ክንድጝ ጝንጥ አርቕትዙ ሲሪየ ጭቑ አቒጝቀት ፋጥርንዙ ፍሊየም ጛይ። እቀኽቭሪዝም ፅርሸው ናፅነይ ይውጘኲ። እኔንም ቀለው ዋርደይስ ኪርም አካዳሚዙ ፈንዝ ኻይሉ መሰሪ ጛይ።
ኢትዮጵየትል ፅበቁ ምርምረዝመ ምጝግስትዙ ችብረንጥድም ክንደጥ ቺተዝ ቈሽ ሳይንስዝመ ቴክኖሎጂዙ ዚርፍዝ ጝተ ፋጥርንድ አትርዘናንስ አጉረው ትኩርት ይውሽተው ተከኲ።
ኻግሪዝጘድ ሳይንስዝመ ቴክኖሎጂዙ ፋጥርንዝ ፃቭሽተቁ ቲክርክረንዝም ወይቱ እኹርሸጥ ጝተ ጅውነድ ጭጝስጛጙ ችጝሽጘኲ።
ክንደተ መስፍን መኮነን ላጥ ክንደጢዝጘ ምጝግስትዙ ክንድጝ ጝኒል 1-8ትረ ክፍሊል አሽ ጝ ክንድጝድ ቲክንክናጙ ችጝሸኲ።
ክንሰጥ ክንስጘው ገሪየኑ ክንድጝድ ቃዝየውዝ ፃየነውዙ ጝቸልትድ አጉረው አቓንስቅ ጝናንድ ቃወውድ ክንደውድ ቲግቭሪዝጎ ላውጠነዊዝጎ የጝ።
ክንድጝ ጝንጢል ይውሽተቁ ቲግቭርዙ ፕሮጀክተንድ ለወ የው ሰራሸነው ኪርማንድ ጥየይዝመ ልየይዝ እልጣንድ ሽውሽራጙ ሰራሽረይ ኲየንዙ ዝላድ እፈረዙ ጝ አዕምሮይዝ ኻስቨነውዝ የጝ።
ኪርመነይዝ ጝንዙ ሰቭ ይሽት ይውሽተው ሳይንስ ቲግቭርዙ ፕሮጀክትድ ካርቶንዝ ሰራሸነውዝ ንቕፀቁ ፋጥረንጥ ክፍልዙ ፈንዝ አርውሻጙ ተርኲ። ኻለይዝ ጭቑ እዳቕየው ክንደተ መስፍን ክፍልዙ ፈንዝ ጭቑ አቒጝቀት ኲየንጣንዙ ኻይልዝመ እርጞድ ጅዝጠ ቸለው ማሽን ተሰነውዝጎ ጥው የነት የጝ።
ጝክንድጚዝ ጉለሸ አቐውድ ክንደተ መስፍን ጝ አቅልዝመ ክንሰጥዙ ከቨዝ ጝፋጥርንዙ ሰበንድ ፈራዘነውዝ ዝቨ ደደቁ ፈንጥ ነሰነው ቸልኲ።
እንዝም 2017 ዓ.ስትዝ ብሔረ እቅ ጭሰጭሰኒዝጘ ዊነው ክንሰጥዝመ ክንደጥዙ ሳይንስዝመ ቴክኖሎጂ ፋጥርንዙ አውደ ርዕይዝ 2ትረ ደረጀድ ፃየነው ቸሉ።
ዝቛለ ወረደይዝጘ የውም ወይትጘድ ፅበው ኤሌክትሪክ ችጝሽተትነይዙ ችግሰዝመ ቃነ ቈዘቁ ኲየንጣንዙ ችግሰድ እክሰናንስ ኻሊየነውዝም ዚምኑ ኻበሸ ፊየነ ማሽን አስለነው ቸለጘድም የጝ ዊግተውድ።
“ይናጅውነይል ኻበሸ ፊሸውድ ቃነዝ የጝ፣ እንዝም ኲየንጣን ልየዝመ ጥየይዝ ጝተ እልጣንድ ሽውሽጛጙ የጝ ሰራሽጝ ዀስጘውድ” የኲ።
እኔንት እክሰናንስም ኤሌክትሪክዝመ ቃነ ቈዘነዊስ ቢዘ ሰራሸው ኻበሸ ፊየነ ማሽን ሰራሽ ፌደራል ተግዝ ቲክርክርሸነዊዝ እቀጘዝ እምጥጝዘው አቐነውድ ዊግተኲ።
ክንደተድ ፌደራል ተግዝ ቲክርክርሸነውዝ 3ትረ ተግድ ፃየነው ቸለው አቓንድ ፈን ፊሰቁ ጥወረንዙ ከቨድ አቅልዝመ ክንሰጥ ከቭሰነውዝ ጝ ጋቢል ዊንጘጘድ ዊግትኲ።
“ያቅል፣ይፃምረ ምስጋናውስመ ክንሰጥድ ሙየዙ ከቨዝመ ጎዘመዘዙ ከቨ ፃቭጝኩⶔ። ያቅልድም ችጝሻቁ ገበንድቅ ጅቭጝ አልስጛጙ የጝ እንል ችጘርድ” የውኲ።
