አርቨኘ አው የጝ? አርቨኝነይስ ወረጘ የጝ?

ኢትዮጵየ ዓልምትል ኽየው እድም
እጊሰቊ ኻግርኒስ ላይሽን ጚ፡፡ ነን ዓልምትል
ፅበቊ ኺጠ ኻግራንድቅ ኻግርዝጘድ
ችብሪጝቀት ኢትየጵየ ስረት ሰራሽር፣
ምጝግስት ፅርድር፣ ኽግ ፊስር ቃውሸነውል
ዊንደይ ኽፅሙወ ኻግርም ጚ፡፡
ጥቅለዝ ኢትዮጵየ ጝጭል አፍሪከቊድ
በርነይዙ እፅወነ አቕ ዊነው ቅኝ ቅምንድ
ሽሹደነውዝ ለምጣቅ ይረይ ቺትረይ ኻግርም
ጚ፡፡ ጝር ባንዲረድ ሊሚስናንስ፤ ጝር አውር
ቺንነይድ ኻይሰናንስ ዚምን ጨቨቅ ንቕፀቊ
ዊግን ሩሔዙ መስዋትነይ ኪፍልጘይ ኻግርም
ጚ፡፡ ሰሜኒስ ደቡቢል አሽ፤ ምስራቂስ
ምዕራቪል አሽ ኮር ጨቨቅ ፃለትዙ ኻይል
ድሰናንስ ልክ እኩ፡፡ ዘይላቲስ በርበረ
አጢስ፣ ኦጋዴንቲስ ተምቤን አሽ፣ ምፅዋቲስ
ኪርም አድዋ አጢስ፤ ጐንደርቲስ ሐረር
አጢስ ፃለት ኢትዮጵየት ግርቨብዝጭር የው
ጡ ሊቭ እዳቕየውዝመ ጅግን አርቨኝጥድም
ጝታ ኻግርስ ይጛንድ ሊቪጘው ስፍረ
እጀውም፡፡ አቭን ለምሪነውዝመ ኪብርዘነው
ኢትዮጵይቁዙ ቺተው ባኽሪ አቐዊዝ
ቑጠድቅ፤ ጝታ ናፅነይድ ጊፈው ኻግርሸንቱ
ክብርድ ዳቐው ኻይል ፋጥርሻንድ ቈሽ
እድ ቀንጘዊዝጘድቅ ጎቛቊ ዊነቊ እቅድ
ለለይዝጘድ እምዝ ፊስጝ፤ ለውንት ፋጥርጝ
ፃለት ድሊሰነውዙ ሲጘድ ማይጨውስመ
አድወቱ ጣይትኒዝ ችጝሸው ድሊስንድ
ሚዝርደው እማን የጝ፡፡
አርቕሽተው ኢትየጵየቱ ሲጘዙ
ምኹርድ ፕሮፌር ባሕሩ ዘውዴ
“የኢትዮጵያ ታረክ ከ1847 እስከ 1983” የው
አውርዝ ኻትምስጘው መፃፊል ጋልፅጘጘድ
“ኺጠኻግርሸንቱ አድለድ/ ክፍልድ/
አበይሽተነውዝ አርቕሽተቊ ትርጥዝ
እቻቐው የጝ፡፡ 4 ሽኽዝ 6 ላዝ 20 ሜትር
ሊግዘው ራስ ዳሸንቱዝመ ባሌትቊ፣ አርሲ፣
ሲዳማ፣ ሐረርትቊ ዲቈቊ ስፍልድ ቈሽ
ንቕፀቊ ትርጥ ኻግርሸንትል ችጝሽጘኩ::
እንዳይ ትርጥድም አርቨኝጥ ሽሹድጘው
ኮሪዝ ኽየው እኩሰ ፃበቊ አቐነውድ የጝ
ጋልፅጘውድ፡፡
ይና ኻርቱ ሰሜኑ አድለድ ወይ ኽምረት
ቈሽ የነት የጝ ንቕፀቊ ትርጥዝ ኻፅርሸው
የጝ፡፡ እን ትርጥድ እድወ ወይቱ ጁነይል
ፋጥርሸቊ ሽሹደጢዝ ውርቑጠ ከቨ ፃቭጙ?
ወይትቊ አርቨኝጥድስ ኻግር ሊሚሰናንስ?
ፃቭሽተው ሽሹደኒዝ ውርቑጠ እኩሰ ፃቭጙ?
የውድ ንጭቱ ይና ዲብየይዝ አንቭቭስነው
በንኑን ቀሰው ዊንትም ቲሚንድኑን፡፡
ወይቱ ጁነድ በውግም ዛጉየቱ
ስርወ ምጝግስትድ ቃፅልሰቊ ንጉሳኒዝ፤
እግርገም ወይሽማኒዝመ አርቨኝጥዝ ነን
ቈሽ ቺተቺተው መርግል ችጝሸቁ ዊተድርቁ
መኮንናንዝ ኻግር ኻይሰናንስ ፃቭሽተው
አውማው ሽሹድኒዝቅ በውቃውስዝ
ዳቕሽተቁ ጛይ፡፡ እኔንትም ጐነ ፃቨነውዝ
ወይ ኽምረ ብሔረ እቅ ጭሰጭሰን ደሃና
ወረደይዝጐ ዲውልን ወይትቁ አርቨኝጢዙ
ሲጘድ ውር ተከጘድ ዊንተ ፃቭነውድ አት
ሙሉ ዘነበ ይሽተቊ ድሃነ ወረደ አምደወርቅ
ኻትመ ፅበተጅቅ የጝ፡፡
ኢትዮጵየ ቺተቺተቊ ኮረኒዝ ኻግር
አቒስም አነ ኻግር ቢዘይስ ጐቁ ኻይለንዝ
ጝር አውር ቺንነይድ ፊትንሽረይ ኻግር
አቐነውድ የጝ ጋልፅጘውድ:: ቺተዝም ቈሽ
ጣልያን ደግምግመዝ ዊረናንስ ፃቭረው