ጉጉ ፊሠኩ ጉጉ ነሠኩ፣ ጉጉ ጻጂሠኩ ጉጉ ብሽታንድም ድኽትል ማለኩ። አልምትል ኢኮኖሚዙ ፍልውልወድ ጉጉዝ አቐነውድም እኒስ ላው ቃሊሰነ የጝ።
አልምቱ ኻግራኒዙ ኢኮኖሚድ ሻቘ ትራንስፖርትዝቊ መለንድ አሩሸነውዝ የጝ ፍልውልውጘውድ፤የነትም አየርዙ ትራንስፖርት፣ባኽርዙ ትራንስፖርትዝመ ዝቨዙ ትራንስፖርት ይሽተው አቓንድ አየርዙ ትራንስፖርትድ ጝወየድ ኪብረው አቓንስቅ አግልግለ ይወውድም ዊትቊ እቅዝ የጝ ።
ባኽርዙ ትራንስፖርትድ ቃልናንድ ዘትለውዝመ ንቕጸቊ ጎዘመዘን ጒዝሰናንስ ከቭሰው አቕሽም ጐዝድ ስፍረይስ ስፍረይዝጐ ፍልውልውዘናንስ ሊግዘው ጊዝ ፊሠውዝመ ባኽርዙ ሚረ በንዘው አቐነውድ ቲክን አውማው እቀ ኽቭርድቅ ቀለውዝ አሩሽጠ ቸለው አየውም። የቭስዝ ዊንም ዝቨዝ ጻቭሽተው ትራንስፖርትዙ አይንትድ ግነ አልምትል ጽበቊ እቀ ኽቭረንድ ቀለውዝ ችጝጥጘ ቸልጘው አቓንስቅ እቅ ስፍረይስ ስፍረይዝጐ ፍልውልውጛንስም አነ ላየ ኻግርሸንቱ ጻጀድ ላዊሥ ላየይዝጐ ፍልውልውዘናንስ እቀ ኽቭርድ አሩሸተ ጻቨናንስ ጻየው ችጘርድ ቀለው አየውም።
ኻግረን ነንቱ ሰቲዝ መኪነዝ ጻቭሽተው ጒዥትኒስ ፍጝ ሣልጠቊ ባቡረን ጊቭርዝጝ አሩሸነዊል ችጝሽጘኩ። እኔንም አቐነዊዝ መኪነዝ ጻቭሽተው ጒዥትንድ እግርገ ዳቐው ጒዥትን የጝ ይጝ ጭጘነዊል አሽ ችጝጝኩጙ።
ይነ ኻግር ኢትዮጵየትል ቓልሽታንድ ግነ መኪነ ጥዋየቊ ስፍል ጽበነዊስም ከስጘ መኪነ እኩ ይሽተቊ ስፍልድም አቕሽ እፍሰው ጒደነ እጀው አቐነዊጅቅ ጻየ ጻይሽት መኪነዝ ጒዥተናንስ ችግሰ ፋጥርሻንድ ቓልሽተኩ።
ነን ጽብነው 21 ትረ አድለ ዚምኒዝ አምቡላንሥ ብሽትንዝ ምላሠን ክረቊ ኩየንጣኒዙ እግዘድ ጝን እግዝነ። ደርሰው ጽውዘዝ ጽዊትጝ ኽክምነል ችጚጝቀ ክረቊድም አጝሽ ቀለውዝ ቓልሽተቊ አየቊም። እን ችግሰድ ፍራትዝ አጋልዘው ጅውንጢስ ወይቱ ጁውነድ ላዉድ የጝ ። ይንም ንጭቱ ይና ጽፈሽዝ ወይትል ጽበው ትራንስፖርትዙ አግልግለድ አንቭቭስነ ቀኑን።
እጅር ጎዘ መዘጅቅ ጻንሸኩ ብሽታንድም ሊግዘው ጉጉ ልኩዝ ጸጝጠጘ ጻቭሽተኩ።ወይትል ጽበው ትራንስፖርትዙ ችግሰድ እቀጘዝ ኻዝንሰው አቐጘ ኪርመነይዝ ዊግስነው መርጌታ ዲቨኩሉ በለጠ ወልደ ማርያም ሰቊጠ ጅሉዘ ወረደ ስሬል ቀበሊዙ ጽበተ ጛይ።” ወይቱ ጒደነድ ጋልጸቅ የናን ቺዘኩ ምላሠንድም ዊትርቅ አኸቨ ችጝነው ጨቨቅ ዋቕርናጙ ዊሠ ችጝየው አቓንስቅ ሰቁጠስ ኪርም ሲሪየል ፊረናንስ ላው እጅሪዝ ፈው ታሪፍድ 90 ቊርሽ የጝ ኪፍልነውድ ግነ 200 ቊርሽ የጝ።ቊርሻንድ ኪፍለነው ቸሊረውዝነ ፊረነውም ዋጥረነውም ቸላርም”