አውማው ጅውነይል ችጝሸቁ ቀቨቀቭሽተቁ ኤሌክትሪክዙ ቀቭረንጥዝመ አጭነ አርውሽ አቑዙ ኻበሸ ፍየነ ዚምኑ ማሽን አስለነው ቸልኲ።
ተረዊዝ ቈሽ ሚሳኤል ሰራሸናንስ ኻሊየው ኻለይድ እማን አጠ ማጥን ኢንጂነሪንግ ክንደናንስ በንት ፃየጘ ጋልፅኲ።
ዝቛለ ወረደ ዊከ 1ትረዝመ ማኽልኘ ክንድጝ ጝንዙ ሳይንስዙ ክንሰተ ሙሀባው ማሩ መስፍንቱ ክንድጝዙ ፃየድ ውር ተከው አቐነውድ ነይጘው ኻሰቪዝ “ክንደተ መስፍን ጝ ክንድጝድ ጥውሸውዝ ቲክንክን ቃዝየውዝ ለምረነውዙ አቅም ፃየው ጉለሸ ክንደተ የጝ” ይጝኩⶔ።
ሳይንስ ክንድጝዙ አይንቲዝም ክንደጥ ቲግቭርዝ ዲዝጝዝጘቁ ፕሮጀክተን ይውሽትጛንድ ካርቶኒዝ ንቕፀቁ ፋጥርንዙ ሰቭ ሰራሻጙ ተረነውድ ሚዝርድጘኲ።
ካርቶንዙ ዲዝጝዝጘስ ፈነውዝም አግልግለዝ ቢዘ አቐቁ ኤሌክትሪክዙ ቀቭረንጥዝመ ሊቨቁ አጭነ ማጭነ አርውሸነውዝ ኲየንጣንዝ አግልግለ ይወነው ቸለው ኻበሸ ፊየነ ማሽን ሰራሸነውዝ ጝ ክንድጝ ጝንድ ጭጝሰነው ቸለጘድ ልብስጘኲ።
በውግ ኪርመው ካርቶኒዝ አቕሽም ቆርቆሮዝጎ፣ ቆርቆሮይስ ቈሽ ላሜረዝመ ሲሚንቶዝጎ ሊጊሰነውዝ አውም ቸልየው ሰቭድ እፈርትነይዙ አቅምዝ ሰራሽኲ።
ክንሰተ ሙሐባውቱ ጋልፅኒዝጘድ ክንደተ መስፍን ችግርሸቁ ዊግናንዙ ችግሰድ እክሰናንስ ኻልየው ኻለይድ አክንወናንስ ክንድጝ ጝንዙ ክንሰጥድ ሙየዝመ በንዘቁ ጥወረንድ እቻይስጛጙ ተርጘጘም ዊግትጝኩⶔ።
“ሊቨሊቨቁ አጭነ፣ ቀቭረዝመ ባትሪ ቕርጘዝ አቓንስቅ ሰራሸውድ በንዘቁ ገበንድቅ ዋቕራንድ ይናው ጋብዝ ጥውሸው ከቨድ ፃቨነውዝ ክልል ተግዝ 1ትረ ፌደራል ተግዝ ቈሽ 3ትረ ተግድ ፃይ ዋጥረነው ቸልኩ” ይጝኩⶔ።
ክንደተ መስፍን መኮነንቱ አይር ዝቛለ ወረደይዙ ፅበተ አት መኮነን ተገኘ ጝተ ጋብዝ ጝተ ኹር ክንድጝዝ አርቕት ፃይ ሊግዛንስም አቑ ፋጥርንዙ ቸልትድ ሊጊሰናንስ ጥውሸው ቲክንክነዝመ ከቨዝ ፃቭጛጙ ተርጘጘድ ዊግትጝኩⶔ።
ነን ክልሊዝ የውም ፌደራል ተግዝ ነሰው ፈንዝም እምጥጘጘድ ጋልፅጝኩⶔ።
ተረዊዝም ጝተ ኹሪል ፊስጘው ፈንድ ጝተኹርቱ ፋጥርንዙ ሰቭድ ፈራዘናንስ ከቨው አቐነውድ ልብትጝ ጝተ ከቨድ ቃፅለው አቐነውድ ዊግትጝኲⶔ።
ክንድጝ ጝንዝመ ክንደጢል ሰራሸነው ኻግር ለምረተ ኹር ፍርዘነው አቐነውድ ይነ እጝቅም ልብትነ ጥውሸው ኻለይ የጝ።
1ትረ ተግ ክንድጝ ጝንጢል ሰራሸነው ቸልነውዜ ጝኻግርቱ ሊግዝትድ በነው፣ እቀኽቭሪዙ ችግሰንጢዝ አይር እክሰ ነሰነውዙ አቅም ፃየው ኹር የጝ ፋጥርሸውድ።
ወይትጘድም 2017 ዓ.ስ ጥቅለ 16 ንየ ክንደጥዝመ ክንሰጥዝ ሚኩርሸቁ እክሰዙ ሚሪየ ፃየቁ ፋጥርንዙ አይንተንዝመ ሰበን አልትጝኩⶔ።
ታኽሰስ 15/2018
ሳምራዊት ግርማይ
