አምረዝ ላጝጠ ሚሊዮን ካንሰርዙ አይንተ ማኽተነው ቸልሸው አቐነውድ ጋልፅሽቱ።

ኪርመነዙ አልም አቅቨ ትንተነይዝ ሲሪየ አምረ ጨቨቅ ላጝጠ ሚሊዮን ዜገን ካንሰርድ ማኽተነው ቸልሸኲ።

አልምቱ ትኽነ ድርጅትዙ (WHO) ሳይንቲስተን ፊስጘው ሪፖርትድ 37% አቐቁ ካንሰርዙ አይንተን ፋጥርሽጘውድ  ኢንፌክሽንዝ፣ ፅበፅብን ዘይቤዙ ምርጸንዝመ ጅውነዙ ጨቅሽንዝ ምላሰን አቐነውድ ሚሪየኲ።

ሳይንቲስተንዙ ጝተ ሪፖርትድ ሚሊዮንዝ እጊተቁ እቅዙ ሩሔድ ላውጠናንስ “ኻይሉ አጋል” ፅበጘድ ቓሊሰኩ ይጝኩⶔ።

ላው ላው ካንሰርዙ አይንተን ላውጥሻቁ ጛይ፣ ዊንም ቈሽ ይና እድሚድ ፊረው ጨቨቅ ይና ዲኤንኤይል ፋጥርሸው ቘጨዝ ምላሰን እንዝጘም ፅውዘይዝ አጉረውዝ አጋልሽተጥ ፃቨቁ ጂነንድ ፅብጘንድ የጝ ይጘኲ።

አቕሽም ማርምርሸተ ዶ/ር ኢዛቤል ሶርጆማታራም “ፅቃ ካንሰርዙ አይነተን ማኽሊስ ሲዘድ አጉረው ዜገንዙ እግዘ ፃየው አቐነዊዝ ማኽተነው ቸልሸው አቐነውድ ወሽጘንድ አንክርሽጘኩ” ይጘኲ።

አልምቱ ትኽነ ድርጅትዙ አካል አቐው አልም አቅቨ ካንሰርዙ ምርምረ ኤጀንሲ ካንሰርዙ አጋልሽተትነይድ ቈሸቁ 30 ማኽተነ ቸለቁ ገባንድ ቲንትንኩ።

ኤጀንሲዙ ሪፖርትድ እኒስ ቈሸ ፃይጨ ካንሰር ነስጥጘ ቸለቁ ኢንፌክሽነን ፅንኸ ፃቭኩ። እንዛጊስም HPV ዝመ ሽቕዙ ካንሰር ቲክንዘቁ ሄፓታይተስዙ ቫይረሰንድ ችጝሽጘኲ።

ጓነድ ስታቲስቲክስዙ ትንተነድ ፃጝዘናንስ 2022 ካንሰርዙ ኻለየንዝመ ፅቃ እምትዝ በውግ 185 ኻግረን አቒል ፅበቁ  30 ኻደገዙ ምላሰንጥ ችጝሽጘጘ ሚዝረንጥድ ሚሪጝኩⶔ።

አልምቱ ጅሉዘ 18 ሚሊዮንዝ ንየ አቐቁ ካንሰርዝ ፅዊተቊዝ ሻቘ አጉረው ምላሰንጥ እኩⶔ።

ትምባኾ ጥይሰነው 3.3 ሚሊዮን ካንሰርዙ ፅውዘንጥ ቲክንዝኲ።

2.3 ሚሊዮን ካንሰርዙ ፅውዘንጥ ቈሽ ፅዊተቁድ  ኢንፌክሽነን ጛይ።አልኮልዙ ዝይን ዝየነውዝ 700,000 አልተቁ ካንሰርዙ ፅዉዘንጥ ቲክንዝጝኩⶔ።

“እን ካንሰርዙ ፅንኸድ አልም አቅቨ ተግዝ ማኽተነ ቸልሸው ካንሰርዙ ግምገመ አቓንድ ኪርመነ ጊዝዝ ባኽሪ፣ ጅውነይዝመ ሰቭዙ ኻድገኒጅቅ ፃየፃይሽት ዲቈዲቁሽተቁ ካንሰርዙ ምላሰንጥ አቕጘጘIARC ካንሰርዙ ቲክንክነ ክፍልዙ ቲክነተ ዲቈተ ሶርጆማታራም ዊግትጝኩⶔ።

ካንሰርዙ ፅውዘድ ማኽተናንስ ፃቭሽተው ፅንኸይዝም  HPV ክትባት 90% አቐው ማኽጸን ካንሰርዙ ኻለየንድ ችብሰኲ።

ሳምራዊት ግርማይ

ጥር 30/2018