ወየዙ ቈሽንድ ጽብንድ ቃወናንስ ጽጋ ፋጥረጘ ጋልጽሽቱ

‎ምጝግስት ሰቭተተይዝ ፅብንዙ ኪብርንድ እርጋዘናንስ ሚስኩርም 2018 ዓ.ስ ኪርም ምኻየዙ ቈሽት ፃቨነውድ አርቕሽተው የጝ።

‎‎እኔንት ቲክንም ቺተዝ ቈሽ ሻቅጠ ማቅጠ ኢንዱስትሪዙ ጊቭርተኒል አጉረው ወየዙ ቈሽት ቓልሽታጙ የጝ።

ድሃነ ወረደ አምደወርቅ ኻትመ ጭሰጭሰን አምደወርቅ  ኻትመዙ ፅበተ አት አለነ ደባሽ ሳስ የው ምኻየ ኪፍልሸቊ ማኽሊስ ጛይ።

‎‎አርፈይዝ ጝተ ናኒል ችጝረይ ጝታ ምኻየሸንስ ጝነቊ ጭሰጭሰቊ አጘንድ ነን ፅበው ፅብንዙ ኪብርንድ ጝተ ፅብኒል አውጉረው ጥቕዘ ጭሳጙ አቐነውድ ዊግትጝኲⶔ።

‎‎አት አለነ ቺተዝ ቈሽ ምጝግስት ሰቭተጥዝ ቈሽተው ምኻየዝ ምላሰን ሻቅጠ ማቅጠዝመ ላጥ ጊቭርተኒል ፃቭሽተው ወየዙ ቈሽንድ “50 ቊርሸዝ ጅቭሽታጙ ዊነው አትረጘድ ነን ማጽወ ኮርዝ 120 ቊርሽ ቅይሻጙ የጝ ዘይትድም አቕሽ ዊነዊስ 200ስ ኪርም 500 ቊርሽ አጢስ ቈሽኩ”ይጝኩⶔ።

‎አቓንስቅም ምኻየ ቈሸነው ጭቑ አቒጝቀ አርየዙ ርጋዝኒልም እኒስ ሚቕ  ሻቘ እርፍዝ ኪፍልሸው ጣቭ አልሳጙ ዊናንትጘ ነንም ምጝግስት ሰራሸነው ጥውሸው አቐነውድ ኻስቭዝጘኲ።‎ ጥውሽት እጀው ወየዙ ቆሽት ጻቨቁ ተግረ ፊስሸትጠ ጡውሸኩ ይጛንድ ዊግትጙ።

‎ነንቱ ሰቲዝ ቆሺተው ምኻየድ ዊትዊዝም አቕሽ ከብሰው አቅሽም ገነ ቁርሻንድ ናኒል ጥዊቀት ሻቅጠ ማቅጠይል ቈሸ ጻቭሽትኩ የቊድ ቈሽ አምደወርቅ ኻትመ ጭሰጭሰኒል ምጝግስቱ ሰቭ ሰራሽጛጙ ችጝሸቊ አት ኪሮስ ጎሹ ምኻየዙ ቈሸ ጻቭሽተነውድ ይና ጽብኒል ጽጋ ፋጥርኩ ነንቱ ሰቲዝ ጽብንዙ ኪብርንድ እቀጘዝ (ጽጐወው) አቐነዊዝ እጅር ኹር ጽበነው ቸላው ተጊል የጝ ቸጝሽነውድ”  የነዉዝ ጋልጸቊድ ጽበተድ ምጝጝስት ሽኳር፣ ዘይትዝመ ግዘን እኒዝጘም ጣቭ ሸምተጥ ገረጥዝ እድወዝ አልሳን ቀሰው የጝ የነዉዝ ነንቱ ሰቲዝ ኒግርን ጽ/ጝንዝ ምላሰን ዘይት አልሰናሥ ጻቨው ፍልዉልወድ ቀቨቀቭሽተው አቓንስቅ ሩዝጠ ጥውሸንትጘም ጝታ ኻሰቭድ ቢንስጝኩጙ፡፡‎

‎ላየ አምደወርቅ ኻትመዙ ጽበተ  አት ሙሉ ዘነበ  ጝታ ጋቢዝ “ይነኻግርስ ምጝግስት ጽብንዙ ኪብርንድ እርጋዘናንሥ ሰራሻጙ አቕሽም እትለቁ አልስንዙ ቢተንጥድ ቃቭዘናንስ ልቕረ ጻቭጠ ጡውሸኩ ይጝኩጙ።

‎‎ምጝግስት ጋቢዝ ሽምተጥ ሰቭዙ ገረጥዝ አልታጙ ዊነው ዘይት፣ ሽኳርዝመ ግዘን ኮሪዝመ ጡውሸውዝ አልሰነውዝ እትለው እጅጝትድ ቓቭዘናንሥ ሰራሽጠ ጥውሸንትጘም ኻስቭዝጝኩጙ።

‎”ምኻየ ቈሹ ይሽተነዉድ ቲክን ተረው ወየዙ ቈሽንድ ኒይጥድ ቃውስጝ ጊቭርትድ ጭቭሰነዊዝ ምላሠን ወየ ቈሽጠጘ ጻቭጛጙ አቓንድ ተክዘዝ ቑጠም 140 ቊርሽ ዊነው ስኳርድ 190 አቕኩ”ነንቱ ሰቲዝ ምጝግስት ጋቢዝ ጻቭሽታጙ ችጝሸው ፍልውልወድ አትር ቃጽልጠጘዝመ ኽዝቭድም ወየዙ ቈሸ ጻቨቊድ ዲቊስን ይወነው ጡውሸንትጘ ዊግትጝኩጙ።

