ሩሲየስመ ዩክሬንስ ዲግዙ ቲስመምኒዝጎ  ተርጥጘ የጝ።

አሜሪከቱ ፕሬዝዳንት ዶናልድ ትራምፕ ሩሲያ-ዩክሬንቱ ጣይትንድ ዲግዙ ቲስመምኒዝጎ ነሰቁ ኻለየን እቑርⶔ።

አሜሪካቱ ፕሬዝዳንት ዶናልድ ትራምፕ ሩሲየስመ ዩክሬንትል ሲዘ እምትዝጎ አልተው ጊዝዝ ቑጠ ፅበው ጣይትንድ ችብሰናንስ ትኩርት ፃቨነውዝ ዲግዙ ቲስመምኒዝጎ ነሰቁ 28 ነቁጠ ፃየቁ ኻለየን ፃድቅዝጘጘ ለወትረ አጉረተ ጭሰጭሰን ስልጣንጉሪየድ አርቒስኲ።

ኻለይድ ትኩርት ፃቨውድም ዚልቀተ ዲግድ ኻይሰናንስ ሊጘ ዊግናንዙ ዳኽንነይዙ ወይትነይ ይወነዊል የጝ ይሽትኲ።

ዩክሬን ተምዝረቁ ዝመ ዚልቀተ ዲግ ሩዝራንስ ፃቨቁ ኻለየንድም ጥቅልዘው የጝ ይሽትሽም ስልጣን ጉሪየድ ኻለይድ ዘዛሽንዝ ጋልፅየውም። ነንም ሚሪሸቁ አካለኒጅቅ ቲስመምን ፃቭጛጙ አቐጘድ ሚሪሽኲ።

ኤንቢሲቱ ዘገቨይዝጘ ሻቘ አሜሪካቱ ስልጣን ጉይጥ ዊግትጘጘድ ዲግዙ ቲስመምንዙ ማዕቀፍድ ነኳን አሽ ኪየቭትል አልትየውም።

እንዝጘም ቈሽ ዩክሬንቱ ምጝግስትዝ  ፍልፍለ አቐው አውሮፓት ስልጣን ጉሪየድ ቈሽ ዩክሬን ኻሊረው ዲግዙ ኻለይድ ቃርፀነዊል ውርም አይንት ችጘር እጅረይ አረጘድ አርቒስኲ።

ዩክሬን ኻለይዝ ጅሉዘ ዘዛሸው ጋልፀነ ይዊሽቲረይ አረጘድ ዊንም ጥወር ይውተ ማጥን ዋቕርሺረይም የውኩ።

እኔን ፅበጘድ አቕ ዩክሬንቱ ስልጣን ጉሪጥ አልተው ውሳኒዙ ኻሰቭድ ፖለቲከዙ ጎነጎን የጝ ይጝኩⶔ።

እንዝጘም ሩሲየ ዩክሬንትል ኪስሽተውድ ቲስመምንዝ ጅሉዘ አሜሪከቲስ ውርም አይንት ሚዝረ ችጚረጘድ ቈሽ ቢዘ ኻለይ  ሚኒስቴርዙ ቃል ለምሰተ ማሪያ ዛካሮቫ ዊግትጝኩⶔ።

28 ነቁጠ ፃየው አሜሪከቱ ኻለይድ ትራምፕ ጋዛቱ ፈን ፃየው ቲስመምንድ ጎነ ፃቨነውዝ አቐነውድም ጋልፅሽትኲ።

28 ነቁጠ አሜሪከቱ ዲግዙ ቲስመምን ኻለየንድም፦

– ዩክሬንቱ ንየትነይድ ደድሽተኩ

– ሩሲያ ዩክሬንዝመ አውሮፓት ማኽሊል እጝቅትነይዙ ጠቃዝን እጀው ቲስመምን ፃጝሽተኲ።

– ሩሲየ ግፅ ኻግረንድ ዊራይረጘድ ፃቭሽተኲ።

-እጝቅቱነይዙ ዳኽንነይዙ ኻለየንድ እክሰናንስመ አልም አቅቨ ዳኽንነይድ ደድሰናንስ አቭላይሽን ፃቭሽተኩ።

-ዩክሬንቱ አምንሰተ ዳኽንነይዙ ወይትነይ ለምረኲ።

-ዩክሬንቱ አጭነ ኻይለንዙ ምፅነድ

600,000 ሰቭተጥዝ ጭቑ ጊድቭሸው አቐቁ።

– ዩክሬን ጝር ኽገ ምንግስትድ ኔቶጅቅ አቨርዳይ አረጘዝመ ኔቶ ቈሽ ዩክሬንት ተረዊዝ ለምራይረው ድንግገ ኽግ አቒዝ ድወናንስ ቲስመምርኩች።

-እንዝጘም አሜሪከ ወይትነይዝ ከሰነ ለምረች።

ዩክሬን ሩሲያት ዊረናንስ ኻሊየውዜ ጝ ወይትነይድ በኲ።

ተከተከዊዝ ሩሲየ ዩክሬንት ዊርሽ

እጝቅ አልም አቅቨ ማዕቀቨንድ ዊንጘዊዝጎ ዋጥረቁ አቐጘዝመ ላጥ ተከተከቁ ቲስመምንድ ፃየው ኻለይ አቐነውድ አክሲዮቲስ ይውሽተው አቭርኽርኸነድ ሚሪየኲ።

ሳምራዊት ግርማይ

ኀዳር 15/2018