እኒዙ አይነተ ጥቕዘድ ድኽቲስ ንየ ሸወጪስ ሊጙኒስ ንየ አውቶቢስ ገሪሻው አቓንስቅ ቲዮተ መኪነዝ ንየይል ክቢጝ ጒዥትጛንድ ጥቒርቒርጝ እፈር መልቊዝመ ኩየንጣን ቈይሽጛጙ ችጝሽጘኩ።
”ጝታላየ ምርጸ የነትም ባጃጅዝም አቕሽ ፊረናንሥ ጒደነድ እቀጘዝ ጨቅሸው አቐነዊዝ ፊረነው ቸላቊም”ይጛንድ ዋርዝጝኩጙ። ላየ ዊግስነው ሳቊጠ ጅሉዘ ወረደ 020 ቀቨሊዙ ጽበተ ቀስ መለሰ አወጣም ወይቱ ጽብንድ ቃዉኒስም ሚቸ ሚችየው አቐነዊዝ ቃወጥ ጋብዝ ጅሉን ቓላይነው አቐነዊዝ እቐጘዝ ችግሰዝ አጋልሽትጝ ችጝሽጘጘን ጋልጽጘኩ።
”ጒደነ ኪርምሽ ዊኑ ኪርምሸውድም ሹሹድንዝ ምላሰን ቀቭሽተው አቓንድ ነን ጽበውድ ቈሽ ሰቭድ ኪርምሽሽም ውርም አይንት አርወ ችጘነው ቸሊነቅም ልኩዝ ጻጘነው እጉር ዳቐው ነን ኪርምሽኩ።ኽዝቭድ ምኽር ጝኒል ደግምግመዝ ዋቕረድ ጉይሽም ምጝግስት ጋብዝ ውርም እክሰ ችጘነው ቸልሽየውም። ትራንስፖርት ቃወነይስ ኪርም ንየቱ ምጝግስቲል አሽ ጝችጘር ጝችጘርድ ፊስ እቀ ኽቭሪዙ ችግሰድ እክሳን ቀሰው የጝ”
መኪነ ብሽተነው ጭቑ አይጝቀስ መኪነ ችጝሹ ይሽታንድም መኪነይዝ ኪፍልነ ዋቕርሽነውድ እቑርሸው ታሪፊስ ንየ አቓንስቅ ንቕጸው እቀ ኽቭርድቅ ልኩዝ ገልታሻጙ የጝ ጽበውድ። እኔን አቐነዊዝም እጉር ዳቐው ልኩዝ ጻጝሽታጙ እኹረጥም አጝነ ደርሰው ጽውዘዝ ጽዊተቊ አቅም እጀቊ እቅድ ኽክምነል ችጚጝቀ ክርጛጙ ችጝሽጘንትጘ ጋልጽጘኩ።
”ነንቱ ሰቲዝ ድርል ጎየው ማጥለተ ዊንም ሽፍተ ፊሥየው ጊንዝቭድ ይና ዊግኒዘ ማጥልሽናጙ የጝ፤ ዲልልጥዝመ ሸመጥድ እን ቲግቭሪስ ተንሽጝጥጘ ማጥን ምጝግስት ቲክንክን ተግረ ፊሥጠ ጡውሸኩ። ጻጀ ጒይጥድም አጝሽ ጝታ ጡውሸው ጊንዝቭድ ፊሥጝ ጝታ ዊግኒዝ ጥውሸው አግልግለድ ይውጥጘ ጥውሸኩ።
አዘውድ ጻጀ ጉሬድ ጭቑ አቒጝቀ ወያለ የጝ ፊርናንድ 200 ዋጥርናንድም 200 ኪፍልን አወይን ዚልቅነ ቸልነኩን?ጭሰጭሰውድ ጡውሸውዝ ቃዋው አቐውዜ ሺኽስ ይጝሽ አውል ፊረነው ቸልነኩን! ኻለይ ጽየውድ ግድዝ ፊረኩ ጽዊተው እጅር ሪፈር ይሽት ፊረናንስ መኪነ በነውዝ ምላሠን ክርጠጘ አኩ ይነ ችግሰድ ምኽር ጝኒልም ጉይን ኩኑን ችጝነው እክሠ አጀውም”
