ኻሰቭ ፃጉዘነ

ቘⶖቘዝመ ስነ ጽፈሽዙ ክንሰተ ዘሪሁን አስፋው ይጛንትጘ”ስነ ቃል ዜመዝ፣ ሲንዝን ዊንም ዊግሸንዝ ኹሪስ ኹሪዝጎ ከረከረው ቃልዙ ቅርስ የጝ። ሰነ-ቃልዝቁ አይንተኒስ ላው አቐው ተክዘዙ ዊግሽን(የነየን)፤ እቀ ኽቭሪዙ ዊግሽኒዝመ ዲዝጝትዝ ፍልቀቁ ጛይ” የነውዝ ጋልፅጝኲ።

ተክዘዙ ዊግሽን ኻሰቭዙ እፅወነዝ፤አትርዘነዝመ ዊርየው አቕንትዝ ኻሰቭ ለምሰነ ጛይ። እቅ ጝታ ዊግሽኒዝ ማኽሊል ጝታ ኽልክድ (ኽነድ)፣ ቲምንድ፣ ኽዝን እምጥጘድ ጥቅለዝ ሩሔዝ ማጥን ፃይጘው ቓለድ ሚሪጘኩ። ጝታ እምንትድ ጋልፅጘው፤ ኒውርድ ትክቭጘው፤ ጭቕትድ ስክትጘው (ዊግዝጘው)፤ ቀሰውድ ሚዜንዝጘው የጝ።

ተክዘዙ ዊግሽን ጥቅለ ገረዱ ሩሔ አቒል  ፃቭሽተቊ አክንወንጢል ቓለ( ሂስ) ይውሽተው እጅጝ ቃለንዝ ፈራቐው እፃ ዲቈዲቁሰነም የጝ።

ተክዘዙ ዊግሽን እቀ ኽቭሪዙ ደፈ ፃይ ጐው የጝ፤ እንዝም ጐው እቀ ኽቭር አቒል ፃቭሽተቁ ፅብንዝቁ ፍልውልወንጥድ ቲክነነውዝ ሲሪሸኩ። ፅብንድ እቻዘናንስ እቅ ፋፅምጘቊ ቺተቺተቊ ሰበን እኩጙ። ተክዘ:- ገጠር ጅውነይዙ ጒዝ ጨተ ዊንም ቅም ፍጭር ፍርዘተጅቅ ፃየፃይሸው የጝ። እጅርዙ ሲርይቊ ባኽሪያን፣ ቺተቺተቊ አምለኒዝመ ወይሰንጥድ ሲርየ ፃቨነውዝ ተክዘዙ ዊግሽን ፋጥርሸኲ። ኻጝልት፣ ቀስትነይ፣ ኻጝስነይ፣ ብልኽትነይ፣ ቅርነይ…ተከተከ ኻትርሸቊ ፍጥርዙ እትለንጢዝም ተክዘዙ ዊግሽን ፋጥርሸኩ።

እን ተክዘዙ ዊግሽን ወይ ኽምረት ኽዝቪዝም አጡ አቕንትዝ ዊግሽጘኩ። ንጭቱ ይነ ዲቭየይዝ እድስየ ወይ ኽምረ ብሔረ እቅ ጭሰጭሰን ሳቁጠ ወረደይል ዊግሸቁ ተክዘዙ ዊግሽንጥድ አወየው አቕንትዝ አርወል ግሪጘኩ? የውድ ሚሪስን ቺተቺተቁ አካላኒጅቅ ፃቭነው ዊንተይዝ ችጝነው ሚዝረድ አንቭቭስነ ቀንኑን።

ጒዝ ጨተ ወርቁ አያሌው ሰቊጠ ወረደይዝ 028 ቀቨሊዙ ፅበተ ጛይ።”ተክዘዙ ዊግሽን እኒንት ዊግጭር ይር አስልሽረው ገቨ አየውም። ዊግትረው ገቨይዝ ማኽሊል አጋሊዝጘ ተረው ኻሰቭድ ምርቅዘነው የጝ”ይጘኩ።

ጒዝ ጨተ ወርቁ እኹርሽጝ ሊግዝጘው እቀ ኽቭርድ የቁ ተክዘዙ ዊግትሽኝጢ

• ኵየንቲስ ግርየ ዲቈኩ።
• ላው ግርየ ፃቨውድ አምረ ፃቫይ

የቊዙ እክሰድ ቓልናን ኵየን ነይተ ቸላይረውድ ግርየ ነየው አቐጘዝመ እቅ አምረድቅ ልቕርድጝ ችጛይጘውድ ላው ግርየዝ ችጝጘው አቕንት ፅበጘ ቓሊሰነ አቐጘ የጝ ዋርዝጘውድ።

