ይና ኻግር ኢትዮጵየትል ዲቈቊ 2003 ዓ.ስ ኪርም 13 ወረድጥዝ ልክንዙ አግልግለ ይወነውዝ ኪርምኵ፡፡ አነጚ ኢትዮጵየቱ ትኽነ ፖሊሲዝ 1986ስ ኪርም 80 ናን አጠ ቸለው ገጠሪል ጽበው የውም ዊቱ ኢኮኖሚዙ ጥወር ጻየቊ ዊግናንድ ከቨናንስ ቲግቭርሽጠ ጡሸኩ ይሽት ፈው የጝ፡፡ እን አግልግለድም ሊግዘቊ ኻግራኒልም ሠራሽተው ቀሰው ሰራሽን የጝ፡፡
ቺተዝ ኢኮኖሚዝ ሳስ የቊ ኻግራንል ጽበቊ ዜገን ጊንዝቭ እጅጝትዝ ምላሰን ጽዊትጝ አረትል ጭቊ ቕጅውሸቊ ብጭቕ ጛይ፡፡ ዲቊ ያንድ ጊንዝቭዙ እጅጝትዝ ዓምር በርጡ የነውዝ ቕጅወድ ቸልጝ ሳብጥጘኵ፤ ጭ ግሪ ግነ ቀለው ጽውዘድ ኽያጙ ኽየው ችግሰል ማለኵ፡፡
ወረው ገቨድ ኻክምሽን ቓደነው ቸልሸው ጽውዘድ ጊንዝቭዙ እጅጝትዝ ክርጘል ችጘቊድ ዊትቊ አየቊም፡፡ እንገቨድ ችብሰናንስ ፖሊሲዝ ጭቊ ዊነው ትኽነ መድህንድ ጣቀት እምተኒዝ ሰቭል ጥዋንስ ጻቭሽትኵ፡፡ ጽውዘ አጋልዝ ፋጥርሸው እጅር ኹርዙ ሲጘይስ ቺታው አቕንት የጝ፡፡ ጽዊጢቀርም ይሽት ኵርሸውድ ፤ ጽዊጡን ይጝ ሊቨቊ እቂዝ ተረው አዝምረይዝ የጝ፡፡ ጽዊትጝ ሊቨቊ ግርየዙ ሰቭተጥድ ችበችበስጘው ጝኒል ጐይር የጝ፡፡ ጽዊትጛንድ አጕረው እጅርዙ ኻይል በክነኵ፤ ኻግርዙ ጻጀ በክነኵ፤ ጊቭርትነይ ሳስ የኵ፡፡ እኔን አቐነውድ ቈሽ ዳኽነዝ ጽብነኵን የቊዙ ሩሔድ ዳቐኵ፡፡ እንዝ ማጥን የጝ ዳኽነ አቕን ጽበናንስም ዳኽነ አቕየቊድ ከቨነው በንዘውድ፡፡
ትኽነ መድህንዙ አቫል አቐነው ላውንትዝ ቓደነውዙ አገነ አቐነውድ ልብተነው ጡሸኵ ይነውድም እንዝ የጝ፡፡ ገጠሪል ጽበቊ ፣ ሳስ የው ኢኮኖሚዙ ጥወር ጻየቊ ዊግናን ትኽነ መድህንዙ አቫል አቕጛንስ ክንደው እጅርዙ ኻይልድ ልብሰነው ላብጠቱ አርወድ ደድሰነው አቐነውድ ልብትን ፋጥረነው ጡሸኵ፡፡ ይናኻግርትጘ አቫል አቐናንስ ኻይሽተው ቊርሽድ ኪፍለነ በቊ እቂዝ ቈሽ ጻጀ ጕርይጥ፤ ቀሰው እዘን ጻየቊ ዊግናንድ ከቭጛን ላብጠ ቓደነውድ ደድስጘኵ፡፡
ትኽነ መድህንዝ አቫል አቒንቀ ዳቐነውዝ አጋልዝ ፋጥርሸው ብጭቕ ጊንዝቭ ዋቕረው ጽውዘይስ እንጎይስ ኻይሽተነው ተሚሰኵ፡፡ እግረ ጝታጽበነ ጝንድ፣ እንሰስድ ቅይን ኻክምሸነዊስ የውም እርድይጥን ይሽት ጋብራ ናን ኻየነዊስ አቫል አቕን አሩሸነው ጡሸኵ፡፡ ነንቱ ሰቲዝ ጥቅለ ገጠሪል ትኽነ መድህንዙ አቫል ጻቨናንስ ጻጝሽተው ዝምረድ አሩሸነውዝ እንቅም እቅ አቫል አጥጘ ጡሸኵ፡፡ አቫልነይድ አትራንድ ጥላዙ እጅጝትድ እኪተኵ፡፡
ጥላዙ አልስንዝመ አግልግለ ይወይውንድ አቫላንድ ጠራዘው አጠ ማጥን ቈሽ መንግሥት አውንቲስቅም ንየ ጥውሸው ሰቭ ሠራሽጠ ጡሸኵ፡፡ ኽዝቭድ ጕየው አግልግለ ይወይውንዙ ገልታሽን እኵ፤ ጥላ ነያቊም የቊ ኻሰቫኒዝ እክሰ ይወነውዝ ሠራሸነው ነንም ሊግዘው ጕግ ተሚሰኵ፡፡
ነንቱ ጊዝዝ ምጝግሥት እንዝሚቅ ይዋጙ ዊንየው ምጝግሥት ሰቭተጢዙ ትኽነ መድህን ኪርምስጠም ሠራሻጙ ችጝሸኵ፡፡ እንአገነድ ዚርፊዝ እትለው ጊንዝቭ አኽቨነውዙ እግሰድ እክሰኵ፤ ጊንዝቭ ችጝሸውዜ ቈሽ ኽይጠዝ ኽዝቪዙ ዋቕረድ እክስጠ ቸለው አግልግለ ይወይውን ፈጣሸኵ፡፡ ጥላዙ አልስንዙ ችግሰድ እኪረኵ ይሽት አምንሸኩ፡፡
እኔን ፈኑ አጠጘድ ኽዝቭድም አቫል አቐናንስ ጕትጕትሸነው ተሚሳውም፤ እጀቊድም ኒወንድንዝ ዳቐነዊስ ጽዊትን ጨወነዊስ ትኽኑ አቕን እዱርነ፣ ዊንም ከቭሽትን አቫል አቐነው ተሚሳንትጘ ልብተነው ጡሸኵ፡፡ ምጝግሥትም ትኽኑ፣ ጊቭርዘተ ኽዝቭ ፋጥርሻንስ አግልግለ ይወይውንድ፣ ጥላ አልስንድ ሚቸው ጻቭጠ ጡሸኵ፡፡ እኔን አቐውዜ ጽዊተቊዝ ጨወው ገረደ ፋጥርሻውም፤ ላብጠ ኵርን ቓደናንስ ሚቸው አቕንት ፋጥርሸኵ፡፡
ግርማ ተጫነ
ታኽሳስ 30/2018
