ዊርተ ፃየው ክንድጝዝ ዚልቀተ ዲግ ተሚሰው አቐነውድ ጋልፅሽቱ።

ምኽር ጝንጥ ኽዝቪዙ ገረዱ፣ ኢኮኖሚውዝመ እፍርትዙ ሊግዝትዝመ  ቀሰው ጭሰጭሰንዙ ዋቕረንጥድ እንዝጘም ኽዝቨን እልት እልቱ ጝተ ሩሔድ ዳቐቁ ውሳኒየንጢል አትረው ድመ ችጝጛንስ ፃቨነውዝ ፅበፅብንድ ቺዘቺሰነውዝመ ዴሞክራሲው ሲትፍሽንድ ልጊሰቁ ጛይ።

እቀኽቭሪዙ እፍርትዙ ፕሮጀክተንዝመ ማዕቀፈንም ይውጘኲ። እደስየ ብላ ክልል ምኽርጝንድ 6^ትረ ጅልወ፣ 5^ትረ አምረ ሰቭዙ ዚምን፣11^ትረ ገሪየኑ ጉባኤድ ፃጝዝኲ።

ጉባኤልም ክንድጝ ቢሮዙ አኰ እርፍዙ ሰቭዙ ፋፅምፅመዝመ ላጥ ቺተቺተቁ ኦዲት ሰራሸነዙ ጝንዙ ኦዲትዝመ ላጥ ቺተቺተቁ ቕየንዝመ ኢመንጥድ ፃድቅጝኩⶔ።

ጉባኤይል ብዘነ ዊግሽን ፃቨቁድ ምኽር ጝንዙ ምቸ ጉባኤ ዊዝር ፋንቱ ተስፋየ ብላ ክልልዙ ምኽር ጝንድ ክልሊዙ ኽዝቭድ እፍርትዝ አርውሸተ ፃቨቁ እፍርተንዝመ ዲግድ ሩዘነውዙ ሰቭድ ሰራሻጙ ተረነውድ አርቒስጝኩⶔ።

ነንም ክልሊዙ ምጝግስትድ ኽየቁ እፍርትዙ ኻለየን ፃይ ሰቭታጙ አቐነውድ ሚሪጝ ምኽርጝንዙ አቫለንም ኽዝቭድ ነቃዘነውዝ እፍርተን እፍርዘናንስ ጝተ ችጘርድ ፈነው ጥውሸው አቐነውድ ኻስቭዝጝኩⶔ።

“ኻሊሸው ኻለይድ እሩድጠ ማጥንም ነንም ዲግዙ ጭጝንድ ቃፅለጘድ የጝ” የቁድ ምቸ ጉባኤሸን ኽዝቭድ ዲግ ጋብል አቓንስም ጭጝን አልስጝኩⶔ።

ጉባኤልም ክንድጝ ዚርፊዝ አኰ እርፍዝ ቲግቭርሸቁ ሰበንድ አልሰቁድ ክንድጝ ቢሮዙ ዲቈተ አት ጥላሁን ወርቅነህ ጝተ ጋብዝ ዊርተ ፃየው ክንድጝዙ ስረት ፃጝዘናንስ አጉረው ፅጋ አቐነውድ አርቒስጝኩⶔ።

እንዝ ምላሰንም 2018 ዓ.ስ ክንድጝዙ ዚምኒዝ 7 ሚሊዮን 445 ሽኽዝ 5ላዝ ንየ ክንደጥ ሚዝግቨናንስ ኻሊሽት 4.3 ክንደጥ ዊንም ቈሽ 58 ናን ላይስ ጭቑ ሚዝግቭሸነውድ ዊግትጝኩⶔ።

ብላ ክልልዙ ምኽር ጝንዙ አቫለንድም ክንድጝዝመ ላጥ ቺተቺተቁ ዋቕረንጥድ ጉይጝኩⶔ።

ወይ ኽምረ ብሔረ እቅ ጭሰጭሰን ደግምግመዝ ጣይትንዝ ቘይሸው አቐነዊዝ ብጭቕ ክንድ ጝንጥድቅ ዊስን ኲነነውዙ ሰቭ ተምዘቁ አቐነውድ ወይት ደርግቭጝ ችጝሸቁ አቫለንድ ኻስቭዝጝኩጙ።