“ተክዘዙ ዊግሽን አልተው ገቨ እጝቅ ሚርሻው እፃ የጝ ፃየውድ፤ ንቕፀው ዊገ ዊግተነዊስ ቀለውዝ ተክዘዙ ዊግሽን ፃቭሽታንድ ግልፅ አቐኩ” የቁድ ቈሽ ጒዝ ጨተ ታደሰ በላይ ጛይ።

ጒዝ ጨተይዙ የኒዝጘ ጝታ አቅሊስ ኪርም ሲዝወረ አቐው እጅር ጝሰቭድ ኰሪዝመ አትርትዝ ሰቭትየውዜዝየ ቲክን ችጘው ቘጨድ (አቕንትድ) ሚርየቍ ተክዘዙ ዊግሽንጢስ።

• “ላው ሲን ዲቈድ ላጝጠ ሲን ዊሳውም
• አርቭ ግቭር ዊን ቅዳንሲንቭት ጥጥቑን ፃወች
• ጭንቁ እጅረይ አምርቍ ኻልየች
• ጎየውዝ ድረይ ወየው ” የቁድ አጡ ቓሊሰነ ፃቭጝ አሩሽጛጙ አቐጘ ጒዝጨተ ታደሰ ጋልፅጘኩ።

ተክዘዙ ዊግሽን  ጥቅለዝ መልቊ እፈሪስ ኪርም ኽየቁ እቂል አሽ ቀተይዝመ ጭቅተይዝ ልብሰነ ጉግ አቐጘድ ጋልፅሽተኩ።

ፎክሎርዙ ጊውርሸተዝመ ጋዜጠኘ ደጀን ታምሩ ተክዘዙ ዊግሽንዝ ማጥን ቲክነውድ ይጘኩ።”ተክዘዙ ዊግሽን እቅ ዊገ ጉልምዘነውዝ ቀለውዝ እጻድ ልብሰናንስ ጻቨው አቭረ ሚልከዝ አልተው ክንድጝ ቃልዙ አይንት የጝ” ይጛንድ ጋልፅጘኩ።

ተክዘዙ ዊግሸን ጻየው አርወይስ ላውድ ክንሰነው አቓንድ፤  ሲዝወረድ ጉለሸ አቓንስ፤ኻቨረድ ልብታንስ ፤ጨቀረድ ጝ ቀተይስ ዋጥራንስ፤ ቘይሸው ስቑርት ጻቫንስ ክንሰነ ጉግ አቐጘ ጋዜጠኘ ደጀን  ልብስጘኩ።

• “መይለ እጀው ምከን እጀው
• በል የው በለ ጻይ ጨወኩ”

የቊ ተክዘዙ ዊግሸንጥድ ቓሊሰነይዝጘ ጒየቊ ጋዜጠኘ ደጀን እን የነት በል በል ይተ ሳትዝ ጒይዝረውዜ ምከንድም ችጘኩ ። መይለ ጻይራንድ ቀድስረኩ። ዚክርደኩ ።እንዝ ቃጥ ቃውሰዝ መይለ ጊቭርዥ የነት አቐጘ ጋልፅጘኩ።

ተክዘዙ ዊግሽን ላዘ አርወድ አትርዘነው የጝ ።እን የነት ጭሩ ሰቭ ሰቭተው፤ እቀ ኽቭሪዝ ተክዘ አቐው፤ውላቐው ሰቪዝ ሚዜንሽተው አምኮረ እጅርድ አትርዘው የጝ። ተክዘዝ ቲክነቁድ ቓልናን:-

• ጅጥ ብዝ ጒይዘው ግድር ጀግዘው
• ሰቭ ሲለታይ ስድት አርቓይ
• ሲን ግንቭት ቢቊልዘው እደረጅቅ ማኽረው የቊ ዊግሸንጥድ ልብስጘውድ

አምሩ ሊቈ ችጘው ጉለሸ አርሸድ ጝቕመት እፍስ ላጥ እቅዝ ቲርፈኩ፤ጒይዘነ ኰርድም አርቐኵ። ሳቲዝ ጒዘነውዝ ቺዘው ጊቭርት ችጛንስ ሳትዙ አርወድ ጊዝዙ አርወድ ልብሰነ አቕጘጘ የጝ ጋዜጠኘ ደጀን ጋልፅጘውድ።