‎‎አምደወርቅ ኻትመ ጭሰጭሰን  ኒግርንዝመ አርየ እፍርት ጽ/ጝንዙ ዲቈተ አት ሞገስ ጥጋቡ ዊግትጛንትጘ ኻግሪዝጘ ምጝግስት እቀ ኽቭሪዙ ጽብንዙ ኪብርንድ እርጋዘናንሥ እክሰቁ ሰባንድ ሰራሻጙ የጝ።

‎”ጽበው ጽብንዙ ኪብርንድ  ማኽተናንስ ወረደይዝጘ  አርየዙ ግሬድ ማርጸነውዝ እቀ ኽቭሪዝ አስክዘዙ ልብትን ችጝጥጘ ማጥን ቲክንክነዝ ሰራሽናጙ የጝ እቀ ኽቭሪስ ጋብ ጉይሽተው ዋቕረድ ጥውሽት ጻየው የጝ ተረዊዝ ዋቕረድ እክሰናንስም ላው ሚሊየን ቊርሽ በጀት ገሬነውዝ ችግሰድ እክሰናንስ ፍልውልወ ጻቭናጙ የጝ” ይጝኩጙ።

‎‎”ምጝስቲስ አልተቁ ጥወራንድ ኮሪዝ እቀ ኽቭሪዝ አልሰነዉዝ ኻሊሽተው አለመይል ግሪሰነው ጡውሸኩ ይጝ አልስንዙ ጽጉትድ ቓቭዘናንስ ጊቭርዘተይጅቅ አርየዙ እፅቀፅቈ ፋጥረነውዝ ሰራሽታጙ የጝ። ጽብንዙ ኪብርንድ ቃጽቨናንስ አልስኒስ ትንዝሽትኒል አሽ እትለው ቢተድ ደምደመነውዝመ ኦዲት ጻቨነውዝ ጨቅሸው ተስር ፋጽመቁ አካለኒል ኽጉ ተግረ ፊስሽተኩ” ይጝኩጙ።

‎‎አቐነዊዝም ወረደይል ችጝሸቁ ምጝግስትቁ ሰቭተጢዝመ ኻትመሸንትቁ ጽበጢስ አይነተዝም ሳስ የው ጽብንዙ ተጊል ችጝሸቊዝ 12 ሺኽ ሊትር ዘይት አልሰነው ቸልሸጘ አት ሞገስ ጋልጽጝኩጙ።

‎ፅብንዙ ኪብርንድ ርጋዘናንስም አቭርት ሰቭዙ ገረደን ጝታ እኩሰድ አጉረው አቐነውድ አርቕሽተው የጝ።

‎”‎አምደወርቅ ኻትመ ጭሰጭሰን አቭርት ሰቭዙ  ገረደድም ሳስየው ፅብንዙ ተጊል ችጝሸቊዝመ ምጝግስት ሰቭተጥዝ ንኻሽ አርፈይዝ ሻቘ እርፍዙ ምኻየዝ ኪፍልሸው ጣቭዝመ ፋብሪከዙ ጊቭርተን አልስን ዊኑን”ይጝኩጙ ።

‎‎ ነንም አርየዙ ቈሽት ቓሊሰቁ ጊቭርተንድ ፅንኸ ፃቨነውዝ ፅብንዙ ኪብርንድ ርጋዘነውዙ ሰቭድ ቃፅለው አቐነውድ አርቒስጝኩⶔ።

‎ምጝግስትዙ ሰቭተጥዝ ቈሽተው ምኻየድ ፅብንዙ ኪብርንድ ርጋዘናንስ ከቭጠ ጥውሸኩ ጚ ኒግርንዙ እቀኽቭርድ ፅብንዙ ኪብርንድ ወሰናንስ አርውሽጝጠ ጥውሻውም።

‎‎ሚስኩርም አርፈይስ ኪርም ቈሽተው ምጝግስትዙ ምኻየይዝ ምላሰን ቺተቺተቁ ጊቭርተኒል ወየዙ ቈሸ ቓልሽትጛጙ አቐነውድ ሚሪጝኩⶔ።

‎ጊቭርት አርየይዝጎ ፊሳቁዝመ ወየ ቈሸቁ ንየጢል ፊስሽታጙ ፅበው ተግረድ አትር ቃፅለነውድ አርቒስጝኩⶔ።

‎”ግቭረ ኻይልዝ 30 ኒግርንዙ ድርጅተኒል ደግምግመዝ ቲክንክነዝመ እግዝግዘ ፃቨነውዝ ወየዙ ቈሽንዝመ ጊቭርት ጭቭሰቁ 20 ኒግርንዙ ድርጅተኒል ተግረ ፊስንኩኑን” ይጝኩⶔ።

‎‎አርቕት ፋጥርንዙ ሰቭድም አትርዝጝ ቃፅለቁ አጘንድ ሳስየው ፅብንዙ ተጊል ችጝሸቁ እቀኽቭሪዙ ክፍሊዝ ፅብንዙ ኪብርንድ ሩዘናንስ አቭርድን ሰቭዙ ገረደይጅቅ ሰራሽታጙ አቐነውድ ሚሪሽትኩ።

ሐመልማል ተድላ

ኽዳር 30/2018