ላዉ ጝኘስ

ሲን  15/2016

አጉረው ክንድጝ ችብረጥዙ ቕየ እግዘ 1152/2011 ሲሪየ አጉረቊ ክንድጝዙ ስረትዝመ ችብረጥዙ ክንድጝ ጡሸውዝመ ዊርተ ኻየው አቓንስ፤ ችብርነይ ክንድጝዝመ ስልጠነ፣አፅንኸነዝመ ምርምረዙ ማዕከለን እንዝጘም እቀ ኽቭር አቅቨ አግልግለ ይወነ ማኽለ አጛንስ ሚርየኵ፡፡ ኻግርሸን ቃውስር ይውረቁ ዚርፈኒዝመ ችግሰንጢዝ ቃውስጝ ይወቁዝመ ችብረነይዙ ጭሰጭሰንድ ግልፅነይ፣ ዋቕርሽትነይዝመ እክሱነይ ጻይጛንስ ቸልሰው ስረት ዘርጋቐነው የጝ።

አጉረቊ ክንድጝዝቊ ችብረንጥ ክንደነ ክንሰነ፣ አፅንኸዝመ ምርምረ እንዝጘም እቀ ኽቭር አቅቨ አግልግለዙ ይውን ስረትድ ኻግርሸንቱ ሊግዚዝመ ችብረንጥድ ፃይጥጘ ጡሸው ችብረይጅቅ አቭርደው ፃቨናንስ ኻለይ ጻቭጝ ሠራሽጘኵ፡፡ ዓልም አቅቨ ተግዝ ቲክርክርሸተ አቐናንስም ቸልሰው አርቕትዝ፣ ቸልት፣ ቓለ፣ ስነ ሚግቭርዝ ቺዝየቁ ዜገን ፍርዘነው ኽግዙ ስረትዝ ዋቕርሸተዝመ ዲቈትነይድ ደድሰው አቕንትዝ እፃ ፍጛንስ ቸልሰው የጝ።

ብላ ብሔሩ ክልሉ ምጝግስት ክንድጝ ኮሌጅዙ ችበችብሰነ ደንብ እግዘ 2009/2015 ሲሪየ ቈሽ ኮሌጀንዙ ዓለመድ:- ክንደው እጅርዙ ኻይል ሳልጥንዘነውዝ ቃውሰውዝመ ማኽለኘ ክንድጝ ጝንጢስ አልሰነው፤ ፅንኸዝመ ምርምረ ፃቨነውዝ አይጣን አርቕተንድ ፃጅሰነውዝመ ሊጊሰነው፤ክንደነ ክንሰነይዝ ከስጘ እቀ ኽቭር አቅቨ አግልግለ ይወነው የጝ።

ወይ ኽምረ ብሔረእቅ ጭሰጭሰኒል ችጝሸው ሳቁጠ ክንሰጥ ክንድጝ ኮሌጅ 2002 ዓ/ስ ሲሪሸው የጝ። ኮሌጅድ ጊርቀቱዝ፣ ኩኑቱ፣ ጫረቱዝመ ኤክስቴንሽንዙ አፅቨዝ 20 ሽኽዝ ንየ ሳልጥነጥድ ጊውርሰነውዝ ጅውነይል ፅበው ክንሰጢዙ እጅጝትድ ቓቭዘነውዝ ጝ ችጝሩድ ፈው አጉረው ችብረም የጝ።

ሰሜንቱ ጣይትኒዝ እግርገም አቕሽ ገርየኑዝ 1 ላዝ 35 ዲፕሎመዝ 1 ላዝ 56 ኪርመነ ዲግሪዙ ክንደጥ አቭኑሳጙ አቓንድ ጫረቱ አፅቨይዝ ቈሽ 1 ሽኽዝ 1 ላዝ 98 ሳልጥነጥ አቭኑሳጙ ችጝሸኩ።

ኮሌጅዙ አቭርዝንዝ ዓምረዝ ሊጙን ፅንኸዝቁ ሲምፖዚየመን አልተቊ አጛንድ ላውድ ኮሌጅድ ጭቚ አልሰው፤ ሊጘትረድ ቈሽ ብሔረእቅ ጭሰጭሰኒል  ፅበቊ

ክ/ጝንጢል ፅበቊ ክንሰጥዝመ ክንድጝዙ ሙየ ጒጥዝ አስልሸው ሲምፓዚየም ጛይ።

ሰቊጠ ክንሰጥዙ ኮሌጅ ሰቊጠ ኻትመይል ይወትቅ ፅበው እቀ ኽቭሩ አቅቨ አግልግለይዝ መድሐኒያለም ቃውሰዝመ ማኽለኘ ክንድጝ ጝኒል 8^ትረ ክፍልዙ ክንደተስመ አሩሸተ አረይ እመቤት ጌታወይ “ክንሰጥዙ ክንድጝ ኮሌጅድ ነየው አትርዘነድ ቀሰው አስልሽት ፃቫንስ ከቭኩ ፡፡ ክልል አቅቨ ተግዝ አስልሸው ልከ (ፈተነ)ዝ  ዲቁጭር ጭቚ አይጝቀት ቀሰው ፈን ሚዝግቭሰኩን የር አምነኩን” የነውዝ ጋልፅርኩች።

