ዲግዝመ ኢኮኖሚዙ ፅጉትድ እክሰ ተምዘኩ

እን ኮሪዙ ዓልምቱ ሰቭተጥዙ ግሬ (ሜይ ደይ) ዓልም አቅቨ ተግዝ ኪብርሻንድ፣ አየር ንቭርትዙ ልውጠድ ሰቭዙ ጅውነ
ዳኽንነይዝመ ትኽነል ችጝዛጙ ፅበው ጥቕዘድ ሚሪየ ይውሽታንስ ኻሳቭ አልተነውድ አስክዝሽተኩ፡፡ ግርየድ ኻስቭሽ ግርየንድ “ዲግዝመ
ፅብንዙ ኪብርንዝ እክሰ በንነኩን” የው ኻሳቭድ ሲርየ ፃቨው ዊኑ፡፡ ኢትዮጵየትልም ኢትዮጵየትው ሰቭተጥ ገረደ ኮንፌደራሽን
(ኢሠማኮ)፣ ምጝንግስትዝ ዲግዝመ ፅብንዙ ኪብርንዝ ትኩርት ይውሽታንስ ዋቕረ አልተነውድ አርቕሽተኩ፡፡ መዝየ 23 ግሬ 2016 ዓ.ስ
ኻስቭሽ ግሬውድ አልም አቅቨ ሰብተጥዙ ግርየ ጒነው አውር ኻለይጅቅ ጋጥመው አቕሽም ዋቕረድ ግነ ዊትርቅ ቺተቺተቊ መድረከኒዝም
አቑ ቺተቺተቊ ዲምቅሸንጢዝ አልተው አቐነዊዝ ትኩርት ይወነው ተሚሰው የጝ፡፡ እቻቐው ኢትዮጵየቱ ኽዝቭድ ይሽተው አቐንቲዝ
ዲግዝመ ፅብንዙ ኪብርንድ እንቅ ዋቕርጢስቅ አይነትነይዝ ዳቕሽትጠ ቸለው ገቭ የጝ፡፡
ኢትዮጵየቱ ኽዝቭድ ወይትነይ ፅየው ዲግ ተምዘኩ፡፡ እንዝም ይሽታንድ እንቅትቅ አቅቨው ዲጉ አቐው ዊገ ዊግሽንዝመ ቲስመምን
ፃቭሽትጠ ጡሸኩ፡፡ አይነተ ይሽተው ችግሰድ እንቅ ዳቕሽትጝ ይውን ለምርንዙ ቃወ ግብርዝ ምኽርኽረ ፃቨነው ተሚሰኩ፡፡ ዲግድ
ሲፍንዘናንስ ሚንውት ፅበውዜ ንቕፀቁ ችግሰንድ ቅልጥፈዝ እኪረቁ አቐነውድ ንቕፀቁ ገበንዝ ትኻዝቨነው ቸልሸኩ፡፡ ቅጥር፣ ግርቭዝ
አምነነው፣ ላው ዊግነዝ ከቭሰነው ይሽተቁ ገበንድ በረነውዝ ዲግ ነስሰቊ ቲግቭረኒል ትኩርት ፃቨነው ተሚሰኩ፡፡ ኢትዮጵየ ጥውረው
ኻደገኘ አቐው ጎርዙ ጅልውዘ አቒስ ፍራንስ ኽዝቭዝ ኻስቨነው ቸልሸውዜ፣ ጣይትን ጒሰነዊስም አቑ አጭነ ዊልዊለነዊስ ከስጘ ፅበው ዲጉ
ጒደነድ ፅየነው ተሚሰኩ፡፡
ኢትዮጵየ ዲግ ችጝር ፊስረው ፖሊሲዝ ከቭሽተው ምፅነ ፃጀዙ ፍልውልወ ፋጥርሽየውዜ ነን ፅበው አቐንቲዝ እግርግሪት አቕሽ
ጚ በዊዝጎ ተግረነው ቸላይም፡፡ እቻቐው ኻግሪዝ እቅዝመ ጊቭርተንድ ተሚተዊዝ ልክ ስፍረይስ ስፍረይዘጎ ፍልውልወነው ቸሊጘውዜ
ጊቭርተንዙ አልስንድ ችብርጠ ቸለኩ፡፡ አልትን ብሽታንድ ቈሽ ተምዝትድ ቈሸኩ፡፡ ምንግስት ፕሮጀክተኒዝ ምላሰን አርየ አቒል ቈሸው
ጊንዝቭድ ቈሻንድ ችግሰድ ቈሸኩ፡፡ ንቕፀቁ ስፍልልም ዲግ ብሽት እቅዙዝመ ጊቭርተንዙ ፍልውልወድ ችብራንድ፣ ዜገን ፅብንዙ ኪብርንድ
