ኢትዮጵየትል ቺተቺተቊ ኮርጢዝ
ኽረ እትለኩ፡፡ እትለው ኽረይዝም ንቕፀው
እጅር ክረኩ፤ ንቕፀው እንስስም ግድርዝ
ምላሰንዝ አቢተኩ፡፡ እንም አቓንድቅ
እድወ ኮርጢዝ ዊነቊ ቃወጥድቅ ኽረይዝ
ቘይሸው እቀ ኽቭሪዝ ከቨ አቐነውድ በርጝ
ኻግርሸንቱ ሽጙዝ ማጥን ይሽታጙ ኻደገድ
ቢዘ ፋየጘድ ጭቭሰነው፤ ግድርደቁ
ዊግነኒዝ ተረው ከቨድ ስⶓነውዙ
ቲግቭሪል ውላቐቊ ቃወጢዙ እግዘድ
ዊቱ ዊንየውም፡፡
አፄ ኃይለ ስላሴታው ዚምነ
ምጝግስቲዝ የነትም 1965 – 1966
ዓ.ስቑርቲል አሽ ወሎቲስ ጭቚ 2 ላ
ሽኽዝ ንየ እቅ ግድርዝ አቢተቊ አጛንድ
ንጉስድ ግነ ኽርድ አርቕሽታየጘድ ሺፍነነ
ይወነዊስም ከስጘዝ ንጉሲዝቊ ጝነቊድ
ሚቸሚቸው ፅበፅብን ፅብጛንስ ኲችዝጝ
ሰራሽጛጙ ዊነውድ የጝ ድቁሽተውድ፡፡
1977 ዓ.ስቑርትዝ ሰሜኑ ኻግርሸንቱ
ክፍሊል ፋጥርሸው ኽረድም አቕሽ 1
ነቁጠ 2 ሚሊዮንዝ ንየ ዜግጥ ሊጘት
ጓይጘጘድ ፃቭ ኽርሽ ዲቈነውድ ጣቀት
ኮርዙ ሲጘ አቓንድ፤ ኮሪዝ ኢትየጵየት
ቃውጛጙ ዊነቊድ ሊቀ መንበር መንግስቱ
ኃ/ማርያምታይም ተረው ከቨዙ አረይዝ
ፓርቲዙ ሲርይን የው ምላሰንዝ ንቕፀው
ጊንዝቭ ፍጠ ፃቨቊ አቐነውድ የጝ
ድቁሽተውድ፡፡
