ፍጥሩ ኻይን ሰቭድ ሰራሸነው ይና እንቅቱ ቲግቭር አጠ ጥውሸኩ

ፍጥርዙ ፃጀ ኻይን ሰቭ የነት ብጥዙ፣ አቑዙዝመ ደንዙ እኒዝጘም ንቕፀ ሩሔዙ፣ ድርዙ አራዊትዝመ ላጥ ፍጥርዙ ፃጀ ምፅነይስ ንዬ አርውሸነዊስ፣ ጨቅሸነውዝመ ድዘነዊስ ኻየናንስ ፃቭሽተው ሰቭ የጝ፡፡ እኒን ሰቭድ እጅር ኹርዙ ፅብንዝ፣ ኹረዙ ወይትነይዝመ አየርዙ ንቭርት ሚዛንዝ እኒዝጘም ዚልቅነይ ፅየው እፍርትዝ ተሚሰተ የጝ፡፡

ኢትዮጵየ ፍጥሩ ፃጀዝ እቀጘዝ ትውፅውፅረይ ኻግር አርሽም፣ ብጥዙ ሺርሺርሸነ፣ ደንዙ ጪፍጭፍሽንዝመ ምፅነይስ ንዬ ጋፅንዝ አቐው ዝቨ አርውሸነው፣ አየርዙ ንቭርት ልውጠዝመ ኽዝቭዙ እግዘድ ቈሸነውዝ ምላሰን ፍጥሩ ፃጀድ ቅልጥፈዝ ሚንምናጙ ተርኩ፡፡

ቃውስ ያንድ ኢትዮጵየቱ ደንዙ ሺፍነድ 40% ዊነው አቓንድ ነን ግነ 18% ጅውነይዝጎ ዋጥርኩ፡፡ አምረ ጨቨቅ ሚሊዮን ሔክታርዝ እጊተው ዝቨ ብጥዙ ሺርሽርሽንዝ አጋልሽተኩ፡፡  እን ዝቨዙ ሺርሽርሽንድ ችብሰናንስ ምንግስት፣ አቀ ህቭረንዝመ ዓልም አቅቨ ተግዝ ሰራሸቊ ከቨጥ አካላንድ አልቋዙ አሻረ (Green Legacy) ዓምረ ጨቨቅ ቢልዮንዝ እጊተው ችግኘን ቲክለነውዝ ደንዙ ሺፍነድ ሊግሰናንስ አውግረው ፍልውልወ ፃቨነው፤ቅብረጥዙ እፍርት (Watershed Management) ቺተዝም ብላ ክልል ሰራሽተቊ ክትረንድም አቑጝ ዘፍ ቲክለነውዙ ሰቭድ ቀሰው የጝ ይሽት ፊስሽተው ቲግቭር የጝ፡፡

ፍጥሩ ኻይን ሰቭድየት አምረይስ አምረይዝጎ ኻይስን ፃጝሰናንስ ቺተቺተቊ እቀ ህቭረንዝቊ ክፍለንድም አቑ ምንግስት ቺተው ትኩርት ይው ሰራሻጙ አቕሽም ጝግዝ ልክ ትኩርት ይውን ሰራሸነውዝ ጅውነዴት ላውጠናንስ ፃቭሽተው ልቕረይል አቑ ቅብሰቊ እቅዙ ንቕፀድ አውግረው የጝ ይን ፊሰነው ቸልሸኩ፡፡ ንየስ ይን ጋልፅነዊዝጘድ ኢትዮጵየቱ አልቋዙ ፖሊሲድ እርውዘናንስ ከቨቊ ክልለኒስ ላውድ ብላ ክልል ዊንሽም ዲቈቊ ሻቖዝመ ሲዘ እምተኒስ እንጎ ግነ ፍጥሩ ኻይን ሰቭዴት አክንወናንስ ጣይትን ፅይ ዊነው ጅውነ አቐነዊዝ ምላሰን ተሚሰው ጝ እኩሰድ ፃቭኩ የነው ቸልሻውም፡፡

ወይ ኽምረ ብሔረ እቅ ጭሰጭሰንድ ዲግዝ ጅልውዘ አንፃሩ ቺዝን ፅየው ጅውነ አቕሽም ፍጥሩ ኻይን ሰቭድ ኪርምሰነውዝ ቀሰው የጝ ይን ፊሰነው ቸልሸኩ፡፡ አቕሽም ግነ ኪርምኒዝጘድ ማጥማጥደው ጅውነድ አልቋዙዝ ሲሰነው ጋቢዝም አቑ ጅውነዴት ቺተው አቐንትዝ ግነ እፍሰው ሰቭ ሰራሽትኩ ይን ፊሰነው ቸልሻውም፡፡ እቀ ህቭርድ ነንም አቕሽ ቅየንዝመ ላጥ ገበንዝ አቐው ደዘ ተምዛንድ ጝ እንግርነይዝጎ ፊረነውዝ ዘፍድ ቀቭን ነሰነውዙ ዲዝጝትድ ኮሪስ ኮሪዝጎ ቈሻጙ ተርኩ፡፡ አቐነዊዝም አርቕት ፋጥረነዊስ ከስጘ ኽግ ኪብርዘናንስ ጅውነይዙ ኽገ ደንብ ፋጥረነውዝ ጅውነይዙ ዳኽንነይድ ኻይሰነው ጥውሸኩ፡፡

ፍጥሩ ኻይን ሰቭድ ሊምደነው ብጥዙ እፍርትነይድ ቈሸነዊስ ከስጘ ጊቭርትዝመ ጊቭርትነይድ ቈሸው፤ አቑዙ ምፅነድ ቈሸው፣ ኽርድ ቓፅቨው አቐነዊዝ አርወድ ይናው የጝ ይን ሰራሸነው አውማው እቀ ህቭሪስቅ ኻይሽተው ቲግቭር አጠ ጥውሸኩ፡፡

ወንድሙ ቸኮለ

ጥር 15/2018