ኮሌጅድ አስለው አትርዘነዙ አፅቨይዝ አሩሸቊ ክንደጢስ ላውድ ክንደተ ያሬድ አበበ  “ክልል አቅቨ ተግዝ አሰልሸው ልከይዝ ከቨቊ ዋቕረንጥ አስለነዊዝመ  ክንደጥ ይና አውር ቸልን ልከድ ሰራሽነቅ አነጘዝመ ይናቕመት አምነቅ አነጘ ፃቨውዝ እውግረው ከቨየጝ ፃቨውድ”

መድሐኒዓለም ቃውሰውዝመ ማኽለኘ ክ/ጝንዙ አውር ክንሰተ አቐቊ  አት ጥጋቡ ዘሩ ሰቊጠ ክንሰጥዙ ኮሌጅድ ይውሽተው ዲቈትነይድ ፈናንስ ፃቨው ፍልውልወይዝ ክንደጥዝ አትርዘነዝ ክንሰነውዝመ ክልል አቅቨ ተግዝ አስልሸው ልከይጅቅ አልትልተው ዋቕረ አስለነውዝ ክንደጢል ፋጥርሽው ስነ እዘንዙ ጥቕዘይስ ፍጥጘጘ ፃቨነውድ ጋልፅጘኵ፡፡

“አጋልዘው ኰሩ ኽረይዝ ምላሰን ፃቭትቁ ቅምድ ቅየናንስ አስልሽን ዊኑን፤ አነጚ ኮሌጅድ እን ችግሰድ ቓለነውዝ ፃቀ (መኖ) አልሰነዊዝ፤ቅምድ ቅይሸነዊስ ቓዝኩ፡፡ እንዝም መልቊ እፈሪዝ አልታጙ ዊነው ፃቭድ ቀቭሽታየጘድ ፃቨው ላው ጝኘስ አቐው ችብረ የጝ” ይጘትቅም ሚዝርድጘውድ ።

ኮሌጅድ ክንሰነ ክንደነዙ ሰቪስ ቈሸዝ ይወው እቀ-ኽቭሩ አግልግለይዝ  ክንሰጥ ጝታ ሙየይዝ ፃጅትጛንስ ጊዝ ጨቨቅ ስልጠነ ይወነውዝ አይጥ አርቕተኒጅቅ ዲምቀው ዚወ አቐው ችብረ አቐነውድ ጋልፀቊድ ቈሽ አዝቨ ቃውሰውዝመ ማኽለኘ ክንድጝ ጝንዙ አውር ክንሰተ አቐቊ አት ገ/መስቀል አሰፋ ጛይ ።

ኮሌጅድ ብሔረእቅድ ጭሰጭሰኒል ክንሰነ ክንደነዙ ሰቪስ ቈሸዝ ፃቫጙ ፅበው እቀ ኽቭር አቅቨ አግልግለ ይውንድ ሚሪስጝ ሚርዘ ነየቊድ ሰቊጠ ክንሰጥዙ ክንድጝ ኮሌጅ ዲን አት ወርቁ ጌጡ ጛይ ፡፡

ፃይሸው ክንድጝ ዚምኒዝ 4 ድኽ እፈርዝ አርፈ ጨቨቅ 300 ቁርሽ ይወነውዝ ዚልቀውዝ ከቨ ፃቨነውድ፣ 8^ትረ ክፍል ክንደጢዝ ሸወጭዝ 8:00 ሰትዙ አትርዘነ ክንድጝ፤ ከራዲዮን ጊንዝቭ ተነነዝመ እድወ አግልግለ ገረደጅቅ አቭርደነውዝ ይወነውድ፣ክንሰጢዝ ሙየዙ ፃጅሰነ ስልጠነ አልማጅቅ አቭርደነውዝ ይወነውድ፣ ጅውነይል እትለው ኽረይዝ ሲሪየ ሻቘ ክንድጝ ጝንጥል ፅበቊ ፃቭዝቊ ቅም ቅይሽጥጘ ዊነቊዝ 1ላ ሽኽ ቁርሽዝ ንየ ፊሰው ፃቀ አልሰነውዝ መልቊ ክንደጢዝ አልታጙ ዊነው ፃቭድ ቀቭሽታየጘዝመ 12 አጥጘ ችግሰ እክሰጥ ቲግቭሩ ፅንኸን (Action Research) ሰቭተነውድ አት ወርቁ ጌጡ ጋልፅጘውድ።

ኮሌጅድ እቀ ኽቭሪዝ ይውሽትጠ ጡሸው አጡ አግልግለድ ይውየው አቐጘ ዊግተቊድ አት ወርቁ  “ሰሜንቱ ጣይተኒዝ እግርገም ብላ ክልሊል እትለው ፃውተይዙ ችግሰድ  ኻሊነውድ ቑጠ ተግራይነጘድ ፅጋ አቕኩ” ይጛንድም ጣይትንዝ ኰር ሳይስ ኪርም እጕረቊ ክንድጝዙ ችብረጢል ችጝዘው ቘጨድ

ሰቊጠ ክንድጝ ኮሌጂዝጘ ቈሽ ችግሰድ ወረው አጠጘ ፃቨነውድ የጝ ጋልፅጘውድ፡፡

አቐንስቅም እን ኮሌጅድ እቀ ኽቭር አቅቨዙ አግልግለድ ፋራዝ ይዋንስ ምጝግስትም አነ ጭሩዘጥ ድርጅተን ጝታ ችጘሩድ ፍጥጘ ጡሸኩ ጋዜጠሸን ንጭቱ ጝር ገረዱ ዲቭየዙ እፃ ፃቨች።

ዚግቨተ ኪሮስ ወ/ተንሳይ