እክሰዝመ ጭሰጭሰን ሳልጥነው አእምሮ ሳልጠው ሰቭዝ

ምጝግስትዝቍ ችብረጥ ጝታ ሰቭትንድ ዚምኑ ፃቨነውዝ ሳልጠው አግልግለድ ችጝቱነይ ፃየው ፃቨነው አጠጘ ቸልሰው ቃውሸነ አሩሽጝጠጘ ኻይሽተኲ።

 እንም አቐነዊዝ ምጝግስትዙ አግልግለዝመ ጭሰጭሰንዙ ስረትድ ቺዘቺዝሸነ ሪፎርም አስልሽ ቲግቭርሻጙም ችጝሸኩ። ሪፎርምድ ፋፅምዘናንስ ቸልሰው ፖሊሲዝቍ ሰነዳን ስትራቴጂያንዝመ ኽግዝቍ ማዕቀፋን አስልሽጝ ቺት የው አቕንትዝ ቲግቭርል ጡውሽተውድ ቈሽ እን ፃይነው አምረይዝ የጝ።

  ሪፎርምድ ኢትዮጵየቱ ምጝግስትዙ ሰቭትኒል ፅበው አግልግለ ይወይውንድ ዚምኑ ፃቨናንስመ ሳልጥዘነው ጋብዝ ሲርዩ ልውጠ ነስጡ ይሽትም እምንት ማልሽትኩ። እኔንት ቲክንም ፓይለትዝ ዋልጠ ችብረጥ ጎየቍ ቺትጝ ጎይጝኩጙ።

 ጛይም፦ ሲቪል ሰርቪስ ኮሚሽን፣ ትኽነ ሚኒስቴር፣ ክንድጝ ሚኒስቴር፣ አርሽነይ ሚኒስቴር፣ ፕላን እፍርት ሚኒስቴር ዝመ፣ ጊንዝቭ ሚኒስቴርዝ ሪፎርሚዙ ልክንድ (ሙከረድ) ቲግቭሩ ፃቭጛጙ ፅበቍ ችብረጥ አቐነውድ ሲቪል ሰርቪስ ኮሚሽንድ 2016 ዓ.ስ ዋልጠ እርፍዙ ግምገመይዝ ሚሪኲ። እኔንት ቲክንም ላውላው ችብረጢል አንፃሩ ልውጠ ቓልሽታጙ አቐነውድ ችብረይዝቍ ቃወጥ፣ ሲቭል ሰርቪስዝቍ ሙየ ጒጥዝመ አግልግለ ችጘቍ ደንበኝጥ ዊግትጘኩ።

 ወይ ኽምረ ብሔረ እቅ ጭሰጭሰኒል 38 ምጝግስትቍ ችብረጥ እኩጙ። እቝርሸው ሪፎርምድ ቲግቭሩ ፃቨነውዝ ቀሰው ሽጙዝ ጭጝሸቍ ችብረጢስ በው ቃውሰዝ ጭጝሸውድ ቈሽ ጊንዝቭ ኢኮኖሚ እፍርዝን ቃወነድ አቐነውድ ብሔረቅ ጪሰጭሰንዙ ሰቪል ሰርቪስ ቃወነይስ ችጝነው ሚዝረድ ሚሪየኲ፡፡

 እኔንት ቲክንም ችብረይዙ ጥቅለ ሰቭዙ ዲዝጝትድ ውር ተከው አቐጘዝመ፤ ሰራሸጢዙ ሰቭዙ ባኽልድ ውር ተከው አቐጘድ ኽምጠ ዊከ ጋዜጠ ችብረይዝ ሚሪሸቊ አካለንጅቅ ዊንተ ፃቭርኩች፡፡

ዘውነ አስፋው ቸኮለ ብሄረቅ ጪሰጭሰኒዙ ጊንዝቭዝመ ኢኮኖሚ እፍርት ቃወነዙ ዲቈተ ጛይ፡፡ ቃወነድ ብሔረ እቅዙ ቃወነይስ ኪርም ወረደይል አሽ ፅበቍ ሰራሸጢዝመ ቃወጢዝ ችብረድ ይወው አግልግለይዝ እምጥጘው አግልግልሸቸ ፋጥረናንስ ትኩርት ይውጝ ሰራሸቍ አቐነውድ የጝ ጋልፅጘውድ።

“ምጝግሥት ዜግጥ ሳልጠውዝመ ሙስነይስ ዊርየው አግልግለ ችጝጥጘ ጡሸኩ” የው እቚረው አይር ሰቭትንዙ ሪፎምድ ቲግቭርል ግሪስጘጘድ ጋልፀቍ ዲቈተድ “እኔን ይና ችብረይዙ ሰቭዙ ዲዝጝትድ ቈሽ ያን ዩዝ አቒጝቀት አግልግለ ችጘቍ ደምበኝጢዝመ አነ ሲቭል ሰርቪሲዙ ሰቭዙ ፋፅምፅመ ልከነ ሪፎርሚዝ ደደደድሽተው ቲግቭር የጝ” ይጝኩጙ።

