ሊግዘጥ ውሸቭል ስፖርትዙ ዘናሸነ ስፍረይል ግሪጛንስ ስፖርትዝቊ ጐዘመዛን በንዘው የጝ። እንም ጝታ በንጘው ሰፖርትዙ ፍልውልወድ ቸልትዝ ሰራሽጛንስ ጻበኩ።
ወይ ኽምረ ብሄረ እቅ ጭሰጭሰን አበርገሌ ወረደ ውሸቭልዝመ ስፖርት ጽ/ጝን ሊግዘጥ ውሸቭልድ ስፖርትዝቊ ጐዘ መዛን ችግሰይዝ ምላሰን ስፖርትዙ ዋለይስ ዳእክልጘጘ ስፖርት ምኽርጝንድ ፕሮጀክት ቃርጸነውዝ ቺተቺተቊ አካለኒስ 69 ሺኽዝ 400 ቊርሻን አኽቨነውዝ ስፖርትዝቊ ጐዘ መዛን ሊግዘጥ ውሸቭሊዝ ከቨ ጻቨነውድ ወረደይዙ ውሸቭልዝመ ስፖርት ጽ/ጝንዙ ዲቈተ አት ህድረይ ወልዴ ዊግትጝኩጙ።
“ጽፈሽ ጝንድ ፕሮጀክት ቃርጸነውዝ ምጝስቲስ ችጝነው ቊርሻኒስ ቈሸዝ ሊግዘጥ ውሸቭልድ ቀሰው ቲክርክረ ጻቭጛንስ ይናይም ፕሮጀክት ቃርጽን ቺተቺተቊ እቀ ኸቭረኒስ አኽቭሸው 69 ሺኽዝ 400 ቊርሻን አኽቭን ውሸቭልድ ስፖርትዙ ፍልውልወይዝጐ ተርጛንስ ጻቭናጙ የጝ”
ስልጠነድ ፊስናንድ ኳስዙዝመ ማሌዙ እጅጝት ዊኑ ነንቱ ሰቲዝ ከቨ ጻቭሽተነዊዝ ምላሰን ስልጠነድ ፊስናጙ የጝ ያንድ ሳልጥነተ ውሸቭለ ናትናኤል ሹመት ዊግትኩ።
ውሸቭለድ ቈሸነውዝም “እኒስ በውግ ይናት ችግርዛጙ ዊነው ገቨይስ ላውድ ስፖርትዝ ጐዘ መዛን እጀቊ አቐነውድ የጝ። ኳስ፤ ማሊየስመ ቺተቺተቊ ገበን ይና ፕሮጀክቲዙ ሰቭድ አትርን ሰራሻይነጘ ጽጋ አቕጝ ዊንጙ። ነንቱ ሰቲዝ ከቨ ጻቭሽተነውድ አትርን ሰራሸናንስ ጻቨኩ” የነውዝም ሳልጥነተ ውሸቭለድ ቈሸነውዝ ጋልጽኩ።
“እኒስ ሚቅ ሳልጥንናንድ ኳስዝመ ማሊያዙ እጅጝት ዊኑ ነን ግነ ማሊየዙ ከቨ ጻቭሽተነዊዝ ላጢጅቅ እርወ አቕን ቲክርክረ ጻቨናንስ ከቭኩ” የነውዝም ጋልፅኩ፡፡
ሊግዘጥ ውሸቭልድ አየው ስፍረይል ግሬቊ ዊነቊድ ሳልጥነጥ ሊግዘጥ ውሸቭሊስ ከቨ ጻቭሽተነዊዝ ምላሰን ላጥ ውሸቭልድም ስፖርትዙ ዋለይዝጐ ተርጛጙ አቐነውድ ሳልጥንዘተ አት ብርሃኑ ጊደይ ዊግትጝኩጙ።
ውሸቭሊስ ስልጠነ ይዋጙ ችጝሸው ሳልጥንዘተ አት ብርሃኑ ጊደይ ቈሸነውዝም ጝፈወነ ጊዝድ ሚቸ ምችዘነውዝ ውሸቭልዝ ስልጠነ ይዋጙ ችጝሸው አቓንድ እኒስ በውግ ስልጠነድ ይውጛንድ ሊግዘጥ ውሸቭልድ ማሌዝውዝመ ኳስዙ ችግሰዝ ምላሰን በንሽተው ስፖርትዙ ፍልውልወድ ጻቨነው ቸላቊ አቐነውድ ጋልጽጝ ነንቱሰቲዝ አቓንድ ወረደይዙ ስፖርት ፅ/ጝንድ ወረደይዙ ስፖርት ምኽር ጝኒጅቅ ማኽርኽርሸነውዝ ስፖርትዝቊ ጐዘ መዛን ጅቨነውድ በንሽተው ስፖርትዙ ሰቭድ ሰራሸናንስ ቸልሸጘ ጋልጽጝኩጙ።
አመልማል ተድላ
ኽዳር 30/2018