ወይትል ችጝሸቁ ክንድጝ ጝንጥድ ጝተ ተግድ ኻይየቁ አቐነውድ ዊግተቁድ ምኽር ጝንዙ አቫል ዊዝር ፈትለ አየለስመ አት ፈንታሁን የኋላው ነኳን አሽ ደዘይል ክንደቁ ክንደጥ ፅብጘጘ እንዝጘም ክንደነ ክንሰነ ጥወርዙ እጅጝት ፅበነውድም አርቒስጝኩⶔ።

እኒስ ከስጘም ኻግር አቅቨ ፈተነ ፊሰቁ ክንደጥዝ ፈተነዙ ማዕኸል ጝተ ጅውነይል ምቸምችዘነው ጥውሸው አቐነውድ ዋቕርጝኩⶔ።

ክልሊል ምዝገቨድ ነንም ቃፅለነውድ ዊግተቁድ አት ጥላሁን አኰ እርፍ አቒዝ ክንድጝ ሚኒስቴርድ ኻትምዘቁ 11 ሚሊዮን 92 ሽኽዝ ንየ 2^ትረ ተግ ክንድጝ ጝንዙ መፃፍ እጝቂዝቅ ትንዝሽተነውድ አርቒስጝኩⶔ።

ወይኽምረ ብሔረ እቅ ጭሰጭሰንል 9^ትረ ክፍሊስ 10^ትረ ክፍሊል አሽ ምቸ ብዘነ ኽምጣጘ ቈንቈ መፃፈን ኻትምሻንስ አልተው ዋቕረይዝ ሲሪየ መፃፈንድ ቲርጉመነውዙ ሰቭድ ኪርምሸነውድ ክልሊዙ ክንድጝ ቢሮዙ ዲቈተድ ዊግትጝኩⶔ።

ኹረዙ አፅቨ ክንድጝዙ ዊርተዝመ ክንደጥ ዊትረናንስ ፃየው እኩሰድ ልብተነውዝም እቀኽቭርድ ሲትፍዝንዝመ ክልሊዙ በጀትዝ ፃጝሽታጙ አቐነውድ ጋልፅጝኩⶔ።

ነኳን አሽም እቀኽቭሪዙ ሲትፍሽኒዝ 255 ሽኽዝ ንየ ክንደጥ ኹረዙ አርውሸተ ፃቭሽተነውድ ሚሪሽኲ።

ክልሊዝ ኹረዙ አፅቨይዝ ገሪሸው 940 ሚሊዮንዝ ንየ በጀትድም ጣቅ ኰሪዝ ክንድጝ ጝንጢዝጎ ችጝዘናንስ ሰቭዝጎ ጥውሽተነውድ ጋልፅሽትኲ።

ፃውተዙ ችግሰድ ፅጋ ፋጥራጙም አቕሽ 11 አይር ክንድጝ ጝንጥ ኲነነው ቸልሻንድ 63 ክንድጝ ጝንጥ ቈሽ ዊስን ችበችብሰነውዙ ሰቭ ሰራሸነው ኪርምሸጘም ዲቈተድ ዊሰ ይውጝኩⶔ።

እኒስ ከስጘም ወይቱ 12^ትረ ክፍል ኻግር አቅቨ ፈተነ ፊሰቁ ክንደጥድ ፈተነዙ ማዕኸል ጝታ ጅውነይል ምቸምችዘነውዙ ሰቭድ ክንድጝ ሚኒስቴርዝ ማኽርዘቁ አቐነውድ ዊግትጝኩⶔ።

ክንድጝዙ ስረቲል ቺዝየው ሰቭ ሰራሸናንስም ክንድጚዝመ ዲግድ ሩዘነውዙ ሰቭል እጝቅ እቀኽቭርዝመ ሚሪሸው አካልድ ጝሲትፍሽንድ አትርዛንስም ጭጝን አልትኲ።

ሳምራዊት ግርማይ

የታኽሳስ 30/2018