ችብረድ ንቕፀዝ አክንወቍ ቲግቭራንድ ጊንዝቭዝመ ጊንዝቭጅቅ ፃየፃይሽተቍ ቲግቭራን አቐነዊጅቅ ፃየፃይሽት ቺተው ጥንቅቀ ደምዘው ችብረ አቐነውድ ጋልፀቍድ ዘውነ አስፋው ፤ “ሰራሸጥድ ሲኑስ ኪርምጝ አርቭ አሽ ሰራሽጘው ሰቪስ ከስጘዝ እዳቐው ሰቭ ዊናንድ ቅዳሲንቭት ኽየ ሲንቨት ቈሽ ካላንደር ዲቨቍ ግርቂዝቅ ሰቭል ዲቍሰቊ አቐነውድ ዊግትጘኲ። እንም አቐነዊዝ ጝታ ችብረድ አግልግልሸጢዝ ሚዘንሽተውዝመ፣ ሲቭል ሰርቪስድ እቚረው ቃውሸነድ እሩዘነውዝ ጋብዝም ብሔረ እቅ ጭሰጭሰኒስ በው ቃውሰዝ ቈድሸተ ችብረ አቐነው ቸለጘም የጝ ዘውነ አስፋው ደድስጘውድ።

 ጝታ ችብረይል ፅበቍ ሙየ ጒጢስ “አው አውቲስ ቺዘው ፋፅምፅመ ፃይኩ?” የውድ ልከናንስ ቸልሰው ሰቭዙ እግዝግዘነ ስረት ፃየቍ አቐነውድ ዊግተቍድ ዘውነ አስፋው ፤ “ሰራሸጥድም ላውድ ላየይስ ዲዝጘ ቂስማጙ ቀሰው ቲክርክረዙ ሚንፍስ እኩ። እኔን ቲክርክረዙ ሚንፍስድም ጊንዝቭ ኢኮኖሚ እፍርት ቃወነይዝ ስሪል ፅበቍ ወረጢዝቍ ፅፈሽ ጝንጢልቅ ጊምጠ ፃቨነው ቸልንኩኑን” ይጝኲⶖ እኔን አቚ የነት ችብረይል ውርም ቢተ እጀውም የነት አየው አቓንሰቅ ነንም ዲቈውዝ ቀሰው ፈን ሚዝግቭስጝ አግልግልሸተድ ጠራዘናንስ ኲችዝጝ ሰራሸቍ አቐነውድ የጝ ጋልፅጘውድ።

አት ጳውሎስ ዘውዱ ሰቁጠ ኻትመ ፅበተዝመ ንየርነይዙ ሰቭዝ ጭሰጭሽተቍ አጛንድ ችብረድ ይወው አግልግለድ ሚሪሸውዝ ነይጘው ቓለይዝ እቀጘዝ እምጥጝዘውዝመ ሚዘንሽትጠ ጡሸው አቐነውድ የጝ ዊግትጘውድ ። “ያን ብሔረ እቅ ጭሰጭሰኒዝ ስሪል ፅበቍ ችብረጢዝ መኪነዙ ጎመዝመ ላውጥውጠንጥ የጝ አልሰርድ፣ አልስጨ አዚጠው ጎዘድ ፃቅ ፊጣንድ ነይጘው አቭኑዝኒዝ ግነ እቀጘዝ የጝ እምጥጘርድ ” ይጘኩ።

ላውላው ችብረይል ፊትራንድ ምላሰን ንቒሰነውዝ ጡሸው አግልግለድ ጡሸው ሰቲዝ ይዋቍ ፅበነውድ ጋልፀቍድ አት ጳውሎስ” አውማው ችብረድቅ ችበችብረውድ ኽዝቪዝ አግልግለ ይወናንስ አቓንስቅ ጊንዝቭ ኢኮኖሚ እፍርቲዝጘድቅ ቅንነትዝ አግልግለ ነይጛን ቀሰው ዊኑ” የነውዝም ጝታ ምኽርድ አድልጘኩ።