ተክዘዙ ዊግሽን ቲክርክርዘነም አቐጘ ጋልፅጘው አቕንትድ ሚሪስጘኲ፡፡ እን የነት አውማው ጒዝ ጨተድ ፣ሰብተተድ ሰቭዙ ቲክርክረዝ ኽየው ደረጀል ችጛንስ ኻጝዝመ ጉለሸድ እንዝጘም ቀለዊዝመ ኽየዊዝ ቲክርክረዝ ቓሊስነ ፃብ ጉየቊስ፡- አልሰኩ። ቲክነቁድ ቓልናን፦

• ችምተ ጒዘዊስ ቢረ ደደውድ፦ ቀለዊስ ሽጙ ኽየው እጅር ሰብታን ሰብ ፈኑ አቐኩ።
• ብልኽ አምርቁ ኻጝ እልትቁ ኻስቭጘኩ፦ ብልኽድ እክል ኻየኩ ኻጝድ ግን እልቱ

ኻልየኩ።

• ሊን ተግረውዝመ ሊን ኮክለውዝ፦ ቃውስ ልብተው አርቕትዝ ፃጅተው አቐነውድ

ቓሊሰነ ጛይ።

ተክዘዙ ዊግሽን ኽየው አርወ ጻየው አቓንድ አርሸይዙ ሰቪዝ አርመይስ፣ ኽወይዝ፣ ዋርነይል አልተው ኽየው  ክንድጝ ቃልዙ ክፍል  አቐነውድም ፎክሎር ጊውርሸተድ ዋርዝጘኩ።

ተክዘዙ ዊግሽነንድ ቺተቺተቁ ቅርፀንዝ ጋልፅሽትጝጠ ቸልጘኩ።ዓይንትነይዝ ቲክነቁ ቓለነው ቸልሸኩ።

1.ደድሰተ

• እስጙ ጣዘናን ኧል ሊዘኩ
• ኻሽወረዝመ ሊቈዝ ጫጙ ቀለኩ
• ጝፁዘ ጭቭሰው ጥላ ችጛውም
• ወነ ቓፅየውዜ ግዘ ልብታውም
• ጒቝረዊዝ በዊል ቕርጘ ወቃይነው
• ድቈናን ወሻይ ጣዘናን ክረች

2.ቲክርክርሰተ

• አረዊት ጋይስ አርሸ ቺዝጚዝ
• ኻሽወረ ጝቃሊዝ ሲድሸተ ጝበወይዝ(ጥቂት)
• ግድርደውዝ ቅጣ ዝቛንደውዝ ሽቅነ
• ዊርቀ ምቊነውዝ ቢቅለ ድቃረተዝ
• ዝይጝቀ እራቐነው ክሪጝቀት ዳብሽተነው

3.ደግምግመው

• ማኽር ማኽር ወሽይሽ ናኽር
• ግርይን ግርይን ኪዊል ፅብን ፅብን ዝቨል
• ሲዝወረ ጐይ ጐይ ድልመነዝ ሰቭተኩ

4.ኽየ ኽይሰቊ

ክረነዊስ ሳብጠነው

ደርተነዊስ ዛኽለነው

ቅምሸነዊስ ቅመነው

ቃውሽተነዊስ ቃውሰነው

ጥቅለዝ እን ተክዘዙ ዊግሸንጥድ ውሸብልድ ስነ እዘንዝ አትርጝ ሊግዝጛንስ ፃቨው ፃጀ አቐነዊዝ  ከስጘ፤ ቲክነው ኹሪዝ ከሰናንስ ጅውነይል ችጝሸቊ ኽምጣጘ ቈጝቈዝ ዊግትሸቊ ተክዘዝቁ ዊግሽንጥድ ፅንኸ ፃቭሽትጝ ሚዝግቭሽጝጠ ጡሸኲ ሚሪሸቁ አካለንም ሰነድዝ ሚዝግቭጝ  እቑረነውዝ ጝታ ችጘሩድ ፍጝነ ይነ ዲብየይዙ እፃ የጝ እቑርሽጝነ ጋዜጠሸንቱ እፃ የጝ።

ይና ዲቭየይዙ ሚዝረድ :-

ኽዝቭዝቊዝመ ፤የስነ ፅሑፍ

መሠረታውያን (ዘሪሁን አስፋው)ቲስ

የው መፃፊስ አሩሽንኩኑን፡፡

ዚግቨተ ፡- ኪሮስ ወ/ተንሳይ      

– ሲን 30/2016 ዓ.ስ