ወይ ኽምረ ብሔረ እቅ ጭሰጭሰን ትራንስፖርት ጭጝሸነ ጽ/ጝንዙ ዲቈተ አት ዘውዱ የኋላው ብሔረ እቅ ጭሰጭሰኒል ጉጉዙ ችግሰዝመ መኪነዙ እጅጝት ጽበነውድ ኻዲሻው አቕሽም ጽበቊ መኪንጥድ ቃወ ግቭር አስልሽ ታሪፍዝ ሰራሽታጙ አቐጘ ጋልጸቊ አጛንድ ችግሰድ አጋልዝጠ ቸለውድ መናኸሪየይስ ቢዘ አቓንስቅ እቀ ኽቭርድ ጉጉዝቊ ሙየ ጒይጥድም አነ ትራፊክዝ ጥቈመ ይወነውዝ ማኽርጠ ጡውሸኩ ይጛንድ ጉይጘኩ።
”ትራንስፖርትዝ ቃውሸው ትራንስፖርትዙ ቃወነ እኩ።እንም አርፈ ቃወ ግቭር ጻድቀት ግረ ጽበው ሽክርክርሸተድ አውል ፊረነው ጡውሻንትጘ ቃውሻንስ የጝ ፍልውልውነውድ አዊንም ፍልውልወድ ጝወንቱ ታሪፍ ጽየው የጝ።እን እቑርሸው ታሪፊስ ንየ ኪፍልሰው ጽበነውድም ወሽነኩን፤መነኻሪየይል ኪቢየቊድ እቑርሸው ታሪፍዝ ጻጝጘኩ ቀቭሽተው ቲኬትድ ጥቅምት አርፈይስ ኪርም ዲጂታልዝ ጻቭናንስቅ ችግሰ ፋጥራውም።ታሪፊስ ቢዘ ኪፍልጛጙ ጽበቊድ አውታይ ጛይ? የውድ ቓልናንድ ግነ መናኸሪየይስ ቢዘ ቓሚል ኻይጝ መኪነይል ድቓረቊ ጽብጛንስቅ ሸመጢዝመ ደላልጢስ ጝታት ሸጘድቅ ኪፍልስጘኩ።እኔንት ዳዘናንስም መናኸሪየይል ጥውን አግልግለድ ችጘነው በንዘኩ”ይጝኩጙ።
እንዝ በውግ መናኸሪየይስ ቢዘ ወየ ቈሸቊ እቅ ጽበነውድ ሚዝረ ችጝጝ ሊጘ እርፊል አሽ ሰቭ ሰራሻይጘጘ ጻቨነውዝ ቀጻቐነው ቸልጘጘ አት ዘዉዱ ጉየነውዝ ነንም አቕሸ እቀ ኽቭሪዝ ጡውሸው አግልግለድቅ ይዋቊ ሺክርክርዘጥ ጽብጝሽ ተግረ ፊስነቅ አናንስቅ እቀ ኽቭርድ ታሪፊስ ንየ ዋቕርሻንድ ፊሥን ይወነው አቒጝቀት ኪፍለቅም የነውዝ ኽግዙ ዊንም ምጝግስትቊ ሚሪሸቊ አካለኒዝ አልስጠ ጥውሸኩ ይጘኩ።
”ጒደነይል ድቃረቊድ ሚሪሸውዝ ለወትረ ጒደነይል ጽበቊ ይነ እግዝግዘጥ ትራፊክ ፖሊሰን እቀ ኽቭሪዝ ሚዝረ ይውጝጥጘድ ቲኩርዝን ሰራሽናጙ የጝ ጽብነውድ እኒስ ሚቅ ደሴ፣ ወልደያስመ አለማጣ ፊረቊ ጻጘጥድ ወለህት ዲቊጘት እግርገ ኪፍልስጛጙ አቐጘ ሚዝረ ችጝን እቀ ኽቭርድም ጥቈመ ነዩዝ አኰ አጥጘ ስልክ አልሰጥ እቀ ኽቭሪዝ አራሠውዝ እስለው ስፍረይል ላጥፍን ሚዝረ ነይጙዝ 5 ሸመጥ ሊጘ እርፊል አሽ ጝታ መኪንጥድ ፍልዉልውዛይጘጘ ጻቭን ሩዘነው ቸልንኩኑን”
ጅውነድ ጉጉዝውም አነ መኪነዙ ችግሰ ጽበነውድ አርቕሽተው የጝ።እን አገነድ አሩሸነውዝ ዊግነል ጥቕዘ ፋጥረነው ቈሽ እጅርነይስ ፈው ቲግቭር የጝ አቓንስቅም እቑርሸው ታሪፍድ ኪፍልሰነውዝ ዊግኒዙ ክቭርድም ኻየነው ዚርፊስ ውላቐቊ ዊግኒዙ ግድን አቐነውድ ልብተነው ጡውሸኩ ይነ ጽፈሺዙ እጻ ጻቭኑን!
አመልማል ተድላ
የካቲት 15/2018