  ወይ ኽምረ ብሔረ እቅ ጭሰጭሰን ሲቭል ሰርቪስ ቃወነይዝ ሪፎርም ከቨዝመ ቲክንክነ ሙየ ጉርየ አቐቍድ አት ሙላት ኃይሉ ይጘጘድ ብሄረ እቅ ጭሰጭሰኒዝ ስሪል ፅበቊ 38 ችብርጥድ ጝታ ሰቭዙ ፋፅምፅመድ ሲርየ ፃቨነውዝ ሻቘ ደረጀዝ ጐይሽጘጘ ዊግትጘኲ፡፡ እንዝ ሲርየም አጉረቍ (ኪፍየው ) ደረጀል 3 ፣ ማኽልኘ ደረጀል 21 ችብረጥዝመ ሳስ የው ደረጀል 14 ችብረጥ ጎየቍ አቐነውድ ጋልፅጘኲ፡፡ “2016ቱ ሰቭዙ ዚምኒዝ  ጊንዝቭ ኢኮኖሚ እፍርት ቃወነድ ሲቭል ሰርቪስ ሪፎርሚዝ እቚርሸቍ ሊኪየንጥድ እቻዘነዊዝ ቍርሽዙ ቈደዝመ ሚዝረዙ ወቂት ችጘነው ቸለው ችብረ የጝ” የቍ አጛንድ እክሰ  ቃወነይዝመ ጥወራን ቃወነይዝ ቈሽ ሊጘትረዝመ ሻቘትረ ደረጀ ፃየነውዝ ብሔረ እቅ ጭሰጭሰን ምኽር ጝኒዝ አርቕሽትነይ ችጘቍ አቐነውድ የጝ ዊግትጘውድ፡፡

ሲቭል ሰርቪስ ኮሚሽንድ እን አምረይዝ ፊሰው ችብረጥ ሊክየነ ሪፎርምድ ቲግቭሩ ፃቨናንስ እንቅ ችብረጢዝቅ ስልጠነ ይወነውዝ ቲግቭራንድ አወየው ደረጀል ፅብጘጘድ ለውርደኲ ጝታ ፅብጘው ደረጀድ ውር ተከጘድ ጊምግመኲ፣ እንዝ ሲርየ ጝታ ሰቭ ፋፅምፅመድ ሲርየ ፃቨው ደረጀዝም እቑርጛጙ ተረቍ አቐነውድ ጋልፀቍድ አት ሙላት “ሳልጠው፣ ግልፅነይ ፃየውዝመ ደንበኝጥዙ በንድ ጠራዘው አግልግለ ይወይውንድ ቺዝየው አጠጘ ቈሽ ይና ልከነይዙ ማኽል የጝ” ይጘኩ። እኔንት ሲርየ ፃነውዝ ፃቨሽተው ልከዝ 2016 ዓ.ስ በጀትዙ አምረይዝ ቀሰው ደረጀል ፅበቍድ ጝታ ቀሰው ፋፅምፅመድ አትርዘነውዝ እትለቍ ላውላው ቢተንጥድ እቻዝጥጘ ጡሸኩ፤ ጝታ ፋፅምፅመይዝ እግርገ እዳቐቍ ችብረጥድ ቈሽ እቑርሸው ልከነይዝ ቚጠ ቺዘው ፋፅምፅመዝጐ ተርጥጘ ጡሸጘድም እፃ ዲቈዲቍስጝኩጙ።

ፌዴራል ሲቪል ሰርቪስ ኮሚሽድ አይር ሚንፍስዝ ነቃቐውዝመ አግልግለተ አቐነውድ አምን ለምረው ሲቪል ሰርቫንት ፋጥረነውዝ ጥቅለ ኢትዮጵየቱ ሲቭል ሰርቪስ ስረትድ ላውጠናንስ ቲግቭሩ ፍሉልወል የጝ ችጝሸውድ።  አቓንስቅም ኮሚሽንድ ፊሰቍ ሪፎርምዝቍ ልከንጥድ ቲግቭረነውዝ ዚልቁነይ ፃየውዝመ ጣራዘው አግልግለ ይወይውንድ ላውጥጘ ቸለቍ ሰባንድ ሰራሸነው ኻይሽተኲ፡፡

ሙስነይስ ናፀ አቐውዝመ አግልግልሸጢዙ በንድ ጠራዝጠ ቸለው ሰቭ ሰራሸነውዝ ብሔረ እቅ ጭሰጭሰኒዙ እቀ ኽቭርድም አነ አውማው አግልግለ በነው ዜገይዝቅ ጥውሸውዝ አቭኑዘነው ሳልጥነው ሰቭዙ ባኽል ጋልፅሽተንጢስ ላው ጋልሽተነ አቐነውድ አምነነውዝ ችብረጥዙ በው ቃውሰተ ቲግቭር አጠ ጡሸኩ ይና ዲቭየዙ እፃ የጝ።

ዚግቨተ ፡- ንጉሱ ማሩ 

ሲን 30/2016 ዓ.ስ