‎ሰፖርትድ ጡውሸውዝ ሰራሸናንስ ዋለዙ እጅጝትድ ጽጋ አቐጘ ጋልጽሽቱ።

‎‎ኻግረን ስፖርትዙ ጻጝትድ ጥቕዘ ፋጥረተዝመ አልምቱ ስፖርትዙ ቱሪዝምስ አሩሸተ አቓንስ ቸልሰው ኽየው ሰቭድ ጐነይስ ሰራሽጘውድ ስፖርትዝቊ ሲሪቊ እፍርተንድ ቃውስጝ ሰራሸነውዝ የጝ። ስፖርትዙ ሊግዝትድ ኽየው ስፍረል ቺጚሰውድ ቖሽ እን ጻጝትድ የጝ።

‎‎ይነ ኻግር ኢትዮጵየ ትጘድም ውሸቭልድ ጝታቕመት ስፖርትዝቊ ፍልውልወንጥዝ ዲቊስጛንስ ቸልሰቊ ስፖርትዝቊ ሲሪቊ እፍርተንድ ፍራትዝ ሰራሸነውዙ ጻጝትድ ጣቅ ዚምናኒዝ ቀሰውዝ ቃልሽታጙ ችጝሸው  ጻጝት እኩ።አቕም ግነ ብሄረ እቅ ጭሰጭሰኒዝጘ ቺተቺተቊ ስፖርተኒስ አቐቊ ሊግዘጥ  ስፖርተኝጥ ችጝሽጝሽም ጝታቕመት አልም ተምዝረይ ስፖርተኝጥ ፃቨናንስ ቸልሰው ስፖርትዙ ፍልውልወንድ ሰራሸናንስ ቸልሰው ዋለ እጀቊ አቐነውድ ውሸቭልድ ጥውሽት እጀው ስፍረይዝጐ ፊርጥጘ ማጥን ጻቭሰነዊስ ከስጘ ጝታ ክንድጝዙ ለምርምረይስም ጥቕዘ ጭሳጙ አቐነውድ ወይ ኽምረ ብሄረ እቅ ጭሰጭሰን ጻግቭጂ ወረደ ጻተ ኻትመዙ ጽበጥ ማኽሊስ አት በለጠ ላቀውስመ ዊዝር ጽሃይ ንጉሱ ” ስፖርት ሰራሸናንስ ጅውነይል ውሸቭሊስ አቐው ሚቸው ዋለ እጀው አቐነዊዝ አየው ስፍረይል ግሪጥጘ ማጥን ጻቭሳጙ ችጝሸኩ” ይጛንድ ዊግትጝኩጙ።

‎‎ ብሄረ እቅ ጭሰጭሰኒዙ ስፖርትዙ ቱሪዝምድ ሊጊሰናንስ ስፖርትዙ እፍርተኒስ ቲኩርት ጻቭን ሰራሸነው ፈንድ ቓሊሰነው ቸልሽኩ። ውሸቭልድ ቺተቺተቊ ስፖርትዝቊ አይንተኒስ ፈኑ አቓየጘድ ዋለዙ እጅጝትድ ፈተነ አቐነውድ ቃለ ነየጢዙ ኻሠቭድ ቃሊሰኩ። ቃለ ነየጢዙ ኻሰቭድ ጐነ ጻቨነውዝ ወይ ኽምረ ብሄረ እቅ ጭሰጭሰን ጻግቭጂ ወረደ ውሸቭልዝመ ስፖርት ጽ/ጝንዙ ዲቈተ አት ዋጘው ደሳለኝ ችግሰድ እክሰናንስ ሰራሽታጙ ቸጝሸው ሰቪዝ ዲዝጝትዝቊ ዋለንድ ኻየነዊስ ከስጘ አይር ስፖርትዙ ፍልውልወንድ ሰራሸናንስ ቸልሰቊ ዋለንድ ሰራሸናንስ ግነ ኽየው በጀት ዋቕረው አቕሽም ጅውነይዝጘድ አቒቱ በጀቲስ ሰራሸናንስ ኻሊሽተው ፈንድ እድ ቑጠም አቐነዊዝ ውሸቭልድ ተምዝጘዊዝጘ ጻቨነው ቸልሽየውም ይጘኩ።

‎‎ ” ኻትመዙ ፕላንድ ተርየው አቐነዊዝ  ውሸቭሊስ አቐዉ ቺተቺተቊ ስፖርትዝቊ አይንተንድ ሰራሸነ ዋለ አስለናንስ ቸልሽየውም” ይጛንድ ዊግትጝኩጙ።

‎‎ብሄረ እቅ ጭሰጭሰኒዝጘ ስፖርትድ አምረይስ አምረ ቀንሻጙ ተረው፣ፈን ነሰተ አቓጙ ተርኩ። የቁድ ቈሽ ቃወነይዙ ዲቈተ አት አብዱሩሁማን መኮነን ሰራሽታጙ ጽበዉ ሰቭድ 2018 ዓ.ስ ጻጝሽተቊ ቲክርክረንድ ፈንድ ጥውሸውዝ ቓሊሰነው ቸልጝኩጙ ይጝኩጙ።

‎‎”ወይትል አውግረው ግርብ ጽየውድ ላውድ ስፖርትዙ ዚርፍድ የጝ። እንዝም ዲቈው አምረይዝ ጻጝሽተው ቲክርክረይዝ ይውት ጽየቍ ዉሸቭልድ ጽይን ስፖርትድ በዊዝጐ ነስን ከቨ ጻቨናንስ እክሰቁ ውሸቭል ችጝነው አቐጘን ቃልንኩኑን” ስፖርትዙ ፍልውልወኒስ ንቕጸዝ ዲቁስጛንስ ቸልሰቊ ስፖርትዙ ፍልውልወንድ ሰራሸነ ዋለዙ እጅጝትድ ቓጽቨናንስ ሰራሽታጙ አቕሽም ቲኩርት ይውን ሰራሸነውዙ ጻጝትል ችጝር ጒይጢል ችግሰ ጽበጘ ጉይጝኩጙ።

ሀመልማል ተድላ

ኽዳር 15/2018