መውረነው ቸልየቁም፡፡ ኻግር አቒዝም አቑ ቢዘ ኻግሪስ ጥወቁ ጊቭርተንዙ ምፅነድ ቃፅቫንድ ወየዙ ቈሽንድ ችብረነው ቸላውም፡፡ ነንት
ኰሪዝ ፅገወው ፅብንዙ ጥቕዘድ ቸለነው በቁ ዜገን አውግረው ችግሰዝ አጋልሽተነዊስ ቈሸዝ ዲግዙ ችግሰድ ቈሺት ጝታ ሩሔድ ኻውክሽንዝ
እቻቐው የጝ፡፡ አዊን ገቪስም ንየይስ ዲግ ብሽትንዝመ ፅብንዙ ኪብርንድ እክሰ ችጛንስ ቃውሰ ቲግቭር ፃቭሽት ሰራሽትጠ ጡሸኩ፡፡
ምንግስት አቑ ኻግርዙ ገቭድ ድውሰኩ የቁ እንቅ እኒን ኻስቭዘው አቐንትድ ላውጠነውዝ ይና ኽዝቪዙ ጥምተው ምነነድ ዊስጥጘ
ተሚሰኩ፡፡ እን ልውጠድ ተርጠ ቸለውድ ቈሽ ደይል ችብረቁዝመ ሽሹደዝ ልውጠ ነስነኩን ይጝ ልቕረ ፃቨቁ ዊግነኒጅቅ ቲስመምን
ፋጥረነውዝ ምኽርኽረ ፃቨናንስ ዊንብርል ጎይን ቲስመመነው ተሚሰኩ፡፡ ኽግዙ ንየትነይ ተራንስ ሚንውት ቓሊሰነው፣ እክስነይ ፅየው
ፃጀዙ አድልድለ ፅብጠጘ ፃቨነውዝመ ኢ- ሞራሉ አቐው ገቨድ እክሰነውዝ አርውሸነው ተሚሰኩ፡፡
ኻግር አቅቨ ተግዝም አቑ ይና ክልሊል እትላጙ ፅበው ችግሰድ ኰሪስ ኰሪዝጎ ልውጠ ቓሊሽታጙ አቕሽም ነንም እቻቐው ልውጠ
ተምዘው አቐነውድ ልብተነው ቸልሸኩ፡፡ ቺተዝም ቈሽ ወይ ኽምረትቊ ጅውንጢል የነትም ወፍለ፣ ዘተስመ ኮረም ጅውንጥድ ነንም
ህወሐትቊ ከምሸጥ ናኒል ጥወነውድ ችግሰድ እክሰ ችጘነዊስ ቃጥ ኻስቭዘው ተግል ችጘነውድ ቓሊሰነ የጝ፡፡ ብላ ክልሊልድም አቑ
ፌደራልዙ ምንግስትድ ዊትርቅ ጐርዙ ጎነ አጛጙ ችጝሸቊ ጅውንጥድ ዲግ አቐው ጒደነዝ እክሰ ችጘው አቐንትድ ሚቸሚችዘነውዝመ አስነ
ጊዝዝ ችጝጠ ፃቨነውዙ ገቭድ አምርስ ይሽተው ቲግቭር አጠ ጡሻውም፡፡ ብሔረ እቅ ጭሰጭሰንድም አቕሽ እንዛይ ጅውንጢስ ተረቊ
ዊግነንድ ከቨ ችጝጘው አቐንትድ ፋጥርሻንስ ጥቕዘ ፋጥርጠ ጡሸኩ፡፡ ቓሊነዊዝጘ በረነው ግነ እክሰ አቒንቀ ዊግነንዙ ፅብንዙ ሚቭትድ
ኻደገል ማለነው የጝ፡፡
ሰልጣንዝመ አርወዝ ጭቚ ቓለናጙ ዲቈነው ወየ እጀው ፃቨነው ወሰው ቅሬተዝመ ጣይትን ጭቑ የጝ፡፡ እኒን ቈሽ ኢትዮጵዬ
እን ክንድሸው ችግሰይስ ፈቅ ይራንስ እኩሰ ፃቨነዊስ ከስጘ ውርም አርወ እጀውም፡፡ ጥቅለ ኽዝቪዝም አቑ ላጥ ኻግርዙ ገቭድ
ድውሰኩ የቁ ዊግነንዝ እንቅ ዲግ ሲፍንዘናንስ ዊገ ዊግሸነዊስ ቢዘ ውርም ምርፀ እጀውም፡፡ ዲግዝመ ፅብንዙ ኪብርንዙ ዋቕረድ
ዊሰ ችጘውድ እንትየው ጒደነይዝ ጭቑ የጝ፡፡