም እልት እልቱ ፍልውልወይዝቅ ቺተቺተቊ ስፖርትዝቊ አይንተንድ ሰራሻንድ እትለኩ። ጝጊስ ከስጘም ስፖርት  ለወንትድ አትርዘናንስ ቲኪሸጥ ውሸቭል ፋጥረናን ኽየው እኩሰ ጽየው የጝ።

ወይ ኽምረ ብሄረ እቅ ጭሰጭሰን ዝቛለ ወረደ ውሸብልዝመ ስፖርት ጽ/ጝንድም እኔንት ልብተነውዝ ልኰ ኳስዙ ክለቭ ሲሪየነው ቸልኩ።

ልኰ ኳስዙ ክለቭድ ሲሪሻንድም እጉር ዝቛለ ወረደይል ቺተቺተቊ ስፍሊል ምጝግስትዙ ሰቭል ውላቕጝ ሰራሽጛጙ ዊነቊ ነንቱ ሰቲዝ ሳቁጠ ኻትመዙ ጽበጥ አቐቊጅቅ ቀንትዙ ዋርደ ጻቭጘጘን ዝቛለ ወረደ ስፖርት  ጽ/ጝኒስ ችጝነዉ ሚዝረድ ሚሪሰኩ።

ጽ/ጝንድ ክለቭድ ሲሪየነዊስ ከስጘ ለውንትነይድ አትርዘናንስ ቲኪሸጥ ውሸብል ፋጥረናንስ ከቭሰው አቐጘ ወረደይዙ ውሸቭልዝመ ስፖርት ጽ/ጝን ዲቈተ አት ዝናቡ ሚካኤሌ ዊግትጝኩጙ።

ጓነይዙቊ አቫለኒስ ማኽል እጉር ዝቋለ ወረደይል ምጝግስትዙ ሰቭዝ ንቕጸው እምታንዝ አግልግላጙ ዊነው አቓንድ ነንቱ ሰቲዝ ዝቋለ ወረደይል ልኰ ኳስ ጓነ ሲሪሸነውድ ቲክን ሳቁጠስ ፊረነዉ ቸልጘጘ አት ደሳለኝ አዳነ ዊግትጝኩጙ።

ክለቭ ሲሪየናስመ ቲኪሸቊ ውሸቭል ፋጥረናንስ አለመ ጻቭሽት ክለቭድ ሲሪሸጘ ላየ ጓነይዙ አቫል አቐው አት አለም ሰገድ ማሞ ዊግትኩ።

ወረደይዙ ልኰ ኳስዙ ጓነድ “ዝቋለ ልኰ ክለቭ” ቅፅል ሽጙዝ ለልድ የነውዝ ጭጝሽጠጘም ጻቭሽትኩ።

አመልማል ተድ

ጥቅምት 30/20218

‎